অধ্যায় 86

86.1

বৈশংপায়ন উবাচ
ইত্যুক্ত্বানুয়য়ৌ পার্থো হয়ং তং কামচারিণম্
ন্যবর্তত ততো বাজী যেন নাগাহ্বয়ং পুরম্

86.2

তং নিবৃত্তং তু শুশ্রাব চারেণৈব যুধিষ্ঠিরঃ
শ্রুত্বার্জুনং কুশলিনং স চ হৃষ্টমনাভবৎ

86.3

বিজয়স্য চ তত্কর্ম গান্ধারবিষয়ে তদা
শ্রুত্বান্যেষু চ দেশেষু স সুপ্রীতোঽভবন্নৃপঃ

86.4

এতস্মিন্নেব কালে তু দ্বাদশীং মাঘপাক্ষিকীম্
ইষ্টং গৃহীত্বা নক্ষত্রং ধর্মরাজো যুধিষ্ঠিরঃ

86.5

সমানায্য মহাতেজাঃ সর্বান্ভ্রাতৄন্মহামনাঃ
ভীমং চ নকুলং চৈব সহদেবং চ কৌরবঃ

86.6

প্রোবাচেদং বচঃ কালে তদা ধর্মভৃতাং বরঃ
আমন্ত্র্য বদতাং শ্রেষ্ঠো ভীমং ভীমপরাক্রমম্

86.7

আয়াতি ভীমসেনাসৌ সহাশ্বেন তবানুজঃ
যথা মে পুরুষাঃ প্রাহুর্যে ধনংজয়সারিণঃ

86.8

উপস্থিতশ্চ কালোঽয়মভিতো বর্ততে হয়ঃ
মাঘী চ পৌর্ণমাসীয়ং মাসঃ শেষো বৃকোদর

86.9

তত্প্রস্থাপ্যন্তু বিদ্বাংসো ব্রাহ্মণা বেদপারগাঃ
বাজিমেধার্থসিদ্ধ্যর্থং দেশং পশ্যন্তু যজ্ঞিয়ম্

86.10

ইত্যুক্তঃ স তু তচ্চক্রে ভীমো নৃপতিশাসনম্
হৃষ্টঃ শ্রুত্বা নরপতেরায়ান্তং সব্যসাচিনম্

86.11

ততো যয়ৌ ভীমসেনঃ প্রাজ্ঞৈঃ স্থপতিভিঃ সহ
ব্রাহ্মণানগ্রতঃ কৃত্বা কুশলান্যজ্ঞকর্মসু

86.12

তং সশালচয়গ্রামং সংপ্রতোলীবিটঙ্কিনম্
মাপয়ামাস কৌরব্যো যজ্ঞবাটং যথাবিধি

86.13

সদঃ সপত্নীসদনং সাগ্নীধ্রমপি চোত্তরম্
কারয়ামাস বিধিবন্মণিহেমবিভূষিতম্

86.14

স্তম্ভান্কনকচিত্রাংশ্চ তোরণানি বৃহন্তি চ
যজ্ঞায়তনদেশেষু দত্ত্বা শুদ্ধং চ কাঞ্চনম্

86.15

অন্তঃপুরাণি রাজ্ঞাং চ নানাদেশনিবাসিনাম্
কারয়ামাস ধর্মাত্মা তত্র তত্র যথাবিধি

86.16

ব্রাহ্মণানাং চ বেশ্মানি নানাদেশসমেয়ুষাম্
কারয়ামাস ভীমঃ স বিবিধানি হ্যনেকশঃ

86.17

তথা সংপ্রেষয়ামাস দূতান্নৃপতিশাসনাৎ
ভীমসেনো মহারাজ রাজ্ঞামক্লিষ্টকর্মণাম্

86.18

তে প্রিয়ার্থং কুরুপতেরায়য়ুর্নৃপসত্তমাঃ
রত্নান্যনেকান্যাদায় স্ত্রিয়োঽশ্বানায়ুধানি চ

86.19

তেষাং নিবিশতাং তেষু শিবিরেষু সহস্রশঃ
নর্দতঃ সাগরস্যেব শব্দো দিবমিবাস্পৃশৎ

86.20

তেষামভ্যাগতানাং স রাজা রাজীবলোচনঃ
ব্যাদিদেশান্নপানানি শয্যাশ্চাপ্যতিমানুষাঃ

86.21

বাহনানাং চ বিবিধাঃ শালাঃ শালীক্ষুগোরসৈঃ
উপেতাঃ পুরুষব্যাঘ্র ব্যাদিদেশ স ধর্মরাট্

86.22

তথা তস্মিন্মহায়জ্ঞে ধর্মরাজস্য ধীমতঃ
সমাজগ্মুর্মুনিগণা বহবো ব্রহ্মবাদিনঃ

86.23

যে চ দ্বিজাতিপ্রবরাস্তত্রাসন্পৃথিবীপতে
সমাজগ্মুঃ সশিষ্যাংস্তান্প্রতিজগ্রাহ কৌরবঃ

86.24

সর্বাংশ্চ তাননুয়য়ৌ যাবদাবসথাদিতি
স্বয়মেব মহাতেজা দম্ভং ত্যক্ত্বা যুধিষ্ঠিরঃ

86.25

ততঃ কৃত্বা স্থপতয়ঃ শিল্পিনোঽন্যে চ যে তদা
কৃত্স্নং যজ্ঞবিধিং রাজন্ধর্মরাজ্ঞে ন্যবেদয়ন্

86.26

তচ্ছ্রুত্বা ধর্মরাজঃ স কৃতং সর্বমনিন্দিতম্
হৃষ্টরূপোঽভবদ্রাজা সহ ভ্রাতৃভিরচ্যুতঃ

Contains text from DharmicData, made available under the Open Database License (ODbL). Simple meanings are written by AI and can contain mistakes.