Utshovঅধ্যায় 72
72.1
বৈশংপায়ন উবাচ
দীক্ষাকালে তু সংপ্রাপ্তে ততস্তে সুমহর্ত্বিজঃ
বিধিবদ্দীক্ষয়ামাসুরশ্বমেধায় পার্থিবম্
72.2
কৃত্বা স পশুবন্ধাংশ্চ দীক্ষিতঃ পাণ্ডুনন্দনঃ
ধর্মরাজো মহাতেজাঃ সহর্ত্বিগ্ভির্ব্যরোচত
72.3
হয়শ্চ হয়মেধার্থং স্বয়ং স ব্রহ্মবাদিনা
উত্সৃষ্টঃ শাস্ত্রবিধিনা ব্যাসেনামিততেজসা
72.4
স রাজা ধর্মজো রাজন্দীক্ষিতো বিবভৌ তদা
হেমমালী রুক্মকণ্ঠঃ প্রদীপ্ত ইব পাবকঃ
72.5
কৃষ্ণাজিনী দণ্ডপাণিঃ ক্ষৌমবাসাঃ স ধর্মজঃ
বিবভৌ দ্যুতিমান্ভূয়ঃ প্রজাপতিরিবাধ্বরে
72.6
তথৈবাস্যর্ত্বিজঃ সর্বে তুল্যবেষা বিশাং পতে
বভূবুরর্জুনশ্চৈব প্রদীপ্ত ইব পাবকঃ
72.7
শ্বেতাশ্বঃ কৃষ্ণসারং তং সসারাশ্বং ধনংজয়ঃ
বিধিবত্পৃথিবীপাল ধর্মরাজস্য শাসনাৎ
72.8
বিক্ষিপন্গাণ্ডিবং রাজন্বদ্ধগোধাঙ্গুলিত্রবান্
তমশ্বং পৃথিবীপাল মুদা যুক্তঃ সসার হ
72.9
আকুমারং তদা রাজন্নাগমত্তত্পুরং বিভো
দ্রষ্টুকামং কুরুশ্রেষ্ঠং প্রয়াস্যন্তং ধনংজয়ম্
72.10
তেষামন্যোন্যসংমর্দাদূষ্মেব সমজায়ত
দিদৃক্ষূণাং হয়ং তং চ তং চৈব হয়সারিণম্
72.11
ততঃ শব্দো মহারাজ দশাশাঃ প্রতিপূরয়ন্
বভূব প্রেক্ষতাং নৄণাং কুন্তীপুত্রং ধনংজয়ম্
72.12
এষ গচ্ছতি কৌন্তেয়স্তুরগশ্চৈব দীপ্তিমান্
যমন্বেতি মহাবাহুঃ সংস্পৃশন্ধনুরুত্তমম্
72.13
এবং শুশ্রাব বদতাং গিরো জিষ্ণুরুদারধীঃ
স্বস্তি তেঽস্তু ব্রজারিষ্টং পুনশ্চৈহীতি ভারত
72.14
অথাপরে মনুষ্যেন্দ্র পুরুষা বাক্যমব্রুবন্
নৈনং পশ্যাম সংমর্দে ধনুরেতত্প্রদৃশ্যতে
72.15
এতদ্ধি ভীমনির্হ্রাদং বিশ্রুতং গাণ্ডিবং ধনুঃ
স্বস্তি গচ্ছত্বরিষ্টং বৈ পন্থানমকুতোভয়ম্
নিবৃত্তমেনং দ্রক্ষ্যামঃ পুনরেবং চ তেঽব্রুবন্
72.16
এবমাদ্যা মনুষ্যাণাং স্ত্রীণাং চ ভরতর্ষভ
শুশ্রাব মধুরা বাচঃ পুনঃ পুনরুদীরিতাঃ
72.17
যাজ্ঞবল্ক্যস্য শিষ্যশ্চ কুশলো যজ্ঞকর্মণি
প্রায়াত্পার্থেন সহিতঃ শান্ত্যর্থং বেদপারগঃ
72.18
ব্রাহ্মণাশ্চ মহীপাল বহবো বেদপারগাঃ
অনুজগ্মুর্মহাত্মানং ক্ষত্রিয়াশ্চ বিশোঽপি চ
72.19
পাণ্ডবৈঃ পৃথিবীমশ্বো নির্জিতামস্ত্রতেজসা
চচার স মহারাজ যথাদেশং স সত্তম
72.20
তত্র যুদ্ধানি বৃত্তানি যান্যাসন্পাণ্ডবস্য হ
তানি বক্ষ্যামি তে বীর বিচিত্রাণি মহান্তি চ
72.21
স হয়ঃ পৃথিবীং রাজন্প্রদক্ষিণমরিংদম
সসারোত্তরতঃ পূর্বং তন্নিবোধ মহীপতে
72.22
অবমৃদ্নন্স রাষ্ট্রাণি পার্থিবানাং হয়োত্তমঃ
শনৈস্তদা পরিয়য়ৌ শ্বেতাশ্বশ্চ মহারথঃ
72.23
তত্র সংকলনা নাস্তি রাজ্ঞাময়ুতশস্তদা
যেঽয়ুধ্যন্ত মহারাজ ক্ষত্রিয়া হতবান্ধবাঃ
72.24
কিরাতা বিকৃতা রাজন্বহবোঽসিধনুর্ধরাঃ
ম্লেচ্ছাশ্চান্যে বহুবিধাঃ পূর্বং বিনিকৃতা রণে
72.25
আর্যাশ্চ পৃথিবীপালাঃ প্রহৃষ্টনরবাহনাঃ
সমীয়ুঃ পাণ্ডুপুত্রেণ বহবো যুদ্ধদুর্মদাঃ
72.26
এবং যুদ্ধানি বৃত্তানি তত্র তত্র মহীপতে
অর্জুনস্য মহীপালৈর্নানাদেশনিবাসিভিঃ
72.27
যানি তূভয়তো রাজন্প্রতপ্তানি মহান্তি চ
তানি যুদ্ধানি বক্ষ্যামি কৌন্তেয়স্য তবানঘ