অধ্যায় 64

64.1

ব্রাহ্মণা ঊচুঃ
ক্রিয়তামুপহারোঽদ্য ত্র্যম্বকস্য মহাত্মনঃ
কৃত্বোপহারং নৃপতে ততঃ স্বার্থে যতামহে

বৈশংপায়ন উবাচ
শ্রুত্বা তু বচনং তেষাং ব্রাহ্মণানাং যুধিষ্ঠিরঃ
গিরীশস্য যথান্যায়মুপহারমুপাহরৎ

আজ্যেন তর্পয়িত্বাগ্নিং বিধিবত্সংস্কৃতেন হ
মন্ত্রসিদ্ধং চরুং কৃত্বা পুরোধাঃ প্রয়য়ৌ তদা

স গৃহীত্বা সুমনসো মন্ত্রপূতা জনাধিপ
মোদকৈঃ পায়সেনাথ মাংসৈশ্চোপাহরদ্বলিম্

সুমনোভিশ্চ চিত্রাভির্লাজৈরুচ্চাবচৈরপি
সর্বং স্বিষ্টকৃতং কৃত্বা বিধিবদ্বেদপারগঃ
কিংকরাণাং ততঃ পশ্চাচ্চকার বলিমুত্তমম্

যক্ষেন্দ্রায় কুবেরায় মণিভদ্রায় চৈব হ
তথান্যেষাং চ যক্ষাণাং ভূতাধিপতয়শ্চ যে

কৃসরেণ সমাংসেন নিবাপৈস্তিলসংয়ুতৈঃ
শুশুভে স্থানমত্যর্থং দেবদেবস্য পার্থিব

কৃত্বা তু পূজাং রুদ্রস্য গণানাং চৈব সর্বশঃ
যয়ৌ ব্যাসং পুরস্কৃত্য নৃপো রত্ননিধিং প্রতি

পূজয়িত্বা ধনাধ্যক্ষং প্রণিপত্যাভিবাদ্য চ
সুমনোভির্বিচিত্রাভিরপূপৈঃ কৃসরেণ চ

শঙ্খাদীংশ্চ নিধীন্সর্বান্নিধিপালাংশ্চ সর্বশঃ
অর্চয়িত্বা দ্বিজাগ্র্যান্স স্বস্তি বাচ্য চ বীর্যবান্

তেষাং পুণ্যাহঘোষেণ তেজসা সমবস্থিতঃ
প্রীতিমান্স কুরুশ্রেষ্ঠঃ খানয়ামাস তং নিধিম্

ততঃ পাত্র্যঃ সকরকাঃ সাশ্মন্তকমনোরমাঃ
ভৃঙ্গারাণি কটাহানি কলশান্বর্ধমানকান্

বহূনি চ বিচিত্রাণি ভাজনানি সহস্রশঃ
উদ্ধারয়ামাস তদা ধর্মরাজো যুধিষ্ঠিরঃ

তেষাং লক্ষণমপ্যাসীন্মহান্করপুটস্তথা
ত্রিলক্ষং ভাজনং রাজংস্তুলার্ধমভবন্নৃপ

বাহনং পাণ্ডুপুত্রস্য তত্রাসীত্তু বিশাং পতে
ষষ্টিরুষ্ট্রসহস্রাণি শতানি দ্বিগুণা হয়াঃ

বারণাশ্চ মহারাজ সহস্রশতসংমিতাঃ
শকটানি রথাশ্চৈব তাবদেব করেণবঃ
খরাণাং পুরুষাণাং চ পরিসংখ্যা ন বিদ্যতে

এতদ্বিত্তং তদভবদ্যদুদ্দধ্রে যুধিষ্ঠিরঃ
ষোডশাষ্টৌ চতুর্বিংশত্সহস্রং ভারলক্ষণম্

এতেষ্বাধায় তদ্দ্রব্যং পুনরভ্যর্চ্য পাণ্ডবঃ
মহাদেবং প্রতি যয়ৌ পুরং নাগাহ্বয়ং প্রতি

দ্বৈপায়নাভ্যনুজ্ঞাতঃ পুরস্কৃত্য পুরোহিতম্
গোয়ুতে গোয়ুতে চৈব ন্যবসত্পুরুষর্ষভঃ

সা পুরাভিমুখী রাজঞ্জগাম মহতী চমূঃ
কৃচ্ছ্রাদ্দ্রবিণভারার্তা হর্ষয়ন্তী কুরূদ্বহান্