অধ্যায় 80

80.1

বৈশংপায়ন উবাচ
তথা বিলপ্যোপরতা ভর্তুঃ পাদৌ প্রগৃহ্য সা
উপবিষ্টাভবদ্দেবী সোচ্ছ্বাসং পুত্রমীক্ষতী

ততঃ সংজ্ঞাং পুনর্লব্ধ্বা স রাজা বভ্রুবাহনঃ
মাতরং তামথালোক্য রণভূমাবথাব্রবীৎ

ইতো দুঃখতরং কিং নু যন্মে মাতা সুখৈধিতা
ভূমৌ নিপতিতং বীরমনুশেতে মৃতং পতিম্

নিহন্তারং রণেঽরীণাং সর্বশস্ত্রভৃতাং বরম্
ময়া বিনিহতং সংখ্যে প্রেক্ষতে দুর্মরং বত

অহোঽস্যা হৃদয়ং দেব্যা দৃঢং যন্ন বিদীর্যতে
ব্যূঢোরস্কং মহাবাহুং প্রেক্ষন্ত্যা নিহতং পতিম্

দুর্মরং পুরুষেণেহ মন্যে হ্যধ্বন্যনাগতে
যত্র নাহং ন মে মাতা বিপ্রয়ুজ্যেত জীবিতাৎ

অহো ধিক্কুরুবীরস্য হ্যুরঃস্থং কাঞ্চনং ভুবি
ব্যপবিদ্ধং হতস্যেহ ময়া পুত্রেণ পশ্যত

ভো ভো পশ্যত মে বীরং পিতরং ব্রাহ্মণা ভুবি
শয়ানং বীরশয়নে ময়া পুত্রেণ পাতিতম্

ব্রাহ্মণাঃ কুরুমুখ্যস্য প্রয়ুক্তা হয়সারিণঃ
কুর্বন্তু শান্তিকাং ত্বদ্য রণে যোঽয়ং ময়া হতঃ

ব্যাদিশন্তু চ কিং বিপ্রাঃ প্রায়শ্চিত্তমিহাদ্য মে
সুনৃশংসস্য পাপস্য পিতৃহন্তূ রণাজিরে

দুশ্চরা দ্বাদশ সমা হত্বা পিতরমদ্য বৈ
মমেহ সুনৃশংসস্য সংবীতস্যাস্য চর্মণা

শিরঃকপালে চাস্যৈব ভুঞ্জতঃ পিতুরদ্য মে
প্রায়শ্চিত্তং হি নাস্ত্যন্যদ্ধত্বাদ্য পিতরং মম

পশ্য নাগোত্তমসুতে ভর্তারং নিহতং ময়া
কৃতং প্রিয়ং ময়া তেঽদ্য নিহত্য সমরেঽর্জুনম্

সোঽহমপ্যদ্য যাস্যামি গতিং পিতৃনিষেবিতাম্
ন শক্নোম্যাত্মনাত্মানমহং ধারয়িতুং শুভে

সা ত্বং ময়ি মৃতে মাতস্তথা গাণ্ডীবধন্বনি
ভব প্রীতিমতী দেবি সত্যেনাত্মানমালভে

ইত্যুক্ত্বা স তদা রাজা দুঃখশোকসমাহতঃ
উপস্পৃশ্য মহারাজ দুঃখাদ্বচনমব্রবীৎ

শৃণ্বন্তু সর্বভূতানি স্থাবরাণি চরাণি চ
ত্বং চ মাতর্যথা সত্যং ব্রবীমি ভুজগোত্তমে

যদি নোত্তিষ্ঠতি জয়ঃ পিতা মে ভরতর্ষভঃ
অস্মিন্নেব রণোদ্দেশে শোষয়িষ্যে কলেবরম্

ন হি মে পিতরং হত্বা নিষ্কৃতির্বিদ্যতে ক্বচিৎ
নরকং প্রতিপত্স্যামি ধ্রুবং গুরুবধার্দিতঃ

বীরং হি ক্ষত্রিয়ং হত্বা গোশতেন প্রমুচ্যতে
পিতরং তু নিহত্যৈবং দুস্তরা নিষ্কৃতির্ময়া

এষ হ্যেকো মহাতেজাঃ পাণ্ডুপুত্রো ধনংজয়ঃ
পিতা চ মম ধর্মাত্মা তস্য মে নিষ্কৃতিঃ কুতঃ

ইত্যেবমুক্ত্বা নৃপতে ধনংজয়সুতো নৃপঃ
উপস্পৃশ্যাভবত্তূষ্ণীং প্রায়োপেতো মহামতিঃ