অধ্যায় 63

63.1

বৈশংপায়ন উবাচ
ততস্তে প্রয়য়ুর্হৃষ্টাঃ প্রহৃষ্টনরবাহনাঃ
রথঘোষেণ মহতা পূরয়ন্তো বসুংধরাম্

সংস্তূয়মানাঃ স্তুতিভিঃ সূতমাগধবন্দিভিঃ
স্বেন সৈন্যেন সংবীতা যথাদিত্যাঃ স্বরশ্মিভিঃ

পাণ্ডুরেণাতপত্রেণ ধ্রিয়মাণেন মূর্ধনি
বভৌ যুধিষ্ঠিরস্তত্র পৌর্ণমাস্যামিবোডুরাট্

জয়াশিষঃ প্রহৃষ্টানাং নরাণাং পথি পাণ্ডবঃ
প্রত্যগৃহ্ণাদ্যথান্যায়ং যথাবত্পুরুষর্ষভঃ

তথৈব সৈনিকা রাজন্রাজানমনুয়ান্তি যে
তেষাং হলহলাশব্দো দিবং স্তব্ধ্বা ব্যতিষ্ঠত

স সরাংসি নদীশ্চৈব বনান্যুপবনানি চ
অত্যক্রামন্মহারাজো গিরিং চৈবান্বপদ্যত

তস্মিন্দেশে চ রাজেন্দ্র যত্র তদ্দ্রব্যমুত্তমম্
চক্রে নিবেশনং রাজা পাণ্ডবঃ সহ সৈনিকৈঃ
শিবে দেশে সমে চৈব তদা ভরতসত্তম

অগ্রতো ব্রাহ্মণান্কৃত্বা তপোবিদ্যাদমান্বিতান্
পুরোহিতং চ কৌরব্য বেদবেদাঙ্গপারগম্

প্রাঙ্নিবেশাত্তু রাজানং ব্রাহ্মণাঃ সপুরোধসঃ
কৃত্বা শান্তিং যথান্যায়ং সর্বতঃ পর্যবারয়ন্

কৃত্বা চ মধ্যে রাজানমমাত্যাংশ্চ যথাবিধি
ষট্পথং নবসংস্থানং নিবেশং চক্রিরে দ্বিজাঃ

মত্তানাং বারণেন্দ্রাণাং নিবেশং চ যথাবিধি
কারয়িত্বা স রাজেন্দ্রো ব্রাহ্মণানিদমব্রবীৎ

অস্মিন্কার্যে দ্বিজশ্রেষ্ঠা নক্ষত্রে দিবসে শুভে
যথা ভবন্তো মন্যন্তে কর্তুমর্হথ তত্তথা

ন নঃ কালাত্যয়ো বৈ স্যাদিহৈব পরিলম্বতাম্
ইতি নিশ্চিত্য বিপ্রেন্দ্রাঃ ক্রিয়তাং যদনন্তরম্

শ্রুত্বৈতদ্বচনং রাজ্ঞো ব্রাহ্মণাঃ সপুরোধসঃ
ইদমূচুর্বচো হৃষ্টা ধর্মরাজপ্রিয়েপ্সবঃ

অদ্যৈব নক্ষত্রমহশ্চ পুণ্যং; যতামহে শ্রেষ্ঠতমং ক্রিয়াসু
অম্ভোভিরদ্যেহ বসাম রাজ;ন্নুপোষ্যতাং চাপি ভবদ্ভিরদ্য

শ্রুত্বা তু তেষাং দ্বিজসত্তমানাং; কৃতোপবাসা রজনীং নরেন্দ্রাঃ
ঊষুঃ প্রতীতাঃ কুশসংস্তরেষু; যথাধ্বরেষু জ্বলিতা হব্যবাহাঃ

ততো নিশা সা ব্যগমন্মহাত্মনাং; সংশৃণ্বতাং বিপ্রসমীরিতা গিরঃ
ততঃ প্রভাতে বিমলে দ্বিজর্ষভা; বচোঽব্রুবন্ধর্মসুতং নরাধিপম্