অধ্যায় 81

81.1

বৈশংপায়ন উবাচ
প্রায়োপবিষ্টে নৃপতৌ মণিপূরেশ্বরে তদা
পিতৃশোকসমাবিষ্টে সহ মাত্রা পরংতপ

উলূপী চিন্তয়ামাস তদা সংজীবনং মণিম্
স চোপাতিষ্ঠত তদা পন্নগানাং পরায়ণম্

তং গৃহীত্বা তু কৌরব্য নাগরাজপতেঃ সুতা
মনঃপ্রহ্লাদনীং বাচং সৈনিকানামথাব্রবীৎ

উত্তিষ্ঠ মা শুচঃ পুত্র নৈষ জিষ্ণুস্ত্বয়া হতঃ
অজেয়ঃ পুরুষৈরেষ দেবৈর্বাপি সবাসবৈঃ

ময়া তু মোহিনী নাম মায়ৈষা সংপ্রয়োজিতা
প্রিয়ার্থং পুরুষেন্দ্রস্য পিতুস্তেঽদ্য যশস্বিনঃ

জিজ্ঞাসুর্হ্যেষ বৈ পুত্র বলস্য তব কৌরবঃ
সংগ্রামে যুধ্যতো রাজন্নাগতঃ পরবীরহা

তস্মাদসি ময়া পুত্র যুদ্ধার্থং পরিচোদিতঃ
মা পাপমাত্মনঃ পুত্র শঙ্কেথাস্ত্বণ্বপি প্রভো

ঋষিরেষ মহাতেজাঃ পুরুষঃ শাশ্বতোঽব্যয়ঃ
নৈনং শক্তো হি সংগ্রামে জেতুং শক্রোঽপি পুত্রক

অয়ং তু মে মণির্দিব্যঃ সমানীতো বিশাং পতে
মৃতান্মৃতান্পন্নগেন্দ্রান্যো জীবয়তি নিত্যদা

এতমস্যোরসি ত্বং তু স্থাপয়স্ব পিতুঃ প্রভো
সংজীবিতং পুনঃ পুত্র ততো দ্রষ্টাসি পাণ্ডবম্

ইত্যুক্তঃ স্থাপয়ামাস তস্যোরসি মণিং তদা
পার্থস্যামিততেজাঃ স পিতুঃ স্নেহাদপাপকৃৎ

তস্মিন্ন্যস্তে মণৌ বীর জিষ্ণুরুজ্জীবিতঃ প্রভুঃ
সুপ্তোত্থিত ইবোত্তস্থৌ মৃষ্টলোহিতলোচনঃ

তমুত্থিতং মহাত্মানং লব্ধসংজ্ঞং মনস্বিনম্
সমীক্ষ্য পিতরং স্বস্থং ববন্দে বভ্রুবাহনঃ

উত্থিতে পুরুষব্যাঘ্রে পুনর্লক্ষ্মীবতি প্রভো
দিব্যাঃ সুমনসঃ পুণ্যা ববৃষে পাকশাসনঃ

অনাহতা দুন্দুভয়ঃ প্রণেদুর্মেঘনিস্বনাঃ
সাধু সাধ্বিতি চাকাশে বভূব সুমহান্স্বনঃ

উত্থায় তু মহাবাহুঃ পর্যাশ্বস্তো ধনংজয়ঃ
বভ্রুবাহনমালিঙ্গ্য সমাজিঘ্রত মূর্ধনি

দদর্শ চাবিদূরেঽস্য মাতরং শোককর্শিতাম্
উলূপ্যা সহ তিষ্ঠন্তীং ততোঽপৃচ্ছদ্ধনংজয়ঃ

কিমিদং লক্ষ্যতে সর্বং শোকবিস্ময়হর্ষবৎ
রণাজিরমমিত্রঘ্ন যদি জানাসি শংস মে

জননী চ কিমর্থং তে রণভূমিমুপাগতা
নাগেন্দ্রদুহিতা চেয়মুলূপী কিমিহাগতা

জানাম্যহমিদং যুদ্ধং ত্বয়া মদ্বচনাত্কৃতম্
স্ত্রীণামাগমনে হেতুমহমিচ্ছামি বেদিতুম্

তমুবাচ ততঃ পৃষ্টো মণিপূরপতিস্তদা
প্রসাদ্য শিরসা বিদ্বানুলূপী পৃচ্ছ্যতামিতি