UtshovChapter 64
64.1
ब्राह्मणा ऊचुः
क्रियतामुपहारोऽद्य त्र्यम्बकस्य महात्मनः
कृत्वोपहारं नृपते ततः स्वार्थे यतामहे
Brahmana uchuh
Kriyatamupaharodya tryambakasya mahatmanah
Kritvopaharam nripate tatah svarthe yatamahe
64.2
वैशंपायन उवाच
श्रुत्वा तु वचनं तेषां ब्राह्मणानां युधिष्ठिरः
गिरीशस्य यथान्यायमुपहारमुपाहरत्
Vaishampayana uvacha
Shrutva tu vachanam tesham brahmananam yudhishthirah
Girishasya yathanyayamupaharamupaharat
64.3
आज्येन तर्पयित्वाग्निं विधिवत्संस्कृतेन ह
मन्त्रसिद्धं चरुं कृत्वा पुरोधाः प्रययौ तदा
Ajyena tarpayitvagnim vidhivatsanskritena ha
Mantrasiddham charum kritva purodhah prayayau tada
64.4
स गृहीत्वा सुमनसो मन्त्रपूता जनाधिप
मोदकैः पायसेनाथ मांसैश्चोपाहरद्बलिम्
Sa grihitva sumanaso mantraputa janadhipa
Modakaih payasenatha mansaishchopaharadbalim
64.5
सुमनोभिश्च चित्राभिर्लाजैरुच्चावचैरपि
सर्वं स्विष्टकृतं कृत्वा विधिवद्वेदपारगः
किंकराणां ततः पश्चाच्चकार बलिमुत्तमम्
Sumanobhishcha chitrabhirlajairuchchavachairapi
Sarvam svishtakritam kritva vidhivadvedaparagah
Kinkaranam tatah pashchachchakara balimuttamam
64.6
यक्षेन्द्राय कुबेराय मणिभद्राय चैव ह
तथान्येषां च यक्षाणां भूताधिपतयश्च ये
Yakshendraya kuberaya manibhadraya chaiva ha
Tathanyesham cha yakshanam bhutadhipatayashcha ye
64.7
कृसरेण समांसेन निवापैस्तिलसंयुतैः
शुशुभे स्थानमत्यर्थं देवदेवस्य पार्थिव
Krisarena samansena nivapaistilasanyutaih
Shushubhe sthanamatyartham devadevasya parthiva
64.8
कृत्वा तु पूजां रुद्रस्य गणानां चैव सर्वशः
ययौ व्यासं पुरस्कृत्य नृपो रत्ननिधिं प्रति
Kritva tu pujam rudrasya gananam chaiva sarvashah
Yayau vyasam puraskritya nripo ratnanidhim prati
64.9
पूजयित्वा धनाध्यक्षं प्रणिपत्याभिवाद्य च
सुमनोभिर्विचित्राभिरपूपैः कृसरेण च
Pujayitva dhanadhyaksham pranipatyabhivadya cha
Sumanobhirvichitrabhirapupaih krisarena cha
64.10
शङ्खादींश्च निधीन्सर्वान्निधिपालांश्च सर्वशः
अर्चयित्वा द्विजाग्र्यान्स स्वस्ति वाच्य च वीर्यवान्
Shankhadinshcha nidhinsarvannidhipalanshcha sarvashah
Archayitva dvijagryansa svasti vachya cha viryavan
64.11
तेषां पुण्याहघोषेण तेजसा समवस्थितः
प्रीतिमान्स कुरुश्रेष्ठः खानयामास तं निधिम्
Tesham punyahaghoshena tejasa samavasthitah
Pritimansa kurushreshthah khanayamasa tam nidhim
64.12
ततः पात्र्यः सकरकाः साश्मन्तकमनोरमाः
भृङ्गाराणि कटाहानि कलशान्वर्धमानकान्
Tatah patryah sakarakah sashmantakamanoramah
Bhringarani katahani kalashanvardhamanakan
64.13
बहूनि च विचित्राणि भाजनानि सहस्रशः
उद्धारयामास तदा धर्मराजो युधिष्ठिरः
Bahuni cha vichitrani bhajanani sahasrashah
Uddharayamasa tada dharmarajo yudhishthirah
64.14
तेषां लक्षणमप्यासीन्महान्करपुटस्तथा
त्रिलक्षं भाजनं राजंस्तुलार्धमभवन्नृप
Tesham lakshanamapyasinmahankaraputastatha
Trilaksham bhajanam rajanstulardhamabhavannripa
64.15
वाहनं पाण्डुपुत्रस्य तत्रासीत्तु विशां पते
षष्टिरुष्ट्रसहस्राणि शतानि द्विगुणा हयाः
Vahanam panduputrasya tatrasittu visham pate
Shashtirushtrasahasrani shatani dviguna hayah
64.16
वारणाश्च महाराज सहस्रशतसंमिताः
शकटानि रथाश्चैव तावदेव करेणवः
खराणां पुरुषाणां च परिसंख्या न विद्यते
Varanashcha maharaja sahasrashatasammitah
Shakatani rathashchaiva tavadeva karenavah
Kharanam purushanam cha parisankhya na vidyate
64.17
एतद्वित्तं तदभवद्यदुद्दध्रे युधिष्ठिरः
षोडशाष्टौ चतुर्विंशत्सहस्रं भारलक्षणम्
Etadvittam tadabhavadyaduddadhre yudhishthirah
Shodashashtau chaturvinshatsahasram bharalakshanam
64.18
एतेष्वाधाय तद्द्रव्यं पुनरभ्यर्च्य पाण्डवः
महादेवं प्रति ययौ पुरं नागाह्वयं प्रति
Eteshvadhaya taddravyam punarabhyarchya pandavah
Mahadevam prati yayau puram nagahvayam prati
64.19
द्वैपायनाभ्यनुज्ञातः पुरस्कृत्य पुरोहितम्
गोयुते गोयुते चैव न्यवसत्पुरुषर्षभः
Dvaipayanabhyanugyatah puraskritya purohitam
Goyute goyute chaiva nyavasatpurusharshabhah
64.20
सा पुराभिमुखी राजञ्जगाम महती चमूः
कृच्छ्राद्द्रविणभारार्ता हर्षयन्ती कुरूद्वहान्
Sa purabhimukhi rajanjagama mahati chamuh
Krichchhraddravinabhararta harshayanti kurudvahan