Utshovঅধ্যায় 83
83.1
বৈশংপায়ন উবাচ
স তু বাজী সমুদ্রান্তাং পর্যেত্য পৃথিবীমিমাম্
নিবৃত্তোঽভিমুখো রাজন্যেন নাগাহ্বয়ং পুরম্
83.2
অনুগচ্ছংশ্চ তেজস্বী নিবৃত্তোঽথ কিরীটভৃৎ
যদৃচ্ছয়া সমাপেদে পুরং রাজগৃহং তদা
83.3
তমভ্যাশগতং রাজা জরাসংধাত্মজাত্মজঃ
ক্ষত্রধর্মে স্থিতো বীরঃ সমরায়াজুহাব হ
83.4
ততঃ পুরাত্স নিষ্ক্রম্য রথী ধন্বী শরী তলী
মেঘসংধিঃ পদাতিং তং ধনংজয়মুপাদ্রবৎ
83.5
আসাদ্য চ মহাতেজা মেঘসংধির্ধনংজয়ম্
বালভাবান্মহারাজ প্রোবাচেদং ন কৌশলাৎ
83.6
কিময়ং চার্যতে বাজী স্ত্রীমধ্য ইব ভারত
হয়মেনং হরিষ্যামি প্রয়তস্ব বিমোক্ষণে
83.7
অদত্তানুনয়ো যুদ্ধে যদি ত্বং পিতৃভির্মম
করিষ্যামি তবাতিথ্যং প্রহর প্রহরামি বা
83.8
ইত্যুক্তঃ প্রত্যুবাচৈনং পাণ্ডবঃ প্রহসন্নিব
বিঘ্নকর্তা ময়া বার্য ইতি মে ব্রতমাহিতম্
83.9
ভ্রাত্রা জ্যেষ্ঠেন নৃপতে তবাপি বিদিতং ধ্রুবম্
প্রহরস্ব যথাশক্তি ন মন্যুর্বিদ্যতে মম
83.10
ইত্যুক্তঃ প্রাহরত্পূর্বং পাণ্ডবং মগধেশ্বরঃ
কিরঞ্শরসহস্রাণি বর্ষাণীব সহস্রদৃক্
83.11
ততো গাণ্ডীবভৃচ্ছূরো গাণ্ডীবপ্রেষিতৈঃ শরৈঃ
চকার মোঘাংস্তান্বাণানয়ত্নাদ্ভরতর্ষভ
83.12
স মোঘং তস্য বাণৌঘং কৃত্বা বানরকেতনঃ
শরান্মুমোচ জ্বলিতান্দীপ্তাস্যানিব পন্নগান্
83.13
ধ্বজে পতাকাদণ্ডেষু রথয়ন্ত্রে হয়েষু চ
অন্যেষু চ রথাঙ্গেষু ন শরীরে ন সারথৌ
83.14
সংরক্ষ্যমাণঃ পার্থেন শরীরে ফল্গুনস্য হ
মন্যমানঃ স্ববীর্যং তন্মাগধঃ প্রাহিণোচ্ছরান্
83.15
ততো গাণ্ডীবভৃচ্ছূরো মাগধেন সমাহতঃ
বভৌ বাসন্তিক ইব পলাশঃ পুষ্পিতো মহান্
83.16
অবধ্যমানঃ সোঽভ্যঘ্নন্মাগধঃ পাণ্ডবর্ষভম্
তেন তস্থৌ স কৌরব্য লোকবীরস্য দর্শনে
83.17
সব্যসাচী তু সংক্রুদ্ধো বিকৃষ্য বলবদ্ধনুঃ
হয়াংশ্চকার নির্দেহান্সারথেশ্চ শিরোঽহরৎ
83.18
ধনুশ্চাস্য মহচ্চিত্রং ক্ষুরেণ প্রচকর্ত হ
হস্তাবাপং পতাকাং চ ধ্বজং চাস্য ন্যপাতয়ৎ
83.19
স রাজা ব্যথিতো ব্যশ্বো বিধনুর্হতসারথিঃ
গদামাদায় কৌন্তেয়মভিদুদ্রাব বেগবান্
83.20
তস্যাপতত এবাশু গদাং হেমপরিষ্কৃতাম্
শরৈশ্চকর্ত বহুধা বহুভির্গৃধ্রবাজিতৈঃ
83.21
সা গদা শকলীভূতা বিশীর্ণমণিবন্ধনা
ব্যালী নির্মুচ্যমানেব পপাতাস্য সহস্রধা
83.22
বিরথং তং বিধন্বানং গদয়া পরিবর্জিতম্
নৈচ্ছত্তাডয়িতুং ধীমানর্জুনঃ সমরাগ্রণীঃ
83.23
তত এনং বিমনসং ক্ষত্রধর্মে সমাস্থিতম্
সান্ত্বপূর্বমিদং বাক্যমব্রবীত্কপিকেতনঃ
83.24
পর্যাপ্তঃ ক্ষত্রধর্মোঽয়ং দর্শিতঃ পুত্র গম্যতাম্
বহ্বেতত্সমরে কর্ম তব বালস্য পার্থিব
83.25
যুধিষ্ঠিরস্য সংদেশো ন হন্তব্যা নৃপা ইতি
তেন জীবসি রাজংস্ত্বমপরাদ্ধোঽপি মে রণে
83.26
ইতি মত্বা স চাত্মানং প্রত্যাদিষ্টং স্ম মাগধঃ
তথ্যমিত্যবগম্যৈনং প্রাঞ্জলিঃ প্রত্যপূজয়ৎ
83.27
তমর্জুনঃ সমাশ্বাস্য পুনরেবেদমব্রবীৎ
আগন্তব্যং পরাং চৈত্রীমশ্বমেধে নৃপস্য নঃ
83.28
ইত্যুক্তঃ স তথেত্যুক্ত্বা পূজয়ামাস তং হয়ম্
ফল্গুনং চ যুধাং শ্রেষ্ঠং বিধিবত্সহদেবজঃ
83.29
ততো যথেষ্টমগমত্পুনরেব স কেসরী
ততঃ সমুদ্রতীরেণ বঙ্গান্পুণ্ড্রান্সকেরলান্
83.30
তত্র তত্র চ ভূরীণি ম্লেচ্ছসৈন্যান্যনেকশঃ
বিজিগ্যে ধনুষা রাজন্গাণ্ডীবেন ধনংজয়ঃ