Utshovঅধ্যায় 82
82.1
অর্জুন উবাচ
কিমাগমনকৃত্যং তে কৌরব্যকুলনন্দিনি
মণিপূরপতের্মাতুস্তথৈব চ রণাজিরে
82.2
কচ্চিত্কুশলকামাসি রাজ্ঞোঽস্য ভুজগাত্মজে
মম বা চঞ্চলাপাঙ্গে কচ্চিত্ত্বং শুভমিচ্ছসি
82.3
কচ্চিত্তে পৃথুলশ্রোণি নাপ্রিয়ং শুভদর্শনে
অকার্ষমহমজ্ঞানাদয়ং বা বভ্রুবাহনঃ
82.4
কচ্চিচ্চ রাজপুত্রী তে সপত্নী চৈত্রবাহিনী
চিত্রাঙ্গদা বরারোহা নাপরাধ্যতি কিংচন
82.5
তমুবাচোরগপতের্দুহিতা প্রহসন্ত্যথ
ন মে ত্বমপরাদ্ধোঽসি ন নৃপো বভ্রুবাহনঃ
ন জনিত্রী তথাস্যেয়ং মম যা প্রেষ্যবত্স্থিতা
82.6
শ্রূয়তাং যদ্যথা চেদং ময়া সর্বং বিচেষ্টিতম্
ন মে কোপস্ত্বয়া কার্যঃ শিরসা ত্বাং প্রসাদয়ে
82.7
ত্বত্প্রীত্যর্থং হি কৌরব্য কৃতমেতন্ময়ানঘ
যত্তচ্ছৃণু মহাবাহো নিখিলেন ধনংজয়
82.8
মহাভারতয়ুদ্ধে যত্ত্বয়া শাংতনবো নৃপঃ
অধর্মেণ হতঃ পার্থ তস্যৈষা নিষ্কৃতিঃ কৃতা
82.9
ন হি ভীষ্মস্ত্বয়া বীর যুধ্যমানো নিপাতিতঃ
শিখণ্ডিনা তু সংসক্তস্তমাশ্রিত্য হতস্ত্বয়া
82.10
তস্য শান্তিমকৃত্বা তু ত্যজেস্ত্বং যদি জীবিতম্
কর্মণা তেন পাপেন পতেথা নিরয়ে ধ্রুবম্
82.11
এষা তু বিহিতা শান্তিঃ পুত্রাদ্যাং প্রাপ্তবানসি
বসুভির্বসুধাপাল গঙ্গয়া চ মহামতে
82.12
পুরা হি শ্রুতমেতদ্বৈ বসুভিঃ কথিতং ময়া
গঙ্গায়াস্তীরমাগম্য হতে শাংতনবে নৃপে
82.13
আপ্লুত্য দেবা বসবঃ সমেত্য চ মহানদীম্
ইদমূচুর্বচো ঘোরং ভাগীরথ্যা মতে তদা
82.14
এষ শাংতনবো ভীষ্মো নিহতঃ সব্যসাচিনা
অয়ুধ্যমানঃ সংগ্রামে সংসক্তোঽন্যেন ভামিনি
82.15
তদনেনাভিষঙ্গেণ বয়মপ্যর্জুনং শুভে
শাপেন যোজয়ামেতি তথাস্ত্বিতি চ সাব্রবীৎ
82.16
তদহং পিতুরাবেদ্য ভৃশং প্রব্যথিতেন্দ্রিয়া
অভবং স চ তচ্ছ্রুত্বা বিষাদমগমত্পরম্
82.17
পিতা তু মে বসূন্গত্বা ত্বদর্থং সময়াচত
পুনঃ পুনঃ প্রসাদ্যৈনাংস্ত এনমিদমব্রুবন্
82.18
পুনস্তস্য মহাভাগ মণিপূরেশ্বরো যুবা
স এনং রণমধ্যস্থং শরৈঃ পাতয়িতা ভুবি
82.19
এবং কৃতে স নাগেন্দ্র মুক্তশাপো ভবিষ্যতি
গচ্ছেতি বসুভিশ্চোক্তো মম চেদং শশংস সঃ
82.20
তচ্ছ্রুত্বা ত্বং ময়া তস্মাচ্ছাপাদসি বিমোক্ষিতঃ
ন হি ত্বাং দেবরাজোঽপি সমরেষু পরাজয়েৎ
82.21
আত্মা পুত্রঃ স্মৃতস্তস্মাত্তেনেহাসি পরাজিতঃ
নাত্র দোষো মম মতঃ কথং বা মন্যসে বিভো
82.22
ইত্যেবমুক্তো বিজয়ঃ প্রসন্নাত্মাব্রবীদিদম্
সর্বং মে সুপ্রিয়ং দেবি যদেতত্কৃতবত্যসি
82.23
ইত্যুক্ত্বাথাব্রবীত্পুত্রং মণিপূরেশ্বরং জয়ঃ
চিত্রাঙ্গদায়াঃ শৃণ্বন্ত্যাঃ কৌরব্যদুহিতুস্তথা
82.24
যুধিষ্ঠিরস্যাশ্বমেধঃ পরাং চৈত্রীং ভবিষ্যতি
তত্রাগচ্ছেঃ সহামাত্যো মাতৃভ্যাং সহিতো নৃপ
82.25
ইত্যেবমুক্তঃ পার্থেন স রাজা বভ্রুবাহনঃ
উবাচ পিতরং ধীমানিদমস্রাবিলেক্ষণঃ
82.26
উপয়াস্যামি ধর্মজ্ঞ ভবতঃ শাসনাদহম্
অশ্বমেধে মহায়জ্ঞে দ্বিজাতিপরিবেষকঃ
82.27
মম ত্বনুগ্রহার্থায় প্রবিশস্ব পুরং স্বকম্
ভার্যাভ্যাং সহ শত্রুঘ্ন মা ভূত্তেঽত্র বিচারণা
82.28
উষিত্বেহ বিশল্যস্ত্বং সুখং স্বে বেশ্মনি প্রভো
পুনরশ্বানুগমনং কর্তাসি জয়তাং বর
82.29
ইত্যুক্তঃ স তু পুত্রেণ তদা বানরকেতনঃ
স্ময়ন্প্রোবাচ কৌন্তেয়স্তদা চিত্রাঙ্গদাসুতম্
82.30
বিদিতং তে মহাবাহো যথা দীক্ষাং চরাম্যহম্
ন স তাবত্প্রবেক্ষ্যামি পুরং তে পৃথুলোচন
82.31
যথাকামং প্রয়াত্যেষ যজ্ঞিয়শ্চ তুরংগমঃ
স্বস্তি তেঽস্তু গমিষ্যামি ন স্থানং বিদ্যতে মম
82.32
স তত্র বিধিবত্তেন পূজিতঃ পাকশাসনিঃ
ভার্যাভ্যামভ্যনুজ্ঞাতঃ প্রায়াদ্ভরতসত্তমঃ