অধ্যায় 62

62.1

জনমেজয় উবাচ
শ্রুত্বৈতদ্বচনং ব্রহ্মন্ব্যাসেনোক্তং মহাত্মনা
অশ্বমেধং প্রতি তদা কিং নৃপঃ প্রচকার হ

রত্নং চ যন্মরুত্তেন নিহিতং পৃথিবীতলে
তদবাপ কথং চেতি তন্মে ব্রূহি দ্বিজোত্তম

বৈশংপায়ন উবাচ
শ্রুত্বা দ্বৈপায়নবচো ধর্মরাজো যুধিষ্ঠিরঃ
ভ্রাতৄন্সর্বান্সমানায্য কালে বচনমব্রবীৎ
অর্জুনং ভীমসেনং চ মাদ্রীপুত্রৌ যমাবপি

শ্রুতং বো বচনং বীরাঃ সৌহৃদাদ্যন্মহাত্মনা
কুরূণাং হিতকামেন প্রোক্তং কৃষ্ণেন ধীমতা

তপোবৃদ্ধেন মহতা সুহৃদাং ভূতিমিচ্ছতা
গুরুণা ধর্মশীলেন ব্যাসেনাদ্ভুতকর্মণা

ভীষ্মেণ চ মহাপ্রাজ্ঞ গোবিন্দেন চ ধীমতা
সংস্মৃত্য তদহং সম্যক্কর্তুমিচ্ছামি পাণ্ডবাঃ

আয়ত্যাং চ তদাত্বে চ সর্বেষাং তদ্ধি নো হিতম্
অনুবন্ধে চ কল্যাণং যদ্বচো ব্রহ্মবাদিনঃ

ইয়ং হি বসুধা সর্বা ক্ষীণরত্না কুরূদ্বহাঃ
তচ্চাচষ্ট বহু ব্যাসো মরুত্তস্য ধনং নৃপাঃ

যদ্যেতদ্বো বহুমতং মন্যধ্বং বা ক্ষমং যদি
তদানয়ামহে সর্বে কথং বা ভীম মন্যসে

ইত্যুক্তবাক্যে নৃপতৌ তদা কুরুকুলোদ্বহ
ভীমসেনো নৃপশ্রেষ্ঠং প্রাঞ্জলির্বাক্যমব্রবীৎ

রোচতে মে মহাবাহো যদিদং ভাষিতং ত্বয়া
ব্যাসাখ্যাতস্য বিত্তস্য সমুপানয়নং প্রতি

যদি তত্প্রাপ্নুয়ামেহ ধনমাবিক্ষিতং প্রভো
কৃতমেব মহারাজ ভবেদিতি মতির্মম

তে বয়ং প্রণিপাতেন গিরীশস্য মহাত্মনঃ
তদানয়াম ভদ্রং তে সমভ্যর্চ্য কপর্দিনম্

তং বিভুং দেবদেবেশং তস্যৈবানুচরাংশ্চ তান্
প্রসাদ্যার্থমবাপ্স্যামো নূনং বাগ্বুদ্ধিকর্মভিঃ

রক্ষন্তে যে চ তদ্দ্রব্যং কিংকরা রৌদ্রদর্শনাঃ
তে চ বশ্যা ভবিষ্যন্তি প্রসন্নে বৃষভধ্বজে

শ্রুত্বৈবং বদতস্তস্য বাক্যং ভীমস্য ভারত
প্রীতো ধর্মাত্মজো রাজা বভূবাতীব ভারত
অর্জুনপ্রমুখাশ্চাপি তথেত্যেবাব্রুবন্মুদা

কৃত্বা তু পাণ্ডবাঃ সর্বে রত্নাহরণনিশ্চয়ম্
সেনামাজ্ঞাপয়ামাসুর্নক্ষত্রেঽহনি চ ধ্রুবে

ততো যয়ুঃ পাণ্ডুসুতা ব্রাহ্মণান্স্বস্তি বাচ্য চ
অর্চয়িত্বা সুরশ্রেষ্ঠং পূর্বমেব মহেশ্বরম্

মোদকৈঃ পায়সেনাথ মাংসাপূপৈস্তথৈব চ
আশাস্য চ মহাত্মানং প্রয়য়ুর্মুদিতা ভৃশম্

তেষাং প্রয়াস্যতাং তত্র মঙ্গলানি শুভান্যথ
প্রাহুঃ প্রহৃষ্টমনসো দ্বিজাগ্র্যা নাগরাশ্চ তে

ততঃ প্রদক্ষিণীকৃত্য শিরোভিঃ প্রণিপত্য চ
ব্রাহ্মণানগ্নিসহিতান্প্রয়য়ুঃ পাণ্ডুনন্দনাঃ

সমনুজ্ঞাপ্য রাজানং পুত্রশোকসমাহতম্
ধৃতরাষ্ট্রং সভার্যং বৈ পৃথাং পৃথুললোচনাম্

মূলে নিক্ষিপ্য কৌরব্যং যুয়ুত্সুং ধৃতরাষ্ট্রজম্
সংপূজ্যমানাঃ পৌরৈশ্চ ব্রাহ্মণৈশ্চ মনীষিভিঃ