Utshovঅধ্যায় 67
67.1
বৈশংপায়ন উবাচ
এবমুক্তস্তু রাজেন্দ্র কেশিহা দুঃখমূর্ছিতঃ
তথেতি ব্যাজহারোচ্চৈর্হ্লাদয়ন্নিব তং জনম্
67.2
বাক্যেন তেন হি তদা তং জনং পুরুষর্ষভঃ
হ্লাদয়ামাস স বিভুর্ঘর্মার্তং সলিলৈরিব
67.3
ততঃ স প্রাবিশত্তূর্ণং জন্মবেশ্ম পিতুস্তব
অর্চিতং পুরুষব্যাঘ্র সিতৈর্মাল্যৈর্যথাবিধি
67.4
অপাং কুম্ভৈঃ সুপূর্ণৈশ্চ বিন্যস্তৈঃ সর্বতোদিশম্
ঘৃতেন তিন্দুকালাতৈঃ সর্ষপৈশ্চ মহাভুজ
67.5
শস্ত্রৈশ্চ বিমলৈর্ন্যস্তৈঃ পাবকৈশ্চ সমন্ততঃ
বৃদ্ধাভিশ্চাভিরামাভিঃ পরিচারার্থমচ্যুতঃ
67.6
দক্ষৈশ্চ পরিতো বীর ভিষগ্ভিঃ কুশলৈস্তথা
দদর্শ চ স তেজস্বী রক্ষোঘ্নান্যপি সর্বশঃ
দ্রব্যাণি স্থাপিতানি স্ম বিধিবত্কুশলৈর্জনৈঃ
67.7
তথায়ুক্তং চ তদ্দৃষ্ট্বা জন্মবেশ্ম পিতুস্তব
হৃষ্টোঽভবদ্ধৃষীকেশঃ সাধু সাধ্বিতি চাব্রবীৎ
67.8
তথা ব্রুবতি বার্ষ্ণেয়ে প্রহৃষ্টবদনে তদা
দ্রৌপদী ত্বরিতা গত্বা বৈরাটীং বাক্যমব্রবীৎ
67.9
অয়মায়াতি তে ভদ্রে শ্বশুরো মধুসূদনঃ
পুরাণর্ষিরচিন্ত্যাত্মা সমীপমপরাজিতঃ
67.10
সাপি বাষ্পকলাং বাচং নিগৃহ্যাশ্রূণি চৈব হ
সুসংবীতাভবদ্দেবী দেববত্কৃষ্ণমীক্ষতী
67.11
সা তথা দূয়মানেন হৃদয়েন তপস্বিনী
দৃষ্ট্বা গোবিন্দমায়ান্তং কৃপণং পর্যদেবয়ৎ
67.12
পুণ্ডরীকাক্ষ পশ্যস্ব বালাবিহ বিনাকৃতৌ
অভিমন্যুং চ মাং চৈব হতৌ তুল্যং জনার্দন
67.13
বার্ষ্ণেয় মধুহন্বীর শিরসা ত্বাং প্রসাদয়ে
দ্রোণপুত্রাস্ত্রনির্দগ্ধং জীবয়ৈনং মমাত্মজম্
67.14
যদি স্ম ধর্মরাজ্ঞা বা ভীমসেনেন বা পুনঃ
ত্বয়া বা পুণ্ডরীকাক্ষ বাক্যমুক্তমিদং ভবেৎ
67.15
অজানতীমিষীকেয়ং জনিত্রীং হন্ত্বিতি প্রভো
অহমেব বিনষ্টা স্যাং নেদমেবংগতং ভবেৎ
67.16
গর্ভস্থস্যাস্য বালস্য ব্রহ্মাস্ত্রেণ নিপাতনম্
কৃত্বা নৃশংসং দুর্বুদ্ধির্দ্রৌণিঃ কিং ফলমশ্নুতে
67.17
সা ত্বা প্রসাদ্য শিরসা যাচে শত্রুনিবর্হণ
প্রাণাংস্ত্যক্ষ্যামি গোবিন্দ নায়ং সংজীবতে যদি
67.18
অস্মিন্হি বহবঃ সাধো যে মমাসন্মনোরথাঃ
তে দ্রোণপুত্রেণ হতাঃ কিং নু জীবামি কেশব
67.19
আসীন্মম মতিঃ কৃষ্ণ পূর্ণোত্সঙ্গা জনার্দন
অভিবাদয়িষ্যে দিষ্ট্যেতি তদিদং বিতথীকৃতম্
67.20
চপলাক্ষস্য দায়াদে মৃতেঽস্মিন্পুরুষর্ষভ
বিফলা মে কৃতাঃ কৃষ্ণ হৃদি সর্বে মনোরথাঃ
67.21
চপলাক্ষঃ কিলাতীব প্রিয়স্তে মধুসূদন
সুতং পশ্যস্ব তস্যেমং ব্রহ্মাস্ত্রেণ নিপাতিতম্
67.22
কৃতঘ্নোঽয়ং নৃশংসোঽয়ং যথাস্য জনকস্তথা
যঃ পাণ্ডবীং শ্রিয়ং ত্যক্ত্বা গতোঽদ্য যমসাদনম্
67.23
ময়া চৈতত্প্রতিজ্ঞাতং রণমূর্ধনি কেশব
অভিমন্যৌ হতে বীর ত্বামেষ্যাম্যচিরাদিতি
67.24
তচ্চ নাকরবং কৃষ্ণ নৃশংসা জীবিতপ্রিয়া
ইদানীমাগতাং তত্র কিং নু বক্ষ্যতি ফাল্গুনিঃ