Utshovঅধ্যায় 59
59.1
বসুদেব উবাচ
শ্রুতবানস্মি বার্ষ্ণেয় সংগ্রামং পরমাদ্ভুতম্
নরাণাং বদতাং পুত্র কথোদ্ঘাতেষু নিত্যশঃ
59.2
ত্বং তু প্রত্যক্ষদর্শী চ কার্যজ্ঞশ্চ মহাভুজ
তস্মাত্প্রব্রূহি সংগ্রামং যাথাতথ্যেন মেঽনঘ
59.3
যথা তদভবদ্যুদ্ধং পাণ্ডবানাং মহাত্মনাম্
ভীষ্মকর্ণকৃপদ্রোণশল্যাদিভিরনুত্তমম্
59.4
অন্যেষাং ক্ষত্রিয়াণাং চ কৃতাস্ত্রাণামনেকশঃ
নানাবেষাকৃতিমতাং নানাদেশনিবাসিনাম্
59.5
ইত্যুক্তঃ পুণ্ডরীকাক্ষঃ পিত্রা মাতুস্তদন্তিকে
শশংস কুরুবীরাণাং সংগ্রামে নিধনং যথা
59.6
বাসুদেব উবাচ
অত্যদ্ভুতানি কর্মাণি ক্ষত্রিয়াণাং মহাত্মনাম্
বহুলত্বান্ন সংখ্যাতুং শক্যান্যব্দশতৈরপি
59.7
প্রাধান্যতস্তু গদতঃ সমাসেনৈব মে শৃণু
কর্মাণি পৃথিবীশানাং যথাবদমরদ্যুতে
59.8
ভীষ্মঃ সেনাপতিরভূদেকাদশচমূপতিঃ
কৌরব্যঃ কৌরবেয়াণাং দেবানামিব বাসবঃ
59.9
শিখণ্ডী পাণ্ডুপুত্রাণাং নেতা সপ্তচমূপতিঃ
বভূব রক্ষিতো ধীমান্ধীমতা সব্যসাচিনা
59.10
তেষাং তদভবদ্যুদ্ধং দশাহানি মহাত্মনাম্
কুরূণাং পাণ্ডবানাং চ সুমহদ্রোমহর্ষণম্
59.11
ততঃ শিখণ্ডী গাঙ্গেয়ময়ুধ্যন্তং মহাহবে
জঘান বহুভির্বাণৈঃ সহ গাণ্ডীবধন্বনা
59.12
অকরোত্স ততঃ কালং শরতল্পগতো মুনিঃ
অয়নং দক্ষিণং হিত্বা সংপ্রাপ্তে চোত্তরায়ণে
59.13
ততঃ সেনাপতিরভূদ্দ্রোণোঽস্ত্রবিদুষাং বরঃ
প্রবীরঃ কৌরবেন্দ্রস্য কাব্যো দৈত্যপতেরিব
59.14
অক্ষৌহিণীভিঃ শিষ্টাভির্নবভির্দ্বিজসত্তমঃ
সংবৃতঃ সমরশ্লাঘী গুপ্তঃ কৃপবৃষাদিভিঃ
59.15
ধৃষ্টদ্যুম্নস্ত্বভূন্নেতা পাণ্ডবানাং মহাস্ত্রবিৎ
গুপ্তো ভীমেন তেজস্বী মিত্রেণ বরুণো যথা
59.16
পঞ্চসেনাপরিবৃতো দ্রোণপ্রেপ্সুর্মহামনাঃ
পিতুর্নিকারান্সংস্মৃত্য রণে কর্মাকরোন্মহৎ
59.17
তস্মিংস্তে পৃথিবীপালা দ্রোণপার্ষতসংগরে
নানাদিগাগতা বীরাঃ প্রায়শো নিধনং গতাঃ
59.18
দিনানি পঞ্চ তদ্যুদ্ধমভূত্পরমদারুণম্
ততো দ্রোণঃ পরিশ্রান্তো ধৃষ্টদ্যুম্নবশং গতঃ
