Utshovঅধ্যায় 89
89.1
যুধিষ্ঠির উবাচ
শ্রুতং প্রিয়মিদং কৃষ্ণ যত্ত্বমর্হসি ভাষিতুম্
তন্মেঽমৃতরসপ্রখ্যং মনো হ্লাদয়তে বিভো
89.2
বহূনি কিল যুদ্ধানি বিজয়স্য নরাধিপৈঃ
পুনরাসন্হৃষীকেশ তত্র তত্রেতি মে শ্রুতম্
89.3
মন্নিমিত্তং হি স সদা পার্থঃ সুখবিবর্জিতঃ
অতীব বিজয়ো ধীমানিতি মে দূয়তে মনঃ
89.4
সংচিন্তয়ামি বার্ষ্ণেয় সদা কুন্তীসুতং রহঃ
কিং নু তস্য শরীরেঽস্তি সর্বলক্ষণপূজিতে
অনিষ্টং লক্ষণং কৃষ্ণ যেন দুঃখান্যুপাশ্নুতে
89.5
অতীব দুঃখভাগী স সততং কুন্তিনন্দনঃ
ন চ পশ্যামি বীভত্সোর্নিন্দ্যং গাত্রেষু কিংচন
শ্রোতব্যং চেন্ময়ৈতদ্বৈ তন্মে ব্যাখ্যাতুমর্হসি
89.6
ইত্যুক্তঃ স হৃষীকেশো ধ্যাত্বা সুমহদন্তরম্
রাজানং ভোজরাজন্যবর্ধনো বিষ্ণুরব্রবীৎ
89.7
ন হ্যস্য নৃপতে কিংচিদনিষ্টমুপলক্ষয়ে
ঋতে পুরুষসিংহস্য পিণ্ডিকেঽস্যাতিকায়তঃ
89.8
তাভ্যাং স পুরুষব্যাঘ্রো নিত্যমধ্বসু যুজ্যতে
ন হ্যন্যদনুপশ্যামি যেনাসৌ দুঃখভাগ্জয়ঃ
89.9
ইত্যুক্তঃ স কুরুশ্রেষ্ঠস্তথ্যং কৃষ্ণেন ধীমতা
প্রোবাচ বৃষ্ণিশার্দূলমেবমেতদিতি প্রভো
89.10
কৃষ্ণা তু দ্রৌপদী কৃষ্ণং তির্যক্সাসূয়মৈক্ষত
প্রতিজগ্রাহ তস্যাস্তং প্রণয়ং চাপি কেশিহা
সখ্যুঃ সখা হৃষীকেশঃ সাক্ষাদিব ধনংজয়ঃ
89.11
তত্র ভীমাদয়স্তে তু কুরবো যাদবাস্তথা
রেমুঃ শ্রুত্বা বিচিত্রার্থা ধনংজয়কথা বিভো
89.12
তথা কথয়তামেব তেষামর্জুনসংকথাঃ
উপায়াদ্বচনান্মর্ত্যো বিজয়স্য মহাত্মনঃ
89.13
সোঽভিগম্য কুরুশ্রেষ্ঠং নমস্কৃত্য চ বুদ্ধিমান্
উপায়াতং নরব্যাঘ্রমর্জুনং প্রত্যবেদয়ৎ
89.14
তচ্ছ্রুত্বা নৃপতিস্তস্য হর্ষবাষ্পাকুলেক্ষণঃ
প্রিয়াখ্যাননিমিত্তং বৈ দদৌ বহু ধনং তদা
89.15
ততো দ্বিতীয়ে দিবসে মহাঞ্শব্দো ব্যবর্ধত
আয়াতি পুরুষব্যাঘ্রে পাণ্ডবানাং ধুরংধরে
89.16
ততো রেণুঃ সমুদ্ভূতো বিবভৌ তস্য বাজিনঃ
অভিতো বর্তমানস্য যথোচ্চৈঃশ্রবসস্তথা
89.17
তত্র হর্ষকলা বাচো নরাণাং শুশ্রুবেঽর্জুনঃ
দিষ্ট্যাসি পার্থ কুশলী ধন্যো রাজা যুধিষ্ঠিরঃ
89.18
কোঽন্যো হি পৃথিবীং কৃত্স্নামবজিত্য সপার্থিবাম্
চারয়িত্বা হয়শ্রেষ্ঠমুপায়ায়াদৃতেঽর্জুনম্
89.19
যে ব্যতীতা মহাত্মানো রাজানঃ সগরাদয়ঃ
তেষামপীদৃশং কর্ম ন কিংচিদনুশুশ্রুম
89.20
নৈতদন্যে করিষ্যন্তি ভবিষ্যাঃ পৃথিবীক্ষিতঃ
যত্ত্বং কুরুকুলশ্রেষ্ঠ দুষ্করং কৃতবানিহ
89.21
ইত্যেবং বদতাং তেষাং নৄণাং শ্রুতিসুখা গিরঃ
শৃণ্বন্বিবেশ ধর্মাত্মা ফল্গুনো যজ্ঞসংস্তরম্
89.22
ততো রাজা সহামাত্যঃ কৃষ্ণশ্চ যদুনন্দনঃ
ধৃতরাষ্ট্রং পুরস্কৃত্য তে তং প্রত্যুদ্যয়ুস্তদা
89.23
সোঽভিবাদ্য পিতুঃ পাদৌ ধর্মরাজস্য ধীমতঃ
ভীমাদীংশ্চাপি সংপূজ্য পর্যষ্বজত কেশবম্
89.24
তৈঃ সমেত্যার্চিতস্তান্স প্রত্যর্চ্য চ যথাবিধি
বিশশ্রামাথ ধর্মাত্মা তীরং লব্ধ্বেব পারগঃ
89.25
এতস্মিন্নেব কালে তু স রাজা বভ্রুবাহনঃ
মাতৃভ্যাং সহিতো ধীমান্কুরূনভ্যাজগাম হ
89.26
স সমেত্য কুরূন্সর্বান্সর্বৈস্তৈরভিনন্দিতঃ
প্রবিবেশ পিতামহ্যাঃ কুন্ত্যা ভবনমুত্তমম্