অধ্যায় 70

70.1

বৈশংপায়ন উবাচ
তান্সমীপগতাঞ্শ্রুত্বা পাণ্ডবাঞ্শত্রুকর্শনঃ
বাসুদেবঃ সহামাত্যঃ প্রত্যুদ্যাতো দিদৃক্ষয়া

70.2

তে সমেত্য যথান্যায়ং পাণ্ডবা বৃষ্ণিভিঃ সহ
বিবিশুঃ সহিতা রাজন্পুরং বারণসাহ্বয়ম্

70.3

মহতস্তস্য সৈন্যস্য খুরনেমিস্বনেন চ
দ্যাবাপৃথিব্যৌ খং চৈব শব্দেনাসীত্সমাবৃতম্

70.4

তে কোশমগ্রতঃ কৃত্বা বিবিশুঃ স্বপুরং তদা
পাণ্ডবাঃ প্রীতমনসঃ সামাত্যাঃ সসুহৃদ্গণাঃ

70.5

তে সমেত্য যথান্যায়ং ধৃতরাষ্ট্রং জনাধিপম্
কীর্তয়ন্তঃ স্বনামানি তস্য পাদৌ ববন্দিরে

70.6

ধৃতরাষ্ট্রাদনু চ তে গান্ধারীং সুবলাত্মজাম্
কুন্তীং চ রাজশার্দূল তদা ভরতসত্তমাঃ

70.7

বিদুরং পূজয়িত্বা চ বৈশ্যাপুত্রং সমেত্য চ
পূজ্যমানাঃ স্ম তে বীরা ব্যরাজন্ত বিশাং পতে

70.8

ততস্তত্পরমাশ্চর্যং বিচিত্রং মহদদ্ভুতম্
শুশ্রুবুস্তে তদা বীরাঃ পিতুস্তে জন্ম ভারত

70.9

তদুপশ্রুত্য তে কর্ম বাসুদেবস্য ধীমতঃ
পূজার্হং পূজয়ামাসুঃ কৃষ্ণং দেবকিনন্দনম্

70.10

ততঃ কতিপয়াহস্য ব্যাসঃ সত্যবতীসুতঃ
আজগাম মহাতেজা নগরং নাগসাহ্বয়ম্

70.11

তস্য সর্বে যথান্যায়ং পূজাং চক্রুঃ কুরূদ্বহাঃ
সহ বৃষ্ণ্যন্ধকব্যাঘ্রৈরুপাসাং চক্রিরে তদা

70.12

তত্র নানাবিধাকারাঃ কথাঃ সমনুকীর্ত্য বৈ
যুধিষ্ঠিরো ধর্মসুতো ব্যাসং বচনমব্রবীৎ

70.13

ভবত্প্রসাদাদ্ভগবন্যদিদং রত্নমাহৃতম্
উপয়োক্তুং তদিচ্ছামি বাজিমেধে মহাক্রতৌ

70.14

তদনুজ্ঞাতুমিচ্ছামি ভবতা মুনিসত্তম
ত্বদধীনা বয়ং সর্বে কৃষ্ণস্য চ মহাত্মনঃ

70.15

ব্যাস উবাচ
অনুজানামি রাজংস্ত্বাং ক্রিয়তাং যদনন্তরম্
যজস্ব বাজিমেধেন বিধিবদ্দক্ষিণাবতা

70.16

অশ্বমেধো হি রাজেন্দ্র পাবনঃ সর্বপাপ্মনাম্
তেনেষ্ট্বা ত্বং বিপাপ্মা বৈ ভবিতা নাত্র সংশয়ঃ

70.17

বৈশংপায়ন উবাচ
ইত্যুক্তঃ স তু ধর্মাত্মা কুরুরাজো যুধিষ্ঠিরঃ
অশ্বমেধস্য কৌরব্য চকারাহরণে মতিম্

70.18

সমনুজ্ঞাপ্য তু স তং কৃষ্ণদ্বৈপায়নং নৃপঃ
বাসুদেবমথামন্ত্র্য বাগ্মী বচনমব্রবীৎ

70.19

দেবকী সুপ্রজা দেবী ত্বয়া পুরুষসত্তম
যদ্ব্রূয়াং ত্বাং মহাবাহো তত্কৃথাস্ত্বমিহাচ্যুত

70.20

ত্বত্প্রভাবার্জিতান্ভোগানশ্নীম যদুনন্দন
পরাক্রমেণ বুদ্ধ্যা চ ত্বয়েয়ং নির্জিতা মহী

70.21

দীক্ষয়স্ব ত্বমাত্মানং ত্বং নঃ পরমকো গুরুঃ
ত্বয়ীষ্টবতি ধর্মজ্ঞ বিপাপ্মা স্যামহং বিভো
ত্বং হি যজ্ঞোঽক্ষরঃ সর্বস্ত্বং ধর্মস্ত্বং প্রজাপতিঃ

70.22

বাসুদেব উবাচ
ত্বমেবৈতন্মহাবাহো বক্তুমর্হস্যরিংদম
ত্বং গতিঃ সর্বভূতানামিতি মে নিশ্চিতা মতিঃ

70.23

ত্বং চাদ্য কুরুবীরাণাং ধর্মেণাভিবিরাজসে
গুণভূতাঃ স্ম তে রাজংস্ত্বং নো রাজন্মতো গুরুঃ

70.24

যজস্ব মদনুজ্ঞাতঃ প্রাপ্ত এব ক্রতুর্ময়া
যুনক্তু নো ভবান্কার্যে যত্র বাঞ্ছসি ভারত
সত্যং তে প্রতিজানামি সর্বং কর্তাস্মি তেঽনঘ

70.25

ভীমসেনার্জুনৌ চৈব তথা মাদ্রবতীসুতৌ
ইষ্টবন্তো ভবিষ্যন্তি ত্বয়ীষ্টবতি ভারত

Contains text from DharmicData, made available under the Open Database License (ODbL). Simple meanings are written by AI and can contain mistakes.