Utshovঅধ্যায় 77
77.1
বৈশংপায়ন উবাচ
ততো গাণ্ডীবভৃচ্ছূরো যুদ্ধায় সমবস্থিতঃ
বিবভৌ যুধি দুর্ধর্ষো হিমবানচলো যথা
77.2
ততঃ সৈন্ধবয়োধাস্তে পুনরেব ব্যবস্থিতাঃ
বিমুঞ্চন্তঃ সুসংরব্ধাঃ শরবর্ষাণি ভারত
77.3
তান্প্রসহ্য মহাবীর্যঃ পুনরেব ব্যবস্থিতান্
ততঃ প্রোবাচ কৌন্তেয়ো মুমূর্ষূঞ্শ্লক্ষ্ণয়া গিরা
77.4
যুধ্যধ্বং পরয়া শক্ত্যা যতধ্বং চ বধে মম
কুরুধ্বং সর্বকার্যাণি মহদ্বো ভয়মাগতম্
77.5
এষ যোত্স্যামি বঃ সর্বান্নিবার্য শরবাগুরাম্
তিষ্ঠধ্বং যুদ্ধমনসো দর্পং বিনয়িতাস্মি বঃ
77.6
এতাবদুক্ত্বা কৌরব্যো রুষা গাণ্ডীবভৃত্তদা
ততোঽথ বচনং স্মৃত্বা ভ্রাতুর্জ্যেষ্ঠস্য ভারত
77.7
ন হন্তব্যা রণে তাত ক্ষত্রিয়া বিজিগীষবঃ
জেতব্যাশ্চেতি যত্প্রোক্তং ধর্মরাজ্ঞা মহাত্মনা
চিন্তয়ামাস চ তদা ফল্গুনঃ পুরুষর্ষভঃ
77.8
ইত্যুক্তোঽহং নরেন্দ্রেণ ন হন্তব্যা নৃপা ইতি
কথং তন্ন মৃষেহ স্যাদ্ধর্মরাজবচঃ শুভম্
77.9
ন হন্যেরংশ্চ রাজানো রাজ্ঞশ্চাজ্ঞা কৃতা ভবেৎ
ইতি সংচিন্ত্য স তদা ভ্রাতুঃ প্রিয়হিতে রতঃ
প্রোবাচ বাক্যং ধর্মজ্ঞঃ সৈন্ধবান্যুদ্ধদুর্মদান্
77.10
বালান্স্ত্রিয়ো বা যুষ্মাকং ন হনিষ্যে ব্যবস্থিতান্
যশ্চ বক্ষ্যতি সংগ্রামে তবাস্মীতি পরাজিতঃ
77.11
এতচ্ছ্রুত্বা বচো মহ্যং কুরুধ্বং হিতমাত্মনঃ
অতোঽন্যথা কৃচ্ছ্রগতা ভবিষ্যথ ময়ার্দিতাঃ
77.12
এবমুক্ত্বা তু তান্বীরান্যুয়ুধে কুরুপুংগবঃ
অত্বরাবানসংরব্ধঃ সংরব্ধৈর্বিজিগীষুভিঃ
77.13
ততঃ শতসহস্রাণি শরাণাং নতপর্বণাম্
মুমুচুঃ সৈন্ধবা রাজংস্তদা গাণ্ডীবধন্বনি
77.14
স তানাপততঃ ক্রূরানাশীবিষবিষোপমান্
চিচ্ছেদ নিশিতৈর্বাণৈরন্তরৈব ধনংজয়ঃ
77.15
ছিত্ত্বা তু তানাশুগমান্কঙ্কপত্রাঞ্শিলাশিতান্
একৈকমেষ দশভির্বিভেদ সমরে শরৈঃ
77.16
ততঃ প্রাসাংশ্চ শক্তীশ্চ পুনরেব ধনংজয়ে
জয়দ্রথং হতং স্মৃত্বা চিক্ষিপুঃ সৈন্ধবা নৃপাঃ
77.17
তেষাং কিরীটী সংকল্পং মোঘং চক্রে মহামনাঃ
সর্বাংস্তানন্তরা ছিত্ত্বা মুদা চুক্রোশ পাণ্ডবঃ
77.18
তথৈবাপততাং তেষাং যোধানাং জয়গৃদ্ধিনাম্
শিরাংসি পাতয়ামাস ভল্লৈঃ সংনতপর্বভিঃ
77.19
তেষাং প্রদ্রবতাং চৈব পুনরেব চ ধাবতাম্
নিবর্ততাং চ শব্দোঽভূত্পূর্ণস্যেব মহোদধেঃ
77.20
তে বধ্যমানাস্তু তদা পার্থেনামিততেজসা
যথাপ্রাণং যথোত্সাহং যোধয়ামাসুরর্জুনম্
77.21
ততস্তে ফল্গুনেনাজৌ শরৈঃ সংনতপর্বভিঃ
কৃতা বিসংজ্ঞা ভূয়িষ্ঠাঃ ক্লান্তবাহনসৈনিকাঃ
77.22
তাংস্তু সর্বান্পরিগ্লানান্বিদিত্বা ধৃতরাষ্ট্রজা
দুঃশলা বালমাদায় নপ্তারং প্রয়য়ৌ তদা
সুরথস্য সুতং বীরং রথেনানাগসং তদা
77.23
শান্ত্যর্থং সর্বয়োধানামভ্যগচ্ছত পাণ্ডবম্
সা ধনংজয়মাসাদ্য মুমোচার্তস্বরং তদা
