অধ্যায় 74

74.1

বৈশংপায়ন উবাচ
প্রাগ্জ্যোতিষমথাভ্যেত্য ব্যচরত্স হয়োত্তমঃ
ভগদত্তাত্মজস্তত্র নির্যয়ৌ রণকর্কশঃ

স হয়ং পাণ্ডুপুত্রস্য বিষয়ান্তমুপাগতম্
যুয়ুধে ভরতশ্রেষ্ঠ বজ্রদত্তো মহীপতিঃ

সোঽভিনির্যায় নগরাদ্ভগদত্তসুতো নৃপঃ
অশ্বমায়ান্তমুন্মথ্য নগরাভিমুখো যয়ৌ

তমালক্ষ্য মহাবাহুঃ কুরূণামৃষভস্তদা
গাণ্ডীবং বিক্ষিপংস্তূর্ণং সহসা সমুপাদ্রবৎ

ততো গাণ্ডীবনির্মুক্তৈরিষুভির্মোহিতো নৃপঃ
হয়মুত্সৃজ্য তং বীরস্ততঃ পার্থমুপাদ্রবৎ

পুনঃ প্রবিশ্য নগরং দংশিতঃ স নৃপোত্তমঃ
আরুহ্য নাগপ্রবরং নির্যয়ৌ যুদ্ধকাঙ্ক্ষয়া

পাণ্ডুরেণাতপত্রেণ ধ্রিয়মাণেন মূর্ধনি
দোধূয়তা চামরেণ শ্বেতেন চ মহারথঃ

ততঃ পার্থং সমাসাদ্য পাণ্ডবানাং মহারথম্
আহ্বয়ামাস কৌরব্যং বাল্যান্মোহাচ্চ সংয়ুগে

স বারণং নগপ্রখ্যং প্রভিন্নকরটামুখম্
প্রেষয়ামাস সংক্রুদ্ধস্ততঃ শ্বেতহয়ং প্রতি

বিক্ষরন্তং যথা মেঘং পরবারণবারণম্
শাস্ত্রবত্কল্পিতং সংখ্যে ত্রিসাহং যুদ্ধদুর্মদম্

প্রচোদ্যমানঃ স গজস্তেন রাজ্ঞা মহাবলঃ
তদাঙ্কুশেন বিবভাবুত্পতিষ্যন্নিবাম্বরম্

তমাপতন্তং সংপ্রেক্ষ্য ক্রুদ্ধো রাজন্ধনংজয়ঃ
ভূমিষ্ঠো বারণগতং যোধয়ামাস ভারত

বজ্রদত্তস্তু সংক্রুদ্ধো মুমোচাশু ধনংজয়ে
তোমরানগ্নিসংকাশাঞ্শলভানিব বেগিতান্

অর্জুনস্তানসংপ্রাপ্তান্গাণ্ডীবপ্রেষিতৈঃ শরৈঃ
দ্বিধা ত্রিধা চ চিচ্ছেদ খ এব খগমৈস্তদা

স তান্দৃষ্ট্বা তথা ছিন্নাংস্তোমরান্ভগদত্তজঃ
ইষূনসক্তাংস্ত্বরিতঃ প্রাহিণোত্পাণ্ডবং প্রতি

ততোঽর্জুনস্তূর্ণতরং রুক্মপুঙ্খানজিহ্মগান্
প্রেষয়ামাস সংক্রুদ্ধো ভগদত্তাত্মজং প্রতি

স তৈর্বিদ্ধো মহাতেজা বজ্রদত্তো মহাহবে
ভৃশাহতঃ পপাতোর্ব্যাং ন ত্বেনমজহাত্স্মৃতিঃ

ততঃ স পুনরারুহ্য বারণপ্রবরং রণে
অব্যগ্রঃ প্রেষয়ামাস জয়ার্থী বিজয়ং প্রতি

তস্মৈ বাণাংস্ততো জিষ্ণুর্নির্মুক্তাশীবিষোপমান্
প্রেষয়ামাস সংক্রুদ্ধো জ্বলিতানিব পাবকান্

স তৈর্বিদ্ধো মহানাগো বিস্রবন্রুধিরং বভৌ
হিমবানিব শৈলেন্দ্রো বহুপ্রস্রবণস্তদা