Utshovঅধ্যায় 75
75.1
বৈশংপায়ন উবাচ
এবং ত্রিরাত্রমভবত্তদ্যুদ্ধং ভরতর্ষভ
অর্জুনস্য নরেন্দ্রেণ বৃত্রেণেব শতক্রতোঃ
75.2
ততশ্চতুর্থে দিবসে বজ্রদত্তো মহাবলঃ
জহাস সস্বনং হাসং বাক্যং চেদমথাব্রবীৎ
75.3
অর্জুনার্জুন তিষ্ঠস্ব ন মে জীবন্বিমোক্ষ্যসে
ত্বাং নিহত্য করিষ্যামি পিতুস্তোয়ং যথাবিধি
75.4
ত্বয়া বৃদ্ধো মম পিতা ভগদত্তঃ পিতুঃ সখা
হতো বৃদ্ধোঽপচায়িত্বাচ্ছিশুং মামদ্য যোধয়
75.5
ইত্যেবমুক্ত্বা সংক্রুদ্ধো বজ্রদত্তো নরাধিপঃ
প্রেষয়ামাস কৌরব্য বারণং পাণ্ডবং প্রতি
75.6
সংপ্রেষ্যমাণো নাগেন্দ্রো বজ্রদত্তেন ধীমতা
উত্পতিষ্যন্নিবাকাশমভিদুদ্রাব পাণ্ডবম্
75.7
অগ্রহস্তপ্রমুক্তেন শীকরেণ স ফল্গুনম্
সমুক্ষত মহারাজ শৈলং নীল ইবাম্বুদঃ
75.8
স তেন প্রেষিতো রাজ্ঞা মেঘবন্নিনদন্মুহুঃ
মুখাডম্বরঘোষেণ সমাদ্রবত ফল্গুনম্
75.9
স নৃত্যন্নিব নাগেন্দ্রো বজ্রদত্তপ্রচোদিতঃ
আসসাদ দ্রুতং রাজন্কৌরবাণাং মহারথম্
75.10
তমাপতন্তং সংপ্রেক্ষ্য বজ্রদত্তস্য বারণম্
গাণ্ডীবমাশ্রিত্য বলী ন ব্যকম্পত শত্রুহা
75.11
চুক্রোধ বলবচ্চাপি পাণ্ডবস্তস্য ভূপতেঃ
কার্যবিঘ্নমনুস্মৃত্য পূর্ববৈরং চ ভারত
75.12
ততস্তং বারণং ক্রুদ্ধঃ শরজালেন পাণ্ডবঃ
নিবারয়ামাস তদা বেলেব মকরালয়ম্
75.13
স নাগপ্রবরো বীর্যাদর্জুনেন নিবারিতঃ
তস্থৌ শরৈর্বিতুন্নাঙ্গঃ শ্বাবিচ্ছললিতো যথা
75.14
নিবারিতং গজং দৃষ্ট্বা ভগদত্তাত্মজো নৃপঃ
উত্সসর্জ শিতান্বাণানর্জুনে ক্রোধমূর্ছিতঃ
75.15
অর্জুনস্তু মহারাজ শরৈঃ শরবিঘাতিভিঃ
বারয়ামাস তানস্তাংস্তদদ্ভুতমিবাভবৎ
75.16
ততঃ পুনরতিক্রুদ্ধো রাজা প্রাগ্জ্যোতিষাধিপঃ
প্রেষয়ামাস নাগেন্দ্রং বলবচ্ছ্বসনোপমম্
75.17
তমাপতন্তং সংপ্রেক্ষ্য বলবান্পাকশাসনিঃ
নারাচমগ্নিসংকাশং প্রাহিণোদ্বারণং প্রতি
75.18
স তেন বারণো রাজন্মর্মণ্যভিহতো ভৃশম্
পপাত সহসা ভূমৌ বজ্ররুগ্ণ ইবাচলঃ
75.19
স পতঞ্শুশুভে নাগো ধনংজয়শরাহতঃ
বিশন্নিব মহাশৈলো মহীং বজ্রপ্রপীডিতঃ
75.20
তস্মিন্নিপতিতে নাগে বজ্রদত্তস্য পাণ্ডবঃ
তং ন ভেতব্যমিত্যাহ ততো ভূমিগতং নৃপম্
75.21
অব্রবীদ্ধি মহাতেজাঃ প্রস্থিতং মাং যুধিষ্ঠিরঃ
রাজানস্তে ন হন্তব্যা ধনংজয় কথংচন
75.22
সর্বমেতন্নরব্যাঘ্র ভবত্বেতাবতা কৃতম্
যোধাশ্চাপি ন হন্তব্যা ধনংজয় রণে ত্বয়া
75.23
বক্তব্যাশ্চাপি রাজানঃ সর্বৈঃ সহ সুহৃজ্জনৈঃ
যুধিষ্ঠিরস্যাশ্বমেধো ভবদ্ভিরনুভূয়তাম্
75.24
ইতি ভ্রাতৃবচঃ শ্রুত্বা ন হন্মি ত্বাং জনাধিপ
উত্তিষ্ঠ ন ভয়ং তেঽস্তি স্বস্তিমান্গচ্ছ পার্থিব
75.25
আগচ্ছেথা মহারাজ পরাং চৈত্রীমুপস্থিতাম্
তদাশ্বমেধো ভবিতা ধর্মরাজস্য ধীমতঃ
75.26
এবমুক্তঃ স রাজা তু ভগদত্তাত্মজস্তদা
তথেত্যেবাব্রবীদ্বাক্যং পাণ্ডবেনাভিনির্জিতঃ