অধ্যায় 84

84.1

বৈশংপায়ন উবাচ
মাগধেনার্চিতো রাজন্পাণ্ডবঃ শ্বেতবাহনঃ
দক্ষিণাং দিশমাস্থায় চারয়ামাস তং হয়ম্

ততঃ স পুনরাবৃত্য হয়ঃ কামচরো বলী
আসসাদ পুরীং রম্যাং চেদীনাং শুক্তিসাহ্বয়াম্

শরভেণার্চিতস্তত্র শিশুপালাত্মজেন সঃ
যুদ্ধপূর্বেণ মানেন পূজয়া চ মহাবলঃ

তত্রার্চিতো যয়ৌ রাজংস্তদা স তুরগোত্তমঃ
কাশীনন্ধ্রান্কোসলাংশ্চ কিরাতানথ তঙ্গণান্

তত্র পূজাং যথান্যায়ং প্রতিগৃহ্য স পাণ্ডবঃ
পুনরাবৃত্য কৌন্তেয়ো দশার্ণানগমত্তদা

তত্র চিত্রাঙ্গদো নাম বলবান্বসুধাধিপঃ
তেন যুদ্ধমভূত্তস্য বিজয়স্যাতিভৈরবম্

তং চাপি বশমানীয় কিরীটী পুরুষর্ষভঃ
নিষাদরাজ্ঞো বিষয়মেকলব্যস্য জগ্মিবান্

একলব্যসুতশ্চৈনং যুদ্ধেন জগৃহে তদা
ততশ্চক্রে নিষাদৈঃ স সংগ্রামং রোমহর্ষণম্

ততস্তমপি কৌন্তেয়ঃ সমরেষ্বপরাজিতঃ
জিগায় সমরে বীরো যজ্ঞবিঘ্নার্থমুদ্যতম্

স তং জিত্বা মহারাজ নৈষাদিং পাকশাসনিঃ
অর্চিতঃ প্রয়য়ৌ ভূয়ো দক্ষিণং সলিলার্ণবম্

তত্রাপি দ্রবিডৈরন্ধ্রৈ রৌদ্রৈর্মাহিষকৈরপি
তথা কোল্লগিরেয়ৈশ্চ যুদ্ধমাসীত্কিরীটিনঃ

তুরগস্য বশেনাথ সুরাষ্ট্রানভিতো যয়ৌ
গোকর্ণমপি চাসাদ্য প্রভাসমপি জগ্মিবান্

ততো দ্বারবতীং রম্যাং বৃষ্ণিবীরাভিরক্ষিতাম্
আসসাদ হয়ঃ শ্রীমান্কুরুরাজস্য যজ্ঞিয়ঃ

তমুন্মথ্য হয়শ্রেষ্ঠং যাদবানাং কুমারকাঃ
প্রয়য়ুস্তাংস্তদা রাজন্নুগ্রসেনো ন্যবারয়ৎ

ততঃ পুর্যা বিনিষ্ক্রম্য বৃষ্ণ্যন্ধকপতিস্তদা
সহিতো বসুদেবেন মাতুলেন কিরীটিনঃ

তৌ সমেত্য কুরুশ্রেষ্ঠং বিধিবত্প্রীতিপূর্বকম্
পরয়া ভরতশ্রেষ্ঠং পূজয়া সমবস্থিতৌ
ততস্তাভ্যামনুজ্ঞাতো যয়ৌ যেন হয়ো গতঃ

ততঃ স পশ্চিমং দেশং সমুদ্রস্য তদা হয়ঃ
ক্রমেণ ব্যচরত্স্ফীতং ততঃ পঞ্চনদং যয়ৌ

তস্মাদপি স কৌরব্য গান্ধারবিষয়ং হয়ঃ
বিচচার যথাকামং কৌন্তেয়ানুগতস্তদা

তত্র গান্ধাররাজেন যুদ্ধমাসীন্মহাত্মনঃ
ঘোরং শকুনিপুত্রেণ পূর্ববৈরানুসারিণা