59.19
ততঃ সেনাপতিরভূত্কর্ণো দৌর্যোধনে বলে
অক্ষৌহিণীভিঃ শিষ্টাভির্বৃতঃ পঞ্চভিরাহবে
59.20
তিস্রস্তু পাণ্ডুপুত্রাণাং চম্বো বীভত্সুপালিতাঃ
হতপ্রবীরভূয়িষ্ঠা বভূবুঃ সমবস্থিতাঃ
59.21
ততঃ পার্থং সমাসাদ্য পতংগ ইব পাবকম্
পঞ্চত্বমগমত্সৌতির্দ্বিতীয়েঽহনি দারুণে
59.22
হতে কর্ণে তু কৌরব্যা নিরুত্সাহা হতৌজসঃ
অক্ষৌহিণীভিস্তিসৃভির্মদ্রেশং পর্যবারয়ন্
59.23
হতবাহনভূয়িষ্ঠাঃ পাণ্ডবাস্তু যুধিষ্ঠিরম্
অক্ষৌহিণ্যা নিরুত্সাহাঃ শিষ্টয়া পর্যবারয়ন্
59.24
অবধীন্মদ্ররাজানং কুরুরাজো যুধিষ্ঠিরঃ
তস্মিংস্তথার্ধদিবসে কর্ম কৃত্বা সুদুষ্করম্
59.25
হতে শল্যে তু শকুনিং সহদেবো মহামনাঃ
আহর্তারং কলেস্তস্য জঘানামিতবিক্রমঃ
59.26
নিহতে শকুনৌ রাজা ধার্তরাষ্ট্রঃ সুদুর্মনাঃ
অপাক্রামদ্গদাপাণির্হতভূয়িষ্ঠসৈনিকঃ
59.27
তমন্বধাবত্সংক্রুদ্ধো ভীমসেনঃ প্রতাপবান্
হ্রদে দ্বৈপায়নে চাপি সলিলস্থং দদর্শ তম্
59.28
ততঃ শিষ্টেন সৈন্যেন সমন্তাত্পরিবার্য তম্
উপোপবিবিশুর্হৃষ্টা হ্রদস্থং পঞ্চ পাণ্ডবাঃ
59.29
বিগাহ্য সলিলং ত্বাশু বাগ্বাণৈর্ভৃশবিক্ষতঃ
উত্থায় স গদাপাণির্যুদ্ধায় সমুপস্থিতঃ
59.30
ততঃ স নিহতো রাজা ধার্তরাষ্ট্রো মহামৃধে
ভীমসেনেন বিক্রম্য পশ্যতাং পৃথিবীক্ষিতাম্
59.31
ততস্তত্পাণ্ডবং সৈন্যং সংসুপ্তং শিবিরে নিশি
নিহতং দ্রোণপুত্রেণ পিতুর্বধমমৃষ্যতা
59.32
হতপুত্রা হতবলা হতমিত্রা ময়া সহ
যুয়ুধানদ্বিতীয়েন পঞ্চ শিষ্টাঃ স্ম পাণ্ডবাঃ
59.33
সহৈব কৃপভোজাভ্যাং দ্রৌণির্যুদ্ধাদমুচ্যত
যুয়ুত্সুশ্চাপি কৌরব্যো মুক্তঃ পাণ্ডবসংশ্রয়াৎ
59.34
নিহতে কৌরবেন্দ্রে চ সানুবন্ধে সুয়োধনে
বিদুরঃ সংজয়শ্চৈব ধর্মরাজমুপস্থিতৌ
59.35
এবং তদভবদ্যুদ্ধমহান্যষ্টাদশ প্রভো
যত্র তে পৃথিবীপালা নিহতাঃ স্বর্গমাবসন্
59.36
বৈশংপায়ন উবাচ
শৃণ্বতাং তু মহারাজ কথাং তাং রোমহর্ষণীম্
দুঃখহর্ষপরিক্লেশা বৃষ্ণীনামভবংস্তদা