অধ্যায় 58

58.1

জনমেজয় উবাচ
উত্তঙ্কায় বরং দত্ত্বা গোবিন্দো দ্বিজসত্তম
অত ঊর্ধ্বং মহাবাহুঃ কিং চকার মহায়শাঃ

বৈশংপায়ন উবাচ
দত্ত্বা বরমুত্তঙ্কায় প্রায়াত্সাত্যকিনা সহ
দ্বারকামেব গোবিন্দঃ শীঘ্রবেগৈর্মহাহয়ৈঃ

সরাংসি চ নদীশ্চৈব বনানি বিবিধানি চ
অতিক্রম্য সসাদাথ রম্যাং দ্বারবতীং পুরীম্

বর্তমানে মহারাজ মহে রৈবতকস্য চ
উপায়াত্পুণ্ডরীকাক্ষো যুয়ুধানানুগস্তদা

অলংকৃতস্তু স গিরির্নানারূপবিচিত্রিতৈঃ
বভৌ রুক্মময়ৈঃ কাশৈঃ সর্বতঃ পুরুষর্ষভ

কাঞ্চনস্রগ্ভিরগ্র্যাভিঃ সুমনোভিস্তথৈব চ
বাসোভিশ্চ মহাশৈলঃ কল্পবৃক্ষৈশ্চ সর্বশঃ

দীপবৃক্ষৈশ্চ সৌবর্ণৈরভীক্ষ্ণমুপশোভিতঃ
গুহানির্ঝরদেশেষু দিবাভূতো বভূব হ

পতাকাভির্বিচিত্রাভিঃ সঘণ্টাভিঃ সমন্ততঃ
পুংভিঃ স্ত্রীভিশ্চ সংঘুষ্টঃ প্রগীত ইব চাভবৎ
অতীব প্রেক্ষণীয়োঽভূন্মেরুর্মুনিগণৈরিব

মত্তানাং হৃষ্টরূপাণাং স্ত্রীণাং পুংসাং চ ভারত
গায়তাং পর্বতেন্দ্রস্য দিবস্পৃগিব নিস্বনঃ

প্রমত্তমত্তসংমত্তক্ষ্বেডিতোত্কৃষ্টসংকুলা
তথা কিলকিলাশব্দৈর্ভূরভূত্সুমনোহরা

বিপণাপণবান্রম্যো ভক্ষ্যভোজ্যবিহারবান্
বস্ত্রমাল্যোত্করয়ুতো বীণাবেণুমৃদঙ্গবান্

সুরামৈরেয়মিশ্রেণ ভক্ষ্যভোজ্যেন চৈব হ
দীনান্ধকৃপণাদিভ্যো দীয়মানেন চানিশম্
বভৌ পরমকল্যাণো মহস্তস্য মহাগিরেঃ

পুণ্যাবসথবান্বীর পুণ্যকৃদ্ভির্নিষেবিতঃ
বিহারো বৃষ্ণিবীরাণাং মহে রৈবতকস্য হ
স নগো বেশ্মসংকীর্ণো দেবলোক ইবাবভৌ

তদা চ কৃষ্ণসাংনিধ্যমাসাদ্য ভরতর্ষভ
শক্রসদ্মপ্রতীকাশো বভূব স হি শৈলরাট্

ততঃ সংপূজ্যমানঃ স বিবেশ ভবনং শুভম্
গোবিন্দঃ সাত্যকিশ্চৈব জগাম ভবনং স্বকম্

বিবেশ চ স হৃষ্টাত্মা চিরকালপ্রবাসকঃ
কৃত্বা নসুকরং কর্ম দানবেষ্বিব বাসবঃ

উপয়াতং তু বার্ষ্ণেয়ং ভোজবৃষ্ণ্যন্ধকাস্তদা
অভ্যগচ্ছন্মহাত্মানং দেবা ইব শতক্রতুম্

স তানভ্যর্চ্য মেধাবী পৃষ্ট্বা চ কুশলং তদা
অভ্যবাদয়ত প্রীতঃ পিতরং মাতরং তথা

তাভ্যাং চ সংপরিষ্বক্তঃ সান্ত্বিতশ্চ মহাভুজঃ
উপোপবিষ্টস্তৈঃ সর্বৈর্বৃষ্ণিভিঃ পরিবারিতঃ

স বিশ্রান্তো মহাতেজাঃ কৃতপাদাবসেচনঃ
কথয়ামাস তং কৃষ্ণঃ পৃষ্টঃ পিত্রা মহাহবম্