Utshovঅধ্যায় 68
68.1
বৈশংপায়ন উবাচ
সৈবং বিলপ্য করুণং সোন্মাদেব তপস্বিনী
উত্তরা ন্যপতদ্ভূমৌ কৃপণা পুত্রগৃদ্ধিনী
68.2
তাং তু দৃষ্ট্বা নিপতিতাং হতবন্ধুপরিচ্ছদাম্
চুক্রোশ কুন্তী দুঃখার্তা সর্বাশ্চ ভরতস্ত্রিয়ঃ
68.3
মুহূর্তমিব তদ্রাজন্পাণ্ডবানাং নিবেশনম্
অপ্রেক্ষণীয়মভবদার্তস্বরনিনাদিতম্
68.4
সা মুহূর্তং চ রাজেন্দ্র পুত্রশোকাভিপীডিতা
কশ্মলাভিহতা বীর বৈরাটী ত্বভবত্তদা
68.5
প্রতিলভ্য তু সা সংজ্ঞামুত্তরা ভরতর্ষভ
অঙ্কমারোপ্য তং পুত্রমিদং বচনমব্রবীৎ
68.6
ধর্মজ্ঞস্য সুতঃ সংস্ত্বমধর্মমববুধ্যসে
যস্ত্বং বৃষ্ণিপ্রবীরস্য কুরুষে নাভিবাদনম্
68.7
পুত্র গত্বা মম বচো ব্রূয়াস্ত্বং পিতরং তব
দুর্মরং প্রাণিনাং বীর কালে প্রাপ্তে কথংচন
68.8
যাহং ত্বয়া বিহীনাদ্য পত্যা পুত্রেণ চৈব হ
মর্তব্যে সতি জীবামি হতস্বস্তিরকিংচনা
68.9
অথ বা ধর্মরাজ্ঞাহমনুজ্ঞাতা মহাভুজ
ভক্ষয়িষ্যে বিষং তীক্ষ্ণং প্রবেক্ষ্যে বা হুতাশনম্
68.10
অথ বা দুর্মরং তাত যদিদং মে সহস্রধা
পতিপুত্রবিহীনায়া হৃদয়ং ন বিদীর্যতে
68.11
উত্তিষ্ঠ পুত্র পশ্যেমাং দুঃখিতাং প্রপিতামহীম্
আর্তামুপপ্লুতাং দীনাং নিমগ্নাং শোকসাগরে
68.12
আর্যাং চ পশ্য পাঞ্চালীং সাত্বতীং চ তপস্বিনীম্
মাং চ পশ্য সুদুঃখার্তাং ব্যাধবিদ্ধাং মৃগীমিব
68.13
উত্তিষ্ঠ পশ্য বদনং লোকনাথস্য ধীমতঃ
পুণ্ডরীকপলাশাক্ষং পুরেব চপলেক্ষণম্
68.14
এবং বিপ্রলপন্তীং তু দৃষ্ট্বা নিপতিতাং পুনঃ
উত্তরাং তাঃ স্ত্রিয়ঃ সর্বাঃ পুনরুত্থাপয়ন্ত্যুত
68.15
উত্থায় তু পুনর্ধৈর্যাত্তদা মত্স্যপতেঃ সুতা
প্রাঞ্জলিঃ পুণ্ডরীকাক্ষং ভূমাবেবাভ্যবাদয়ৎ
68.16
শ্রুত্বা স তস্যা বিপুলং বিলাপং পুরুষর্ষভঃ
উপস্পৃশ্য ততঃ কৃষ্ণো ব্রহ্মাস্ত্রং সংজহার তৎ
68.17
প্রতিজজ্ঞে চ দাশার্হস্তস্য জীবিতমচ্যুতঃ
অব্রবীচ্চ বিশুদ্ধাত্মা সর্বং বিশ্রাবয়ঞ্জগৎ
68.18
ন ব্রবীম্যুত্তরে মিথ্যা সত্যমেতদ্ভবিষ্যতি
এষ সংজীবয়াম্যেনং পশ্যতাং সর্বদেহিনাম্
68.19
নোক্তপূর্বং ময়া মিথ্যা স্বৈরেষ্বপি কদাচন
ন চ যুদ্ধে পরাবৃত্তস্তথা সংজীবতাময়ম্
68.20
যথা মে দয়িতো ধর্মো ব্রাহ্মণাশ্চ বিশেষতঃ
অভিমন্যোঃ সুতো জাতো মৃতো জীবত্বয়ং তথা
68.21
যথাহং নাভিজানামি বিজয়েন কদাচন
বিরোধং তেন সত্যেন মৃতো জীবত্বয়ং শিশুঃ
68.22
যথা সত্যং চ ধর্মশ্চ ময়ি নিত্যং প্রতিষ্ঠিতৌ
তথা মৃতঃ শিশুরয়ং জীবতামভিমন্যুজঃ
68.23
যথা কংসশ্চ কেশী চ ধর্মেণ নিহতৌ ময়া
তেন সত্যেন বালোঽয়ং পুনরুজ্জীবতামিহ
68.24
ইত্যুক্তো বাসুদেবেন স বালো ভরতর্ষভ
শনৈঃ শনৈর্মহারাজ প্রাস্পন্দত সচেতনঃ