Utshovঅধ্যায় 60
60.1
বৈশংপায়ন উবাচ
কথয়ন্নেব তু তদা বাসুদেবঃ প্রতাপবান্
মহাভারতয়ুদ্ধং তত্কথান্তে পিতুরগ্রতঃ
60.2
অভিমন্যোর্বধং বীরঃ সোঽত্যক্রামত ভারত
অপ্রিয়ং বসুদেবস্য মা ভূদিতি মহামনাঃ
60.3
মা দৌহিত্রবধং শ্রুত্বা বসুদেবো মহাত্যয়ম্
দুঃখশোকাভিসংতপ্তো ভবেদিতি মহামতিঃ
60.4
সুভদ্রা তু তমুত্ক্রান্তমাত্মজস্য বধং রণে
আচক্ষ্ব কৃষ্ণ সৌভদ্রবধমিত্যপতদ্ভুবি
60.5
তামপশ্যন্নিপতিতাং বসুদেবঃ ক্ষিতৌ তদা
দৃষ্ট্বৈব চ পপাতোর্ব্যাং সোঽপি দুঃখেন মূর্ছিতঃ
60.6
ততঃ স দৌহিত্রবধাদ্দুঃখশোকসমন্বিতঃ
বসুদেবো মহারাজ কৃষ্ণং বাক্যমথাব্রবীৎ
60.7
ননু ত্বং পুণ্ডরীকাক্ষ সত্যবাগ্ভুবি বিশ্রুতঃ
যদ্দৌহিত্রবধং মেঽদ্য ন খ্যাপয়সি শত্রুহন্
60.8
তদ্ভাগিনেয়নিধনং তত্ত্বেনাচক্ষ্ব মে বিভো
সদৃশাক্ষস্তব কথং শত্রুভির্নিহতো রণে
60.9
দুর্মরং বত বার্ষ্ণেয় কালেঽপ্রাপ্তে নৃভিঃ সদা
যত্র মে হৃদয়ং দুঃখাচ্ছতধা ন বিদীর্যতে
60.10
কিমব্রবীত্ত্বা সংগ্রামে সুভদ্রাং মাতরং প্রতি
মাং চাপি পুণ্ডরীকাক্ষ চপলাক্ষঃ প্রিয়ো মম
60.11
আহবং পৃষ্ঠতঃ কৃত্বা কচ্চিন্ন নিহতঃ পরৈঃ
কচ্চিন্মুখং ন গোবিন্দ তেনাজৌ বিকৃতং কৃতম্
60.12
স হি কৃষ্ণ মহাতেজাঃ শ্লাঘন্নিব মমাগ্রতঃ
বালভাবেন বিজয়মাত্মনোঽকথয়ত্প্রভুঃ
60.13
কচ্চিন্ন বিকৃতো বালো দ্রোণকর্ণকৃপাদিভিঃ
ধরণ্যাং নিহতঃ শেতে তন্মমাচক্ষ্ব কেশব
60.14
স হি দ্রোণং চ ভীষ্মং চ কর্ণং চ রথিনাং বরম্
স্পর্ধতে স্ম রণে নিত্যং দুহিতুঃ পুত্রকো মম
60.15
এবংবিধং বহু তদা বিলপন্তং সুদুঃখিতম্
পিতরং দুঃখিততরো গোবিন্দো বাক্যমব্রবীৎ
60.16
ন তেন বিকৃতং বক্ত্রং কৃতং সংগ্রামমূর্ধনি
ন পৃষ্ঠতঃ কৃতশ্চাপি সংগ্রামস্তেন দুস্তরঃ
60.17
নিহত্য পৃথিবীপালান্সহস্রশতসংঘশঃ
খেদিতো দ্রোণকর্ণাভ্যাং দৌঃশাসনিবশং গতঃ
60.18
একো হ্যেকেন সততং যুধ্যমানো যদি প্রভো
ন স শক্যেত সংগ্রামে নিহন্তুমপি বজ্রিণা
60.19
সমাহূতে তু সংগ্রামে পার্থে সংশপ্তকৈস্তদা
পর্যবার্যত সংক্রুদ্ধৈঃ স দ্রোণাদিভিরাহবে
60.20
ততঃ শত্রুক্ষয়ং কৃত্বা সুমহান্তং রণে পিতুঃ
দৌহিত্রস্তব বার্ষ্ণেয় দৌঃশাসনিবশং গতঃ
60.21
নূনং চ স গতঃ স্বর্গং জহি শোকং মহামতে
