Utshovঅধ্যায় 78
78.1
বৈশংপায়ন উবাচ
শ্রুত্বা তু নৃপতির্বীরং পিতরং বভ্রুবাহনঃ
নির্যয়ৌ বিনয়েনার্যো ব্রাহ্মণার্ঘ্যপুরঃসরঃ
78.2
মণিপূরেশ্বরং ত্বেবমুপয়াতং ধনংজয়ঃ
নাভ্যনন্দত মেধাবী ক্ষত্রধর্মমনুস্মরন্
78.3
উবাচ চৈনং ধর্মাত্মা সমন্যুঃ ফল্গুনস্তদা
প্রক্রিয়েয়ং ন তে যুক্তা বহিস্ত্বং ক্ষত্রধর্মতঃ
78.4
সংরক্ষ্যমাণং তুরগং যৌধিষ্ঠিরমুপাগতম্
যজ্ঞিয়ং বিষয়ান্তে মাং নায়োত্সীঃ কিং নু পুত্রক
78.5
ধিক্ত্বামস্তু সুদুর্বুদ্ধিং ক্ষত্রধর্মাবিশারদম্
যো মাং যুদ্ধায় সংপ্রাপ্তং সাম্নৈবাথো ত্বমগ্রহীঃ
78.6
ন ত্বয়া পুরুষার্থশ্চ কশ্চিদস্তীহ জীবতা
যস্ত্বং স্ত্রীবদ্যুধা প্রাপ্তং সাম্না মাং প্রত্যগৃহ্ণথাঃ
78.7
যদ্যহং ন্যস্তশস্ত্রস্ত্বামাগচ্ছেয়ং সুদুর্মতে
প্রক্রিয়েয়ং ততো যুক্তা ভবেত্তব নরাধম
78.8
তমেবমুক্তং ভর্ত্রা তু বিদিত্বা পন্নগাত্মজা
অমৃষ্যমাণা ভিত্ত্বোর্বীমুলূপী তমুপাগমৎ
78.9
সা দদর্শ ততঃ পুত্রং বিমৃশন্তমধোমুখম্
সংতর্জ্যমানমসকৃদ্ভর্ত্রা যুদ্ধার্থিনা বিভো
78.10
ততঃ সা চারুসর্বাঙ্গী তমুপেত্যোরগাত্মজা
উলূপী প্রাহ বচনং ক্ষত্রধর্মবিশারদা
78.11
উলূপীং মাং নিবোধ ত্বং মাতরং পন্নগাত্মজাম্
কুরুষ্ব বচনং পুত্র ধর্মস্তে ভবিতা পরঃ
78.12
যুধ্যস্বৈনং কুরুশ্রেষ্ঠং ধনংজয়মরিংদম
এবমেষ হি তে প্রীতো ভবিষ্যতি ন সংশয়ঃ
78.13
এবমুদ্ধর্ষিতো মাত্রা স রাজা বভ্রুবাহনঃ
মনশ্চক্রে মহাতেজা যুদ্ধায় ভরতর্ষভ
78.14
সংনহ্য কাঞ্চনং বর্ম শিরস্ত্রাণং চ ভানুমৎ
তূণীরশতসংবাধমারুরোহ মহারথম্
78.15
সর্বোপকরণৈর্যুক্তং যুক্তমশ্বৈর্মনোজবৈঃ
সুচক্রোপস্করং ধীমান্হেমভাণ্ডপরিষ্কৃতম্
78.16
পরমার্চিতমুচ্ছ্রিত্য ধ্বজং সিংহং হিরণ্ময়ম্
প্রয়য়ৌ পার্থমুদ্দিশ্য স রাজা বভ্রুবাহনঃ
78.17
ততোঽভ্যেত্য হয়ং বীরো যজ্ঞিয়ং পার্থরক্ষিতম্
গ্রাহয়ামাস পুরুষৈর্হয়শিক্ষাবিশারদৈঃ
78.18
গৃহীতং বাজিনং দৃষ্ট্বা প্রীতাত্মা স ধনংজয়ঃ
পুত্রং রথস্থং ভূমিষ্ঠঃ সংন্যবারয়দাহবে
78.19
ততঃ স রাজা তং বীরং শরব্রাতৈঃ সহস্রশঃ
অর্দয়ামাস নিশিতৈরাশীবিষবিষোপমৈঃ
