অধ্যায় 61

61.1

বৈশংপায়ন উবাচ
এতচ্ছ্রুত্বা তু পুত্রস্য বচঃ শূরাত্মজস্তদা
বিহায় শোকং ধর্মাত্মা দদৌ শ্রাদ্ধমনুত্তমম্

তথৈব বাসুদেবোঽপি স্বস্রীয়স্য মহাত্মনঃ
দয়িতস্য পিতুর্নিত্যমকরোদৌর্ধ্বদেহিকম্

ষষ্টিং শতসহস্রাণি ব্রাহ্মণানাং মহাভুজঃ
বিধিবদ্ভোজয়ামাস ভোজ্যং সর্বগুণান্বিতম্

আচ্ছাদ্য চ মহাবাহুর্ধনতৃষ্ণামপানুদৎ
ব্রাহ্মণানাং তদা কৃষ্ণস্তদভূদ্রোমহর্ষণম্

সুবর্ণং চৈব গাশ্চৈব শয়নাচ্ছাদনং তথা
দীয়মানং তদা বিপ্রাঃ প্রভূতমিতি চাব্রুবন্

বাসুদেবোঽথ দাশার্হো বলদেবঃ সসাত্যকিঃ
অভিমন্যোস্তদা শ্রাদ্ধমকুর্বন্সত্যকস্তদা
অতীব দুঃখসংতপ্তা ন শমং চোপলেভিরে

তথৈব পাণ্ডবা বীরা নগরে নাগসাহ্বয়ে
নোপগচ্ছন্তি বৈ শান্তিমভিমন্যুবিনাকৃতাঃ

সুবহূনি চ রাজেন্দ্র দিবসানি বিরাটজা
নাভুঙ্ক্ত পতিশোকার্তা তদভূত্করুণং মহৎ
কুক্ষিস্থ এব তস্যাস্তু স গর্ভঃ সংপ্রলীয়ত

আজগাম ততো ব্যাসো জ্ঞাত্বা দিব্যেন চক্ষুষা
আগম্য চাব্রবীদ্ধীমান্পৃথাং পৃথুললোচনাম্
উত্তরাং চ মহাতেজাঃ শোকঃ সংত্যজ্যতাময়ম্

জনিষ্যতি মহাতেজাঃ পুত্রস্তব যশস্বিনি
প্রভাবাদ্বাসুদেবস্য মম ব্যাহরণাদপি
পাণ্ডবানাময়ং চান্তে পালয়িষ্যতি মেদিনীম্

ধনংজয়ং চ সংপ্রেক্ষ্য ধর্মরাজস্য পশ্যতঃ
ব্যাসো বাক্যমুবাচেদং হর্ষয়ন্নিব ভারত

পৌত্রস্তব মহাবাহো জনিষ্যতি মহামনাঃ
পৃথ্বীং সাগরপর্যন্তাং পালয়িষ্যতি চৈব হ

তস্মাচ্ছোকং কুরুশ্রেষ্ঠ জহি ত্বমরিকর্শন
বিচার্যমত্র ন হি তে সত্যমেতদ্ভবিষ্যতি

যচ্চাপি বৃষ্ণিবীরেণ কৃষ্ণেন কুরুনন্দন
পুরোক্তং তত্তথা ভাবি মা তেঽত্রাস্তু বিচারণা

বিবুধানাং গতো লোকানক্ষয়ানাত্মনির্জিতান্
ন স শোচ্যস্ত্বয়া তাত ন চান্যৈঃ কুরুভিস্তথা

এবং পিতামহেনোক্তো ধর্মাত্মা স ধনংজয়ঃ
ত্যক্ত্বা শোকং মহারাজ হৃষ্টরূপোঽভবত্তদা

পিতাপি তব ধর্মজ্ঞ গর্ভে তস্মিন্মহামতে
অবর্ধত যথাকালং শুক্লপক্ষে যথা শশী

ততঃ সংচোদয়ামাস ব্যাসো ধর্মাত্মজং নৃপম্
অশ্বমেধং প্রতি তদা ততঃ সোঽন্তর্হিতোঽভবৎ

ধর্মরাজোঽপি মেধাবী শ্রুত্বা ব্যাসস্য তদ্বচঃ
বিত্তোপনয়নে তাত চকার গমনে মতিম্