অধ্যায় 69

69.1

বৈশংপায়ন উবাচ
ব্রহ্মাস্ত্রং তু যদা রাজন্কৃষ্ণেন প্রতিসংহৃতম্
তদা তদ্বেশ্ম তে পিত্রা তেজসাভিবিদীপিতম্

ততো রক্ষাংসি সর্বাণি নেশুস্ত্যক্ত্বা গৃহং তু তৎ
অন্তরিক্ষে চ বাগাসীত্সাধু কেশব সাধ্বিতি

তদস্ত্রং জ্বলিতং চাপি পিতামহমগাত্তদা
ততঃ প্রাণান্পুনর্লেভে পিতা তব জনেশ্বর
ব্যচেষ্টত চ বালোঽসৌ যথোত্সাহং যথাবলম্

বভূবুর্মুদিতা রাজংস্ততস্তা ভরতস্ত্রিয়ঃ
ব্রাহ্মণান্বাচয়ামাসুর্গোবিন্দস্য চ শাসনাৎ

ততস্তা মুদিতাঃ সর্বাঃ প্রশশংসুর্জনার্দনম্
স্ত্রিয়ো ভরতসিংহানাং নাবং লব্ধ্বেব পারগাঃ

কুন্তী দ্রুপদপুত্রী চ সুভদ্রা চোত্তরা তথা
স্ত্রিয়শ্চান্যা নৃসিংহানাং বভূবুর্হৃষ্টমানসাঃ

তত্র মল্লা নটা ঝল্লা গ্রন্থিকাঃ সৌখশায়িকাঃ
সূতমাগধসংঘাশ্চাপ্যস্তুবন্বৈ জনার্দনম্
কুরুবংশস্তবাখ্যাভিরাশীর্ভির্ভরতর্ষভ

উত্থায় তু যথাকালমুত্তরা যদুনন্দনম্
অভ্যবাদয়ত প্রীতা সহ পুত্রেণ ভারত
ততস্তস্যৈ দদৌ প্রীতো বহুরত্নং বিশেষতঃ

তথান্যে বৃষ্ণিশার্দূলা নাম চাস্যাকরোত্প্রভুঃ
পিতুস্তব মহারাজ সত্যসংধো জনার্দনঃ

পরিক্ষীণে কুলে যস্মাজ্জাতোঽয়মভিমন্যুজঃ
পরিক্ষিদিতি নামাস্য ভবত্বিত্যব্রবীত্তদা

সোঽবর্ধত যথাকালং পিতা তব নরাধিপ
মনঃপ্রহ্লাদনশ্চাসীত্সর্বলোকস্য ভারত

মাসজাতস্তু তে বীর পিতা ভবতি ভারত
অথাজগ্মুঃ সুবহুলং রত্নমাদায় পাণ্ডবাঃ

তান্সমীপগতাঞ্শ্রুত্বা নির্যয়ুর্বৃষ্ণিপুংগবাঃ
অলংচক্রুশ্চ মাল্যৌঘৈঃ পুরুষা নাগসাহ্বয়ম্

পতাকাভির্বিচিত্রাভির্ধ্বজৈশ্চ বিবিধৈরপি
বেশ্মানি সমলংচক্রুঃ পৌরাশ্চাপি জনাধিপ

দেবতায়তনানাং চ পূজা বহুবিধাস্তথা
সংদিদেশাথ বিদুরঃ পাণ্ডুপুত্রপ্রিয়েপ্সয়া

রাজমার্গাশ্চ তত্রাসন্সুমনোভিরলংকৃতাঃ
শুশুভে তত্পুরং চাপি সমুদ্রৌঘনিভস্বনম্

নর্তকৈশ্চাপি নৃত্যদ্ভির্গায়নানাং চ নিস্বনৈঃ
আসীদ্বৈশ্রবণস্যেব নিবাসস্তত্পুরং তদা

বন্দিভিশ্চ নরৈ রাজন্স্ত্রীসহায়ৈঃ সহস্রশঃ
তত্র তত্র বিবিক্তেষু সমন্তাদুপশোভিতম্

পতাকা ধূয়মানাশ্চ শ্বসতা মাতরিশ্বনা
অদর্শয়ন্নিব তদা কুরূন্বৈ দক্ষিণোত্তরান্

অঘোষয়ত্তদা চাপি পুরুষো রাজধূর্গতঃ
সর্বরাত্রিবিহারোঽদ্য রত্নাভরণলক্ষণঃ