78.20
তয়োঃ সমভবদ্যুদ্ধং পিতুঃ পুত্রস্য চাতুলম্
দেবাসুররণপ্রখ্যমুভয়োঃ প্রীয়মাণয়োঃ
78.21
কিরীটিনং তু বিব্যাধ শরেণ নতপর্বণা
জত্রুদেশে নরব্যাঘ্রঃ প্রহসন্বভ্রুবাহনঃ
78.22
সোঽভ্যগাত্সহ পুঙ্খেন বল্মীকমিব পন্নগঃ
বিনির্ভিদ্য চ কৌন্তেয়ং মহীতলমথাবিশৎ
78.23
স গাঢবেদনো ধীমানালম্ব্য ধনুরুত্তমম্
দিব্যং তেজঃ সমাবিশ্য প্রমীত ইব সংবভৌ
78.24
স সংজ্ঞামুপলভ্যাথ প্রশস্য পুরুষর্ষভঃ
পুত্রং শক্রাত্মজো বাক্যমিদমাহ মহীপতে
78.25
সাধু সাধু মহাবাহো বত্স চিত্রাঙ্গদাত্মজ
সদৃশং কর্ম তে দৃষ্ট্বা প্রীতিমানস্মি পুত্রক
78.26
বিমুঞ্চাম্যেষ বাণাংস্তে পুত্র যুদ্ধে স্থিরো ভব
ইত্যেবমুক্ত্বা নারাচৈরভ্যবর্ষদমিত্রহা
78.27
তান্স গাণ্ডীবনির্মুক্তান্বজ্রাশনিসমপ্রভান্
নারাচৈরচ্ছিনদ্রাজা সর্বানেব ত্রিধা ত্রিধা
78.28
তস্য পার্থঃ শরৈর্দিব্যৈর্ধ্বজং হেমপরিষ্কৃতম্
সুবর্ণতালপ্রতিমং ক্ষুরেণাপাহরদ্রথাৎ
78.29
হয়াংশ্চাস্য মহাকায়ান্মহাবেগপরাক্রমান্
চকার রাজ্ঞো নির্জীবান্প্রহসন্পাণ্ডবর্ষভঃ
78.30
স রথাদবতীর্যাশু রাজা পরমকোপনঃ
পদাতিঃ পিতরং কোপাদ্যোধয়ামাস পাণ্ডবম্
78.31
সংপ্রীয়মাণঃ পাণ্ডূনামৃষভঃ পুত্রবিক্রমাৎ
নাত্যর্থং পীডয়ামাস পুত্রং বজ্রধরাত্মজঃ
78.32
স হন্যমানো বিমুখং পিতরং বভ্রুবাহনঃ
শরৈরাশীবিষাকারৈঃ পুনরেবার্দয়দ্বলী
78.33
ততঃ স বাল্যাত্পিতরং বিব্যাধ হৃদি পত্রিণা
নিশিতেন সুপুঙ্খেন বলবদ্বভ্রুবাহনঃ
78.34
স বাণস্তেজসা দীপ্তো জ্বলন্নিব হুতাশনঃ
বিবেশ পাণ্ডবং রাজন্মর্ম ভিত্ত্বাতিদুঃখকৃৎ
78.35
স তেনাতিভৃশং বিদ্ধঃ পুত্রেণ কুরুনন্দনঃ
মহীং জগাম মোহার্তস্ততো রাজন্ধনংজয়ঃ
78.36
তস্মিন্নিপতিতে বীরে কৌরবাণাং ধুরংধরে
সোঽপি মোহং জগামাশু ততশ্চিত্রাঙ্গদাসুতঃ
78.37
ব্যায়ম্য সংয়ুগে রাজা দৃষ্ট্বা চ পিতরং হতম্
পূর্বমেব চ বাণৌঘৈর্গাঢবিদ্ধোঽর্জুনেন সঃ
78.38
ভর্তারং নিহতং দৃষ্ট্বা পুত্রং চ পতিতং ভুবি
চিত্রাঙ্গদা পরিত্রস্তা প্রবিবেশ রণাজিরম্
78.39
শোকসংতপ্তহৃদয়া রুদতী সা ততঃ শুভা
মণিপূরপতের্মাতা দদর্শ নিহতং পতিম্