Utshovঅধ্যায় 65
65.1
বৈশংপায়ন উবাচ
এতস্মিন্নেব কালে তু বাসুদেবোঽপি বীর্যবান্
উপায়াদ্বৃষ্ণিভিঃ সার্ধং পুরং বারণসাহ্বয়ম্
65.2
সময়ং বাজিমেধস্য বিদিত্বা পুরুষর্ষভঃ
যথোক্তো ধর্মপুত্রেণ ব্রজন্স স্বপুরীং প্রতি
65.3
রৌক্মিণেয়েন সহিতো যুয়ুধানেন চৈব হ
চারুদেষ্ণেন সাম্বেন গদেন কৃতবর্মণা
65.4
সারণেন চ বীরেণ নিশঠেনোল্মুকেন চ
বলদেবং পুরস্কৃত্য সুভদ্রাসহিতস্তদা
65.5
দ্রৌপদীমুত্তরাং চৈব পৃথাং চাপ্যবলোককঃ
সমাশ্বাসয়িতুং চাপি ক্ষত্রিয়া নিহতেশ্বরাঃ
65.6
তানাগতান্সমীক্ষ্যৈব ধৃতরাষ্ট্রো মহীপতিঃ
প্রত্যগৃহ্ণাদ্যথান্যায়ং বিদুরশ্চ মহামনাঃ
65.7
তত্রৈব ন্যবসত্কৃষ্ণঃ স্বর্চিতঃ পুরুষর্ষভঃ
বিদুরেণ মহাতেজাস্তথৈব চ যুয়ুত্সুনা
65.8
বসত্সু বৃষ্ণিবীরেষু তত্রাথ জনমেজয়
জজ্ঞে তব পিতা রাজন্পরিক্ষিত্পরবীরহা
65.9
স তু রাজা মহারাজ ব্রহ্মাস্ত্রেণাভিপীডিতঃ
শবো বভূব নিশ্চেষ্টো হর্ষশোকবিবর্ধনঃ
65.10
হৃষ্টানাং সিংহনাদেন জনানাং তত্র নিস্বনঃ
আবিশ্য প্রদিশঃ সর্বাঃ পুনরেব ব্যুপারমৎ
65.11
ততঃ সোঽতিত্বরঃ কৃষ্ণো বিবেশান্তঃপুরং তদা
যুয়ুধানদ্বিতীয়ো বৈ ব্যথিতেন্দ্রিয়মানসঃ
65.12
ততস্ত্বরিতমায়ান্তীং দদর্শ স্বাং পিতৃষ্বসাম্
ক্রোশন্তীমভিধাবেতি বাসুদেবং পুনঃ পুনঃ
65.13
পৃষ্ঠতো দ্রৌপদীং চৈব সুভদ্রাং চ যশস্বিনীম্
সবিক্রোশং সকরুণং বান্ধবানাং স্ত্রিয়ো নৃপ
65.14
ততঃ কৃষ্ণং সমাসাদ্য কুন্তী রাজসুতা তদা
প্রোবাচ রাজশার্দূল বাষ্পগদ্গদয়া গিরা
65.15
বাসুদেব মহাবাহো সুপ্রজা দেবকী ত্বয়া
ত্বং নো গতিঃ প্রতিষ্ঠা চ ত্বদায়ত্তমিদং কুলম্
65.16
যদুপ্রবীর যোঽয়ং তে স্বস্রীয়স্যাত্মজঃ প্রভো
অশ্বত্থাম্না হতো জাতস্তমুজ্জীবয় কেশব
65.17
ত্বয়া হ্যেতত্প্রতিজ্ঞাতমৈষীকে যদুনন্দন
অহং সংজীবয়িষ্যামি মৃতং জাতমিতি প্রভো
65.18
সোঽয়ং জাতো মৃতস্তাত পশ্যৈনং পুরুষর্ষভ
উত্তরাং চ সুভদ্রাং চ দ্রৌপদীং মাং চ মাধব
65.19
ধর্মপুত্রং চ ভীমং চ ফল্গুনং নকুলং তথা
সহদেবং চ দুর্ধর্ষ সর্বান্নস্ত্রাতুমর্হসি
65.20
অস্মিন্প্রাণাঃ সমায়ত্তাঃ পাণ্ডবানাং মমৈব চ
পাণ্ডোশ্চ পিণ্ডো দাশার্হ তথৈব শ্বশুরস্য মে
65.21
অভিমন্যোশ্চ ভদ্রং তে প্রিয়স্য সদৃশস্য চ
প্রিয়মুত্পাদয়াদ্য ত্বং প্রেতস্যাপি জনার্দন
65.22
উত্তরা হি প্রিয়োক্তং বৈ কথয়ত্যরিসূদন
অভিমন্যোর্বচঃ কৃষ্ণ প্রিয়ত্বাত্তে ন সংশয়ঃ
65.23
অব্রবীত্কিল দাশার্হ বৈরাটীমার্জুনিঃ পুরা
মাতুলস্য কুলং ভদ্রে তব পুত্রো গমিষ্যতি
65.24
গত্বা বৃষ্ণ্যন্ধককুলং ধনুর্বেদং গ্রহীষ্যতি
অস্ত্রাণি চ বিচিত্রাণি নীতিশাস্ত্রং চ কেবলম্
65.25
ইত্যেতত্প্রণয়াত্তাত সৌভদ্রঃ পরবীরহা
কথয়ামাস দুর্ধর্ষস্তথা চৈতন্ন সংশয়ঃ
65.26
তাস্ত্বাং বয়ং প্রণম্যেহ যাচামো মধুসূদন
কুলস্যাস্য হিতার্থং ত্বং কুরু কল্যাণমুত্তমম্
65.27
এবমুক্ত্বা তু বার্ষ্ণেয়ং পৃথা পৃথুললোচনা
উচ্ছ্রিত্য বাহূ দুঃখার্তা তাশ্চান্যাঃ প্রাপতন্ভুবি
65.28
অব্রুবংশ্চ মহারাজ সর্বাঃ সাস্রাবিলেক্ষণাঃ
স্বস্রীয়ো বাসুদেবস্য মৃতো জাত ইতি প্রভো
65.29
এবমুক্তে ততঃ কুন্তীং প্রত্যগৃহ্ণাজ্জনার্দনঃ
ভূমৌ নিপতিতাং চৈনাং সান্ত্বয়ামাস ভারত