অধ্যায় 88

88.1

বৈশংপায়ন উবাচ
সমাগতান্বেদবিদো রাজ্ঞশ্চ পৃথিবীশ্বরান্
দৃষ্ট্বা যুধিষ্ঠিরো রাজা ভীমসেনমথাব্রবীৎ

উপয়াতা নরব্যাঘ্রা য ইমে জগদীশ্বরাঃ
এতেষাং ক্রিয়তাং পূজা পূজার্হা হি নরেশ্বরাঃ

ইত্যুক্তঃ স তথা চক্রে নরেন্দ্রেণ যশস্বিনা
ভীমসেনো মহাতেজা যমাভ্যাং সহ ভারত

অথাভ্যগচ্ছদ্গোবিন্দো বৃষ্ণিভিঃ সহ ধর্মজম্
বলদেবং পুরস্কৃত্য সর্বপ্রাণভৃতাং বরঃ

যুয়ুধানেন সহিতঃ প্রদ্যুম্নেন গদেন চ
নিশঠেনাথ সাম্বেন তথৈব কৃতবর্মণা

তেষামপি পরাং পূজাং চক্রে ভীমো মহাভুজঃ
বিবিশুস্তে চ বেশ্মানি রত্নবন্তি নরর্ষভাঃ

যুধিষ্ঠিরসমীপে তু কথান্তে মধুসূদনঃ
অর্জুনং কথয়ামাস বহুসংগ্রামকর্শিতম্

স তং পপ্রচ্ছ কৌন্তেয়ঃ পুনঃ পুনররিংদমম্
ধর্মরাড্ভ্রাতরং জিষ্ণুং সমাচষ্ট জগত্পতিঃ

আগমদ্দ্বারকাবাসী মমাপ্তঃ পুরুষো নৃপ
যোঽদ্রাক্ষীত্পাণ্ডবশ্রেষ্ঠং বহুসংগ্রামকর্শিতম্

সমীপে চ মহাবাহুমাচষ্ট চ মম প্রভো
কুরু কার্যাণি কৌন্তেয় হয়মেধার্থসিদ্ধয়ে

ইত্যুক্তঃ প্রত্যুবাচৈনং ধর্মরাজো যুধিষ্ঠিরঃ
দিষ্ট্যা স কুশলী জিষ্ণুরুপয়াতি চ মাধব

তব যত্সংদিদেশাসৌ পাণ্ডবানাং বলাগ্রণীঃ
তদাখ্যাতুমিহেচ্ছামি ভবতা যদুনন্দন

ইত্যুক্তে রাজশার্দূল বৃষ্ণ্যন্ধকপতিস্তদা
প্রোবাচেদং বচো বাগ্মী ধর্মাত্মানং যুধিষ্ঠিরম্

ইদমাহ মহারাজ পার্থবাক্যং নরঃ স মাম্
বাচ্যো যুধিষ্ঠিরঃ কৃষ্ণ কালে বাক্যমিদং মম

আগমিষ্যন্তি রাজানঃ সর্বতঃ কৌরবান্প্রতি
তেষামেকৈকশঃ পূজা কার্যেত্যেতত্ক্ষমং হি নঃ

ইত্যেতদ্বচনাদ্রাজা বিজ্ঞাপ্যো মম মানদ
ন তদাত্যয়িকং হি স্যাদ্যদর্ঘ্যানয়নে ভবেৎ

কর্তুমর্হতি তদ্রাজা ভবাংশ্চাপ্যনুমন্যতাম্
রাজদ্বেষাদ্বিনশ্যেয়ুর্নেমা রাজন্প্রজাঃ পুনঃ

ইদমন্যচ্চ কৌন্তেয় বচঃ স পুরুষোঽব্রবীৎ
ধনংজয়স্য নৃপতে তন্মে নিগদতঃ শৃণু

উপয়াস্যতি যজ্ঞং নো মণিপূরপতির্নৃপঃ
পুত্রো মম মহাতেজা দয়িতো বভ্রুবাহনঃ

তং ভবান্মদপেক্ষার্থং বিধিবত্প্রতিপূজয়েৎ
স হি ভক্তোঽনুরক্তশ্চ মম নিত্যমিতি প্রভো

ইত্যেতদ্বচনং শ্রুত্বা ধর্মরাজো যুধিষ্ঠিরঃ
অভিনন্দ্যাস্য তদ্বাক্যমিদং বচনমব্রবীৎ