Utshovঅধ্যায় 76
76.1
বৈশংপায়ন উবাচ
সৈন্ধবৈরভবদ্যুদ্ধং ততস্তস্য কিরীটিনঃ
হতশেষৈর্মহারাজ হতানাং চ সুতৈরপি
76.2
তেঽবতীর্ণমুপশ্রুত্য বিষয়ং শ্বেতবাহনম্
প্রত্যুদ্যয়ুরমৃষ্যন্তো রাজানঃ পাণ্ডবর্ষভম্
76.3
অশ্বং চ তং পরামৃশ্য বিষয়ান্তে বিষোপমাঃ
ন ভয়ং চক্রিরে পার্থাদ্ভীমসেনাদনন্তরাৎ
76.4
তেঽবিদূরাদ্ধনুষ্পাণিং যজ্ঞিয়স্য হয়স্য চ
বীভত্সুং প্রত্যপদ্যন্ত পদাতিনমবস্থিতম্
76.5
ততস্তে তু মহাবীর্যা রাজানঃ পর্যবারয়ন্
জিগীষন্তো নরব্যাঘ্রাঃ পূর্বং বিনিকৃতা যুধি
76.6
তে নামান্যথ গোত্রাণি কর্মাণি বিবিধানি চ
কীর্তয়ন্তস্তদা পার্থং শরবর্ষৈরবাকিরন্
76.7
তে কিরন্তঃ শরাংস্তীক্ষ্ণান্বারণেন্দ্রনিবারণান্
রণে জয়মভীপ্সন্তঃ কৌন্তেয়ং পর্যবারয়ন্
76.8
তেঽসমীক্ষ্যৈব তং বীরমুগ্রকর্মাণমাহবে
সর্বে যুয়ুধিরে বীরা রথস্থাস্তং পদাতিনম্
76.9
তে তমাজঘ্নিরে বীরং নিবাতকবচান্তকম্
সংশপ্তকনিহন্তারং হন্তারং সৈন্ধবস্য চ
76.10
ততো রথসহস্রেণ হয়ানাময়ুতেন চ
কোষ্ঠকীকৃত্য কৌন্তেয়ং সংপ্রহৃষ্টময়োধয়ন্
76.11
সংস্মরন্তো বধং বীরাঃ সিন্ধুরাজস্য ধীমতঃ
জয়দ্রথস্য কৌরব্য সমরে সব্যসাচিনা
76.12
ততঃ পর্জন্যবত্সর্বে শরবৃষ্টিমবাসৃজন্
তৈঃ কীর্ণঃ শুশুভে পার্থো রবির্মেঘান্তরে যথা
76.13
স শরৈঃ সমবচ্ছন্নো দদৃশে পাণ্ডবর্ষভঃ
পঞ্জরান্তরসংচারী শকুন্ত ইব ভারত
76.14
ততো হাহাকৃতং সর্বং কৌন্তেয়ে শরপীডিতে
ত্রৈলোক্যমভবদ্রাজন্রবিশ্চাসীদ্রজোরুণঃ
76.15
ততো ববৌ মহারাজ মারুতো রোমহর্ষণঃ
রাহুরগ্রসদাদিত্যং যুগপত্সোমমেব চ
76.16
উল্কাশ্চ জঘ্নিরে সূর্যং বিকীর্যন্ত্যঃ সমন্ততঃ
বেপথুশ্চাভবদ্রাজন্কৈলাসস্য মহাগিরেঃ
76.17
মুমুচুশ্চাস্রমত্যুষ্ণং দুঃখশোকসমন্বিতাঃ
সপ্তর্ষয়ো জাতভয়াস্তথা দেবর্ষয়োঽপি চ
76.18
শশশ্চাশু বিনির্ভিদ্য মণ্ডলং শশিনোঽপতৎ
বিপরীতস্তদা রাজংস্তস্মিন্নুত্পাতলক্ষণে
76.19
রাসভারুণসংকাশা ধনুষ্মন্তঃ সবিদ্যুতঃ
আবৃত্য গগনং মেঘা মুমুচুর্মাংসশোণিতম্
76.20
এবমাসীত্তদা বীরে শরবর্ষাভিসংবৃতে
লোকেঽস্মিন্ভরতশ্রেষ্ঠ তদদ্ভুতমিবাভবৎ
76.21
তস্য তেনাবকীর্ণস্য শরজালেন সর্বশঃ
মোহাত্পপাত গাণ্ডীবমাবাপশ্চ করাদপি
76.22
তস্মিন্মোহমনুপ্রাপ্তে শরজালং মহত্তরম্
সৈন্ধবা মুমুচুস্তূর্ণং গতসত্ত্বে মহারথে
76.23
ততো মোহসমাপন্নং জ্ঞাত্বা পার্থং দিবৌকসঃ
সর্বে বিত্রস্তমনসস্তস্য শান্তিপরাভবন্
76.24
ততো দেবর্ষয়ঃ সর্বে তথা সপ্তর্ষয়োঽপি চ
ব্রহ্মর্ষয়শ্চ বিজয়ং জেপুঃ পার্থস্য ধীমতঃ
76.25
ততঃ প্রদীপিতে দেবৈঃ পার্থতেজসি পার্থিব
তস্থাবচলবদ্ধীমান্সংগ্রামে পরমাস্ত্রবিৎ
76.26
বিচকর্ষ ধনুর্দিব্যং ততঃ কৌরবনন্দনঃ
যন্ত্রস্যেবেহ শব্দোঽভূন্মহাংস্তস্য পুনঃ পুনঃ
76.27
ততঃ স শরবর্ষাণি প্রত্যমিত্রান্প্রতি প্রভুঃ
ববর্ষ ধনুষা পার্থো বর্ষাণীব সুরেশ্বরঃ
76.28
ততস্তে সৈন্ধবা যোধাঃ সর্ব এব সরাজকাঃ
নাদৃশ্যন্ত শরৈঃ কীর্ণাঃ শলভৈরিব পাবকাঃ
76.29
তস্য শব্দেন বিত্রেসুর্ভয়ার্তাশ্চ বিদুদ্রুবুঃ
মুমুচুশ্চাশ্রু শোকার্তাঃ সুষুপুশ্চাপি সৈন্ধবাঃ
76.30
তাংস্তু সর্বান্নরশ্রেষ্ঠঃ সর্বতো বিচরন্বলী
অলাতচক্রবদ্রাজঞ্শরজালৈঃ সমর্পয়ৎ
76.31
তদিন্দ্রজালপ্রতিমং বাণজালমমিত্রহা
ব্যসৃজদ্দিক্ষু সর্বাসু মহেন্দ্র ইব বজ্রভৃৎ
76.32
মেঘজালনিভং সৈন্যং বিদার্য স রবিপ্রভঃ
বিবভৌ কৌরবশ্রেষ্ঠঃ শরদীব দিবাকরঃ