অধ্যায় 87

87.1

বৈশংপায়ন উবাচ
তস্মিন্যজ্ঞে প্রবৃত্তে তু বাগ্মিনো হেতুবাদিনঃ
হেতুবাদান্বহূন্প্রাহুঃ পরস্পরজিগীষবঃ

দদৃশুস্তং নৃপতয়ো যজ্ঞস্য বিধিমুত্তমম্
দেবেন্দ্রস্যেব বিহিতং ভীমেন কুরুনন্দন

দদৃশুস্তোরণান্যত্র শাতকুম্ভময়ানি তে
শয্যাসনবিহারাংশ্চ সুবহূন্রত্নভূষিতান্

ঘটান্পাত্রীঃ কটাহানি কলশান্বর্ধমানকান্
ন হি কিংচিদসৌবর্ণমপশ্যংস্তত্র পার্থিবাঃ

যূপাংশ্চ শাস্ত্রপঠিতান্দারবান্হেমভূষিতান্
উপকৢপ্তান্যথাকালং বিধিবদ্ভূরিবর্চসঃ

স্থলজা জলজা যে চ পশবঃ কেচন প্রভো
সর্বানেব সমানীতাংস্তানপশ্যন্ত তে নৃপাঃ

গাশ্চৈব মহিষীশ্চৈব তথা বৃদ্ধাঃ স্ত্রিয়োঽপি চ
ঔদকানি চ সত্ত্বানি শ্বাপদানি বয়াংসি চ

জরায়ুজান্যণ্ডজানি স্বেদজান্যুদ্ভিদানি চ
পর্বতানূপবন্যানি ভূতানি দদৃশুশ্চ তে

এবং প্রমুদিতং সর্বং পশুগোধনধান্যতঃ
যজ্ঞবাটং নৃপা দৃষ্ট্বা পরং বিস্ময়মাগমন্
ব্রাহ্মণানাং বিশাং চৈব বহুমৃষ্টান্নমৃদ্ধিমৎ

পূর্ণে শতসহস্রে তু বিপ্রাণাং তত্র ভুঞ্জতাম্
দুন্দুভির্মেঘনির্ঘোষো মুহুর্মুহুরতাড্যত

বিননাদাসকৃত্সোঽথ দিবসে দিবসে তদা
এবং স ববৃতে যজ্ঞো ধর্মরাজস্য ধীমতঃ

অন্নস্য বহবো রাজন্নুত্সর্গাঃ পর্বতোপমাঃ
দধিকুল্যাশ্চ দদৃশুঃ সর্পিষশ্চ হ্রদাঞ্জনাঃ

জম্বূদ্বীপো হি সকলো নানাজনপদায়ুতঃ
রাজন্নদৃশ্যতৈকস্থো রাজ্ঞস্তস্মিন্মহাক্রতৌ

তত্র জাতিসহস্রাণি পুরুষাণাং ততস্ততঃ
গৃহীত্বা ধনমাজগ্মুর্বহূনি ভরতর্ষভ

রাজানঃ স্রগ্বিণশ্চাপি সুমৃষ্টমণিকুণ্ডলাঃ
পর্যবেষন্দ্বিজাগ্র্যাংস্তাঞ্শতশোঽথ সহস্রশঃ

বিবিধান্যন্নপানানি পুরুষা যেঽনুয়ায়িনঃ
তেষাং নৃপোপভোজ্যানি ব্রাহ্মণেভ্যো দদুঃ স্ম তে