অধ্যায় 85

85.1

বৈশংপায়ন উবাচ
শকুনেস্তু সুতো বীরো গান্ধারাণাং মহারথঃ
প্রত্যুদ্যয়ৌ গুডাকেশং সৈন্যেন মহতা বৃতঃ
হস্ত্যশ্বরথপূর্ণেন পতাকাধ্বজমালিনা

অমৃষ্যমাণাস্তে যোধা নৃপতেঃ শকুনের্বধম্
অভ্যয়ুঃ সহিতাঃ পার্থং প্রগৃহীতশরাসনাঃ

তানুবাচ স ধর্মাত্মা বীভত্সুরপরাজিতঃ
যুধিষ্ঠিরস্য বচনং ন চ তে জগৃহুর্হিতম্

বার্যমাণাস্তু পার্থেন সান্ত্বপূর্বমমর্ষিতাঃ
পরিবার্য হয়ং জগ্মুস্ততশ্চুক্রোধ পাণ্ডবঃ

ততঃ শিরাংসি দীপ্তাগ্রৈস্তেষাং চিচ্ছেদ পাণ্ডবঃ
ক্ষুরৈর্গাণ্ডীবনির্মুক্তৈর্নাতিয়ত্নাদিবার্জুনঃ

তে বধ্যমানাঃ পার্থেন হয়মুত্সৃজ্য সংভ্রমাৎ
ন্যবর্তন্ত মহারাজ শরবর্ষার্দিতা ভৃশম্

বিতুদ্যমানস্তৈশ্চাপি গান্ধারৈঃ পাণ্ডবর্ষভঃ
আদিশ্যাদিশ্য তেজস্বী শিরাংস্যেষাং ন্যপাতয়ৎ

বধ্যমানেষু তেষ্বাজৌ গান্ধারেষু সমন্ততঃ
স রাজা শকুনেঃ পুত্রঃ পাণ্ডবং প্রত্যবারয়ৎ

তং যুধ্যমানং রাজানং ক্ষত্রধর্মে ব্যবস্থিতম্
পার্থোঽব্রবীন্ন মে বধ্যা রাজানো রাজশাসনাৎ
অলং যুদ্ধেন তে বীর ন তেঽস্ত্যদ্য পরাজয়ঃ

ইত্যুক্তস্তদনাদৃত্য বাক্যমজ্ঞানমোহিতঃ
স শক্রসমকর্মাণমবাকিরত সায়কৈঃ

তস্য পার্থঃ শিরস্ত্রাণমর্ধচন্দ্রেণ পত্রিণা
অপাহরদসংভ্রান্তো জয়দ্রথশিরো যথা

তদ্দৃষ্ট্বা বিস্ময়ং জগ্মুর্গান্ধারাঃ সর্ব এব তে
ইচ্ছতা তেন ন হতো রাজেত্যপি চ তে বিদুঃ

গান্ধাররাজপুত্রস্তু পলায়নকৃতক্ষণঃ
বভৌ তৈরেব সহিতস্ত্রস্তৈঃ ক্ষুদ্রমৃগৈরিব

তেষাং তু তরসা পার্থস্তত্রৈব পরিধাবতাম্
বিজহারোত্তমাঙ্গানি ভল্লৈঃ সংনতপর্বভিঃ

উচ্ছ্রিতাংস্তু ভুজান্কেচিন্নাবুধ্যন্ত শরৈর্হৃতান্
শরৈর্গাণ্ডীবনির্মুক্তৈঃ পৃথুভিঃ পার্থচোদিতৈঃ

সংভ্রান্তনরনাগাশ্বমথ তদ্বিদ্রুতং বলম্
হতবিধ্বস্তভূয়িষ্ঠমাবর্তত মুহুর্মুহুঃ

ন হ্যদৃশ্যন্ত বীরস্য কেচিদগ্রেঽগ্র্যকর্মণঃ
রিপবঃ পাত্যমানা বৈ যে সহেয়ুর্মহাশরান্

ততো গান্ধাররাজস্য মন্ত্রিবৃদ্ধপুরঃসরা
জননী নির্যয়ৌ ভীতা পুরস্কৃত্যার্ঘ্যমুত্তমম্

সা ন্যবারয়দব্যগ্রা তং পুত্রং যুদ্ধদুর্মদম্
প্রসাদয়ামাস চ তং জিষ্ণুমক্লিষ্টকারিণম্

তাং পূজয়িত্বা কৌন্তেয়ঃ প্রসাদমকরোত্তদা
শকুনেশ্চাপি তনয়ং সান্ত্বয়ন্নিদমব্রবীৎ

ন মে প্রিয়ং মহাবাহো যত্তে বুদ্ধিরিয়ং কৃতা
প্রতিয়োদ্ধুমমিত্রঘ্ন ভ্রাতৈব ত্বং মমানঘ

গান্ধারীং মাতরং স্মৃত্বা ধৃতরাষ্ট্রকৃতেন চ
তেন জীবসি রাজংস্ত্বং নিহতাস্ত্বনুগাস্তব

মৈবং ভূঃ শাম্যতাং বৈরং মা তে ভূদ্বুদ্ধিরীদৃশী
আগন্তব্যং পরাং চৈত্রীমশ্বমেধে নৃপস্য নঃ