ন হি ব্যসনমাসাদ্য সীদন্তে সন্নরাঃ ক্বচিৎ
60.22
দ্রোণকর্ণপ্রভৃতয়ো যেন প্রতিসমাসিতাঃ
রণে মহেন্দ্রপ্রতিমাঃ স কথং নাপ্নুয়াদ্দিবম্
60.23
স শোকং জহি দুর্ধর্ষ মা চ মন্যুবশং গমঃ
শস্ত্রপূতাং হি স গতিং গতঃ পরপুরংজয়ঃ
60.24
তস্মিংস্তু নিহতে বীরে সুভদ্রেয়ং স্বসা মম
দুঃখার্তাথো পৃথাং প্রাপ্য কুররীব ননাদ হ
60.25
দ্রৌপদীং চ সমাসাদ্য পর্যপৃচ্ছত দুঃখিতা
আর্যে ক্ব দারকাঃ সর্বে দ্রষ্টুমিচ্ছামি তানহম্
60.26
অস্যাস্তু বচনং শ্রুত্বা সর্বাস্তাঃ কুরুয়োষিতঃ
ভুজাভ্যাং পরিগৃহ্যৈনাং চুক্রুশুঃ পরমার্তবৎ
60.27
উত্তরাং চাব্রবীদ্ভদ্রা ভদ্রে ভর্তা ক্ব তে গতঃ
ক্ষিপ্রমাগমনং মহ্যং তস্মৈ ত্বং বেদয়স্ব হ
60.28
ননু নাম স বৈরাটি শ্রুত্বা মম গিরং পুরা
ভবনান্নিষ্পতত্যাশু কস্মান্নাভ্যেতি তে পতিঃ
60.29
অভিমন্যো কুশলিনো মাতুলাস্তে মহারথাঃ
কুশলং চাব্রুবন্সর্বে ত্বাং যুয়ুত্সুমিহাগতম্
60.30
আচক্ষ্ব মেঽদ্য সংগ্রামং যথাপূর্বমরিংদম
কস্মাদেব বিলপতীং নাদ্যেহ প্রতিভাষসে
60.31
এবমাদি তু বার্ষ্ণেয্যাস্তদস্যাঃ পরিদেবিতম্
শ্রুত্বা পৃথা সুদুঃখার্তা শনৈর্বাক্যমথাব্রবীৎ
60.32
সুভদ্রে বাসুদেবেন তথা সাত্যকিনা রণে
পিত্রা চ পালিতো বালঃ স হতঃ কালধর্মণা
60.33
ঈদৃশো মর্ত্যধর্মোঽয়ং মা শুচো যদুনন্দিনি
পুত্রো হি তব দুর্ধর্ষঃ সংপ্রাপ্তঃ পরমাং গতিম্
60.34
কুলে মহতি জাতাসি ক্ষত্রিয়াণাং মহাত্মনাম্
মা শুচশ্চপলাক্ষং ত্বং পুণ্ডরীকনিভেক্ষণে
60.35
উত্তরাং ত্বমবেক্ষস্ব গর্ভিণীং মা শুচঃ শুভে
পুত্রমেষা হি তস্যাশু জনয়িষ্যতি ভামিনী
60.36
এবমাশ্বাসয়িত্বৈনাং কুন্তী যদুকুলোদ্বহ
বিহায় শোকং দুর্ধর্ষং শ্রাদ্ধমস্য হ্যকল্পয়ৎ
60.37
সমনুজ্ঞাপ্য ধর্মজ্ঞা রাজানং ভীমমেব চ
যমৌ যমোপমৌ চৈব দদৌ দানান্যনেকশঃ
60.38
ততঃ প্রদায় বহ্বীর্গা ব্রাহ্মণেভ্যো যদূদ্বহ
সমহৃষ্যত বার্ষ্ণেয়ী বৈরাটীং চাব্রবীদিদম্
60.39
বৈরাটি নেহ সংতাপস্ত্বয়া কার্যো যশস্বিনি
ভর্তারং প্রতি সুশ্রোণি গর্ভস্থং রক্ষ মে শিশুম্
60.40
এবমুক্ত্বা ততঃ কুন্তী বিররাম মহাদ্যুতে
তামনুজ্ঞাপ্য চৈবেমাং সুভদ্রাং সমুপানয়ম্
60.41
এবং স নিধনং প্রাপ্তো দৌহিত্রস্তব মাধব
সংতাপং জহি দুর্ধর্ষ মা চ শোকে মনঃ কৃথাঃ