অধ্যায় 79

79.1

বৈশংপায়ন উবাচ
ততো বহুবিধং ভীরুর্বিলপ্য কমলেক্ষণা
মুমোহ দুঃখাদ্দুর্ধর্ষা নিপপাত চ ভূতলে

প্রতিলভ্য চ সা সংজ্ঞাং দেবী দিব্যবপুর্ধরা
উলূপীং পন্নগসুতাং দৃষ্ট্বেদং বাক্যমব্রবীৎ

উলূপি পশ্য ভর্তারং শয়ানং নিহতং রণে
ত্বত্কৃতে মম পুত্রেণ বালেন সমিতিংজয়ম্

ননু ত্বমার্যে ধর্মজ্ঞা ননু চাসি পতিব্রতা
যত্ত্বত্কৃতেঽয়ং পতিতঃ পতিস্তে নিহতো রণে

কিং তু সর্বাপরাধোঽয়ং যদি তেঽদ্য ধনংজয়ঃ
ক্ষমস্ব যাচ্যমানা মে সংজীবয় ধনংজয়ম্

ননু ত্বমার্যে ধর্মজ্ঞা ত্রৈলোক্যবিদিতা শুভে
যদ্ঘাতয়িত্বা ভর্তারং পুত্রেণেহ ন শোচসি

নাহং শোচামি তনয়ং নিহতং পন্নগাত্মজে
পতিমেব তু শোচামি যস্যাতিথ্যমিদং কৃতম্

ইত্যুক্ত্বা সা তদা দেবীমুলূপীং পন্নগাত্মজাম্
ভর্তারমভিগম্যেদমিত্যুবাচ যশস্বিনী

উত্তিষ্ঠ কুরুমুখ্যস্য প্রিয়কাম মম প্রিয়
অয়মশ্বো মহাবাহো ময়া তে পরিমোক্ষিতঃ

ননু নাম ত্বয়া বীর ধর্মরাজস্য যজ্ঞিয়ঃ
অয়মশ্বোঽনুসর্তব্যঃ স শেষে কিং মহীতলে

ত্বয়ি প্রাণাঃ সমায়ত্তাঃ কুরূণাং কুরুনন্দন
স কস্মাত্প্রাণদোঽন্যেষাং প্রাণান্সংত্যক্তবানসি

উলূপি সাধু সংপশ্য ভর্তারং নিহতং রণে
পুত্রং চৈনং সমুত্সাহ্য ঘাতয়িত্বা ন শোচসি

কামং স্বপিতু বালোঽয়ং ভূমৌ প্রেতগতিং গতঃ
লোহিতাক্ষো গুডাকেশো বিজয়ঃ সাধু জীবতু

নাপরাধোঽস্তি সুভগে নরাণাং বহুভার্যতা
নারীণাং তু ভবত্যেতন্মা তে ভূদ্বুদ্ধিরীদৃশী

সখ্যং হ্যেতত্কৃতং ধাত্রা শাশ্বতং চাব্যয়ং চ হ
সখ্যং সমভিজানীহি সত্যং সংগতমস্তু তে

পুত্রেণ ঘাতয়িত্বেমং পতিং যদি ন মেঽদ্য বৈ
জীবন্তং দর্শয়স্যদ্য পরিত্যক্ষ্যামি জীবিতম্

সাহং দুঃখান্বিতা ভীরু পতিপুত্রবিনাকৃতা
ইহৈব প্রায়মাশিষ্যে প্রেক্ষন্ত্যাস্তে ন সংশয়ঃ

ইত্যুক্ত্বা পন্নগসুতাং সপত্নীং চৈত্রবাহিনী
ততঃ প্রায়মুপাসীনা তূষ্ণীমাসীজ্জনাধিপ