ধনংজয়োঽপি তাং দৃষ্ট্বা ধনুর্বিসসৃজে প্রভুঃ
77.24
সমুত্সৃষ্টধনুঃ পার্থো বিধিবদ্ভগিনীং তদা
প্রাহ কিং করবাণীতি সা চ তং বাক্যমব্রবীৎ
77.25
এষ তে ভরতশ্রেষ্ঠ স্বস্রীয়স্যাত্মজঃ শিশুঃ
অভিবাদয়তে বীর তং পশ্য পুরুষর্ষভ
77.26
ইত্যুক্তস্তস্য পিতরং স পপ্রচ্ছার্জুনস্তদা
ক্বাসাবিতি ততো রাজন্দুঃশলা বাক্যমব্রবীৎ
77.27
পিতৃশোকাভিসংতপ্তো বিষাদার্তোঽস্য বৈ পিতা
পঞ্চত্বমগমদ্বীর যথা তন্মে নিবোধ হ
77.28
স পূর্বং পিতরং শ্রুত্বা হতং যুদ্ধে ত্বয়ানঘ
ত্বামাগতং চ সংশ্রুত্য যুদ্ধায় হয়সারিণম্
পিতুশ্চ মৃত্যুদুঃখার্তোঽজহাত্প্রাণান্ধনংজয়
77.29
প্রাপ্তো বীভত্সুরিত্যেব নাম শ্রুত্বৈব তেঽনঘ
বিষাদার্তঃ পপাতোর্ব্যাং মমার চ মমাত্মজঃ
77.30
তং তু দৃষ্ট্বা নিপতিতং ততস্তস্যাত্মজং বিভো
গৃহীত্বা সমনুপ্রাপ্তা ত্বামদ্য শরণৈষিণী
77.31
ইত্যুক্ত্বার্তস্বরং সা তু মুমোচ ধৃতরাষ্ট্রজা
দীনা দীনং স্থিতং পার্থমব্রবীচ্চাপ্যধোমুখম্
77.32
স্বসারং মামবেক্ষস্ব স্বস্রীয়াত্মজমেব চ
কর্তুমর্হসি ধর্মজ্ঞ দয়াং ময়ি কুরূদ্বহ
বিস্মৃত্য কুরুরাজানং তং চ মন্দং জয়দ্রথম্
77.33
অভিমন্যোর্যথা জাতঃ পরিক্ষিত্পরবীরহা
তথায়ং সুরথাজ্জাতো মম পৌত্রো মহাভুজ
77.34
তমাদায় নরব্যাঘ্র সংপ্রাপ্তাস্মি তবান্তিকম্
শমার্থং সর্বয়োধানাং শৃণু চেদং বচো মম
77.35
আগতোঽয়ং মহাবাহো তস্য মন্দস্য পৌত্রকঃ
প্রসাদমস্য বালস্য তস্মাত্ত্বং কর্তুমর্হসি
77.36
এষ প্রসাদ্য শিরসা ময়া সার্ধমরিংদম
যাচতে ত্বাং মহাবাহো শমং গচ্ছ ধনংজয়
77.37
বালস্য হতবন্ধোশ্চ পার্থ কিংচিদজানতঃ
প্রসাদং কুরু ধর্মজ্ঞ মা মন্যুবশমন্বগাঃ
77.38
তমনার্যং নৃশংসং চ বিস্মৃত্যাস্য পিতামহম্
আগস্কারিণমত্যর্থং প্রসাদং কর্তুমর্হসি
77.39
এবং ব্রুবত্যাং করুণং দুঃশলায়াং ধনংজয়ঃ
সংস্মৃত্য দেবীং গান্ধারীং ধৃতরাষ্ট্রং চ পার্থিবম্
প্রোবাচ দুঃখশোকার্তঃ ক্ষত্রধর্মং বিগর্হয়ন্
77.40
ধিক্তং দুর্যোধনং ক্ষুদ্রং রাজ্যলুব্ধং চ মানিনম্
যত্কৃতে বান্ধবাঃ সর্বে ময়া নীতা যমক্ষয়ম্
77.41
ইত্যুক্ত্বা বহু সান্ত্বাদি প্রসাদমকরোজ্জয়ঃ
পরিষ্বজ্য চ তাং প্রীতো বিসসর্জ গৃহান্প্রতি
77.42
দুঃশলা চাপি তান্যোধান্নিবার্য মহতো রণাৎ
সংপূজ্য পার্থং প্রয়য়ৌ গৃহান্প্রতি শুভাননা
77.43
ততঃ সৈন্ধবকান্যোধান্বিনির্জিত্য নরর্ষভঃ
পুনরেবান্বধাবত্স তং হয়ং কামচারিণম্
77.44
সসার যজ্ঞিয়ং বীরো বিধিবত্স বিশাং পতে
তারামৃগমিবাকাশে দেবদেবঃ পিনাকধৃক্
77.45
স চ বাজী যথেষ্টেন তাংস্তান্দেশান্যথাসুখম্
বিচচার যথাকামং কর্ম পার্থস্য বর্ধয়ন্
77.46
ক্রমেণ স হয়স্ত্বেবং বিচরন্ভরতর্ষভ
মণিপূরপতের্দেশমুপায়াত্সহপাণ্ডবঃ