Utshovঅধ্যায় 73
73.1
বৈশংপায়ন উবাচ
ত্রিগর্তৈরভবদ্যুদ্ধং কৃতবৈরৈঃ কিরীটিনঃ
মহারথসমাজ্ঞাতৈর্হতানাং পুত্রনপ্তৃভিঃ
73.2
তে সমাজ্ঞায় সংপ্রাপ্তং যজ্ঞিয়ং তুরগোত্তমম্
বিষয়ান্তে ততো বীরা দংশিতাঃ পর্যবারয়ন্
73.3
রথিনো বদ্ধতূণীরাঃ সদশ্বৈঃ সমলংকৃতৈঃ
পরিবার্য হয়ং রাজন্গ্রহীতুং সংপ্রচক্রমুঃ
73.4
ততঃ কিরীটী সংচিন্ত্য তেষাং রাজ্ঞাং চিকীর্ষিতম্
বারয়ামাস তান্বীরান্সান্ত্বপূর্বমরিংদমঃ
73.5
তমনাদৃত্য তে সর্বে শরৈরভ্যহনংস্তদা
তমোরজোভ্যাং সংছন্নাংস্তান্কিরীটী ন্যবারয়ৎ
73.6
অব্রবীচ্চ ততো জিষ্ণুঃ প্রহসন্নিব ভারত
নিবর্তধ্বমধর্মজ্ঞাঃ শ্রেয়ো জীবিতমেব বঃ
73.7
স হি বীরঃ প্রয়াস্যন্বৈ ধর্মরাজেন বারিতঃ
হতবান্ধবা ন তে পার্থ হন্তব্যাঃ পার্থিবা ইতি
73.8
স তদা তদ্বচঃ শ্রুত্বা ধর্মরাজস্য ধীমতঃ
তান্নিবর্তধ্বমিত্যাহ ন ন্যবর্তন্ত চাপি তে
73.9
ততস্ত্রিগর্তরাজানং সূর্যবর্মাণমাহবে
বিতত্য শরজালেন প্রজহাস ধনংজয়ঃ
73.10
ততস্তে রথঘোষেণ খুরনেমিস্বনেন চ
পূরয়ন্তো দিশঃ সর্বা ধনংজয়মুপাদ্রবন্
73.11
সূর্যবর্মা ততঃ পার্থে শরাণাং নতপর্বণাম্
শতান্যমুঞ্চদ্রাজেন্দ্র লঘ্বস্ত্রমভিদর্শয়ন্
73.12
তথৈবান্যে মহেষ্বাসা যে তস্যৈবানুয়ায়িনঃ
মুমুচুঃ শরবর্ষাণি ধনংজয়বধৈষিণঃ
73.13
স তাঞ্জ্যাপুঙ্খনির্মুক্তৈর্বহুভিঃ সুবহূঞ্শরান্
চিচ্ছেদ পাণ্ডবো রাজংস্তে ভূমৌ ন্যপতংস্তদা
73.14
কেতুবর্মা তু তেজস্বী তস্যৈবাবরজো যুবা
যুয়ুধে ভ্রাতুরর্থায় পাণ্ডবেন মহাত্মনা
73.15
তমাপতন্তং সংপ্রেক্ষ্য কেতুবর্মাণমাহবে
অভ্যঘ্নন্নিশিতৈর্বাণৈর্বীভত্সুঃ পরবীরহা
73.16
কেতুবর্মণ্যভিহতে ধৃতবর্মা মহারথঃ
রথেনাশু সমাবৃত্য শরৈর্জিষ্ণুমবাকিরৎ
73.17
তস্য তাং শীঘ্রতামীক্ষ্য তুতোষাতীব বীর্যবান্
গুডাকেশো মহাতেজা বালস্য ধৃতবর্মণঃ
73.18
ন সংদধানং দদৃশে নাদদানং চ তং তদা
কিরন্তমেব স শরান্দদৃশে পাকশাসনিঃ
73.19
স তু তং পূজয়ামাস ধৃতবর্মাণমাহবে
মনসা স মুহূর্তং বৈ রণে সমভিহর্ষয়ন্
73.20
তং পন্নগমিব ক্রুদ্ধং কুরুবীরঃ স্ময়ন্নিব
প্রীতিপূর্বং মহারাজ প্রাণৈর্ন ব্যপরোপয়ৎ
73.21
স তথা রক্ষ্যমাণো বৈ পার্থেনামিততেজসা
ধৃতবর্মা শরং তীক্ষ্ণং মুমোচ বিজয়ে তদা
73.22
স তেন বিজয়স্তূর্ণমস্যন্বিদ্ধঃ করে ভৃশম্
মুমোচ গাণ্ডীবং দুঃখাত্তত্পপাতাথ ভূতলে
73.23
ধনুষঃ পততস্তস্য সব্যসাচিকরাদ্বিভো
ইন্দ্রস্যেবায়ুধস্যাসীদ্রূপং ভরতসত্তম
73.24
তস্মিন্নিপতিতে দিব্যে মহাধনুষি পার্থিব
জহাস সস্বনং হাসং ধৃতবর্মা মহাহবে
73.25
ততো রোষান্বিতো জিষ্ণুঃ প্রমৃজ্য রুধিরং করাৎ
ধনুরাদত্ত তদ্দিব্যং শরবর্ষং ববর্ষ চ
73.26
ততো হলহলাশব্দো দিবস্পৃগভবত্তদা
নানাবিধানাং ভূতানাং তত্কর্মাতীব শংসতাম্
73.27
ততঃ সংপ্রেক্ষ্য তং ক্রুদ্ধং কালান্তকয়মোপমম্
জিষ্ণুং ত্রৈগর্তকা যোধাস্ত্বরিতাঃ পর্যবারয়ন্
73.28
অভিসৃত্য পরীপ্সার্থং ততস্তে ধৃতবর্মণঃ
পরিবব্রুর্গুডাকেশং তত্রাক্রুধ্যদ্ধনংজয়ঃ
73.29
ততো যোধাঞ্জঘানাশু তেষাং স দশ চাষ্ট চ
মহেন্দ্রবজ্রপ্রতিমৈরায়সৈর্নিশিতৈঃ শরৈঃ
73.30
তাংস্তু প্রভগ্নান্সংপ্রেক্ষ্য ত্বরমাণো ধনংজয়ঃ
শরৈরাশীবিষাকারৈর্জঘান স্বনবদ্ধসন্
73.31
তে ভগ্নমনসঃ সর্বে ত্রৈগর্তকমহারথাঃ
দিশো বিদুদ্রুবুঃ সর্বা ধনংজয়শরার্দিতাঃ
73.32
ত ঊচুঃ পুরুষব্যাঘ্রং সংশপ্তকনিষূদনম্
তব স্ম কিংকরাঃ সর্বে সর্বে চ বশগাস্তব
73.33
আজ্ঞাপয়স্ব নঃ পার্থ প্রহ্বান্প্রেষ্যানবস্থিতান্
করিষ্যামঃ প্রিয়ং সর্বং তব কৌরবনন্দন
73.34
এতদাজ্ঞায় বচনং সর্বাংস্তানব্রবীত্তদা
জীবিতং রক্ষত নৃপাঃ শাসনং গৃহ্যতামিতি