Utshovঅধ্যায় 71
71.1
বৈশংপায়ন উবাচ
এবমুক্তস্তু কৃষ্ণেন ধর্মপুত্রো যুধিষ্ঠিরঃ
ব্যাসমামন্ত্র্য মেধাবী ততো বচনমব্রবীৎ
71.2
যথা কালং ভবান্বেত্তি হয়মেধস্য তত্ত্বতঃ
দীক্ষয়স্ব তদা মা ত্বং ত্বয্যায়ত্তো হি মে ক্রতুঃ
71.3
ব্যাস উবাচ
অহং পৈলোঽথ কৌন্তেয় যাজ্ঞবল্ক্যস্তথৈব চ
বিধানং যদ্যথাকালং তত্কর্তারো ন সংশয়ঃ
71.4
চৈত্র্যাং হি পৌর্ণমাস্যাং চ তব দীক্ষা ভবিষ্যতি
সংভারাঃ সংভ্রিয়ন্তাং তে যজ্ঞার্থং পুরুষর্ষভ
71.5
অশ্ববিদ্যাবিদশ্চৈব সূতা বিপ্রাশ্চ তদ্বিদঃ
মেধ্যমশ্বং পরীক্ষন্তাং তব যজ্ঞার্থসিদ্ধয়ে
71.6
তমুত্সৃজ্য যথাশাস্ত্রং পৃথিবীং সাগরাম্বরাম্
স পর্যেতু যশো নাম্না তব পার্থিব বর্ধয়ন্
71.7
বৈশংপায়ন উবাচ
ইত্যুক্তঃ স তথেত্যুক্ত্বা পাণ্ডবঃ পৃথিবীপতিঃ
চকার সর্বং রাজেন্দ্র যথোক্তং ব্রহ্মবাদিনা
সংভারাশ্চৈব রাজেন্দ্র সর্বে সংকল্পিতাভবন্
71.8
স সংভারান্সমাহৃত্য নৃপো ধর্মাত্মজস্তদা
ন্যবেদয়দমেয়াত্মা কৃষ্ণদ্বৈপায়নায় বৈ
71.9
ততোঽব্রবীন্মহাতেজা ব্যাসো ধর্মাত্মজং নৃপম্
যথাকালং যথায়োগং সজ্জাঃ স্ম তব দীক্ষণে
71.10
স্ফ্যশ্চ কূর্চশ্চ সৌবর্ণো যচ্চান্যদপি কৌরব
তত্র যোগ্যং ভবেত্কিংচিত্তদ্রৌক্মং ক্রিয়তামিতি
71.11
অশ্বশ্চোত্সৃজ্যতামদ্য পৃথ্ব্যামথ যথাক্রমম্
সুগুপ্তশ্চ চরত্বেষ যথাশাস্ত্রং যুধিষ্ঠির
71.12
যুধিষ্ঠির উবাচ
অয়মশ্বো ময়া ব্রহ্মন্নুত্সৃষ্টঃ পৃথিবীমিমাম্
চরিষ্যতি যথাকামং তত্র বৈ সংবিধীয়তাম্
71.13
পৃথিবীং পর্যটন্তং হি তুরগং কামচারিণম্
কঃ পালয়েদিতি মুনে তদ্ভবান্বক্তুমর্হতি
71.14
বৈশংপায়ন উবাচ
ইত্যুক্তঃ স তু রাজেন্দ্র কৃষ্ণদ্বৈপায়নোঽব্রবীৎ
ভীমসেনাদবরজঃ শ্রেষ্ঠঃ সর্বধনুষ্মতাম্
71.15
জিষ্ণুঃ সহিষ্ণুর্ধৃষ্ণুশ্চ স এনং পালয়িষ্যতি
শক্তঃ স হি মহীং জেতুং নিবাতকবচান্তকঃ
71.16
তস্মিন্হ্যস্ত্রাণি দিব্যানি দিব্যং সংহননং তথা
দিব্যং ধনুশ্চেষুধী চ স এনমনুয়াস্যতি
71.17
স হি ধর্মার্থকুশলঃ সর্ববিদ্যাবিশারদঃ
যথাশাস্ত্রং নৃপশ্রেষ্ঠ চারয়িষ্যতি তে হয়ম্
71.18
রাজপুত্রো মহাবাহুঃ শ্যামো রাজীবলোচনঃ
অভিমন্যোঃ পিতা বীরঃ স এনমনুয়াস্যতি
71.19
ভীমসেনোঽপি তেজস্বী কৌন্তেয়োঽমিতবিক্রমঃ
সমর্থো রক্ষিতুং রাষ্ট্রং নকুলশ্চ বিশাং পতে
71.20
সহদেবস্তু কৌরব্য সমাধাস্যতি বুদ্ধিমান্
কুটুম্বতন্ত্রং বিধিবত্সর্বমেব মহায়শাঃ
71.21
তত্তু সর্বং যথান্যায়মুক্তং কুরুকুলোদ্বহঃ
চকার ফল্গুনং চাপি সংদিদেশ হয়ং প্রতি
71.22
যুধিষ্ঠির উবাচ
এহ্যর্জুন ত্বয়া বীর হয়োঽয়ং পরিপাল্যতাম্
ত্বমর্হো রক্ষিতুং হ্যেনং নান্যঃ কশ্চন মানবঃ
71.23
যে চাপি ত্বাং মহাবাহো প্রত্যুদীয়ুর্নরাধিপাঃ
তৈর্বিগ্রহো যথা ন স্যাত্তথা কার্যং ত্বয়ানঘ
71.24
আখ্যাতব্যশ্চ ভবতা যজ্ঞোঽয়ং মম সর্বশঃ
পার্থিবেভ্যো মহাবাহো সময়ে গম্যতামিতি
71.25
এবমুক্ত্বা স ধর্মাত্মা ভ্রাতরং সব্যসাচিনম্
ভীমং চ নকুলং চৈব পুরগুপ্তৌ সমাদধৎ
71.26
কুটুম্বতন্ত্রে চ তথা সহদেবং যুধাং পতিম্
অনুমান্য মহীপালং ধৃতরাষ্ট্রং যুধিষ্ঠিরঃ