অধ্যায় 66

66.1

বৈশংপায়ন উবাচ
উত্থিতায়াং পৃথায়াং তু সুভদ্রা ভ্রাতরং তদা
দৃষ্ট্বা চুক্রোশ দুঃখার্তা বচনং চেদমব্রবীৎ

পুণ্ডরীকাক্ষ পশ্যস্ব পৌত্রং পার্থস্য ধীমতঃ
পরিক্ষীণেষু কুরুষু পরিক্ষীণং গতায়ুষম্

ইষীকা দ্রোণপুত্রেণ ভীমসেনার্থমুদ্যতা
সোত্তরায়াং নিপতিতা বিজয়ে ময়ি চৈব হ

সেয়ং জ্বলন্তী হৃদয়ে ময়ি তিষ্ঠতি কেশব
যন্ন পশ্যামি দুর্ধর্ষ মম পুত্রসুতং বিভো

কিং নু বক্ষ্যতি ধর্মাত্মা ধর্মরাজো যুধিষ্ঠিরঃ
ভীমসেনার্জুনৌ চাপি মাদ্রবত্যাঃ সুতৌ চ তৌ

শ্রুত্বাভিমন্যোস্তনয়ং জাতং চ মৃতমেব চ
মুষিতা ইব বার্ষ্ণেয় দ্রোণপুত্রেণ পাণ্ডবাঃ

অভিমন্যুঃ প্রিয়ঃ কৃষ্ণ পিতৄণাং নাত্র সংশয়ঃ
তে শ্রুত্বা কিং নু বক্ষ্যন্তি দ্রোণপুত্রাস্ত্রনির্জিতাঃ

ভবিতাতঃ পরং দুঃখং কিং নু মন্যে জনার্দন
অভিমন্যোঃ সুতাত্কৃষ্ণ মৃতাজ্জাতাদরিংদম

সাহং প্রসাদয়ে কৃষ্ণ ত্বামদ্য শিরসা নতা
পৃথেয়ং দ্রৌপদী চৈব তাঃ পশ্য পুরুষোত্তম

যদা দ্রোণসুতো গর্ভান্পাণ্ডূনাং হন্তি মাধব
তদা কিল ত্বয়া দ্রৌণিঃ ক্রুদ্ধেনোক্তোঽরিমর্দন

অকামং ত্বা করিষ্যামি ব্রহ্মবন্ধো নরাধম
অহং সংজীবয়িষ্যামি কিরীটিতনয়াত্মজম্

ইত্যেতদ্বচনং শ্রুত্বা জানমানা বলং তব
প্রসাদয়ে ত্বা দুর্ধর্ষ জীবতামভিমন্যুজঃ

যদ্যেবং ত্বং প্রতিশ্রুত্য ন করোষি বচঃ শুভম্
সফলং বৃষ্ণিশার্দূল মৃতাং মামুপধারয়

অভিমন্যোঃ সুতো বীর ন সংজীবতি যদ্যয়ম্
জীবতি ত্বয়ি দুর্ধর্ষ কিং করিষ্যাম্যহং ত্বয়া

সংজীবয়ৈনং দুর্ধর্ষ মৃতং ত্বমভিমন্যুজম্
সদৃশাক্ষসুতং বীর সস্যং বর্ষন্নিবাম্বুদঃ

ত্বং হি কেশব ধর্মাত্মা সত্যবান্সত্যবিক্রমঃ
স তাং বাচমৃতাং কর্তুমর্হসি ত্বমরিংদম

ইচ্ছন্নপি হি লোকাংস্ত্রীঞ্জীবয়েথা মৃতানিমান্
কিং পুনর্দয়িতং জাতং স্বস্রীয়স্যাত্মজং মৃতম্

প্রভাবজ্ঞাস্মি তে কৃষ্ণ তস্মাদেতদ্ব্রবীমি তে
কুরুষ্ব পাণ্ডুপুত্রাণামিমং পরমনুগ্রহম্

স্বসেতি বা মহাবাহো হতপুত্রেতি বা পুনঃ
প্রপন্না মামিয়ং বেতি দয়াং কর্তুমিহার্হসি