Utshovঅধ্যায় 90
90.1
বৈশংপায়ন উবাচ
স প্রবিশ্য যথান্যায়ং পাণ্ডবানাং নিবেশনম্
পিতামহীমভ্যবদত্সাম্না পরমবল্গুনা
90.2
তথা চিত্রাঙ্গদা দেবী কৌরব্যস্যাত্মজাপি চ
পৃথাং কৃষ্ণাং চ সহিতে বিনয়েনাভিজগ্মতুঃ
সুভদ্রাং চ যথান্যায়ং যাশ্চান্যাঃ কুরুয়োষিতঃ
90.3
দদৌ কুন্তী ততস্তাভ্যাং রত্নানি বিবিধানি চ
দ্রৌপদী চ সুভদ্রা চ যাশ্চাপ্যন্যা দদুঃ স্ত্রিয়ঃ
90.4
ঊষতুস্তত্র তে দেব্যৌ মহার্হশয়নাসনে
সুপূজিতে স্বয়ং কুন্ত্যা পার্থস্য প্রিয়কাম্যয়া
90.5
স চ রাজা মহাবীর্যঃ পূজিতো বভ্রুবাহনঃ
ধৃতরাষ্ট্রং মহীপালমুপতস্থে যথাবিধি
90.6
যুধিষ্ঠিরং চ রাজানং ভীমাদীংশ্চাপি পাণ্ডবান্
উপগম্য মহাতেজা বিনয়েনাভ্যবাদয়ৎ
90.7
স তৈঃ প্রেম্ণা পরিষ্বক্তঃ পূজিতশ্চ যথাবিধি
ধনং চাস্মৈ দদুর্ভূরি প্রীয়মাণা মহারথাঃ
90.8
তথৈব স মহীপালঃ কৃষ্ণং চক্রগদাধরম্
প্রদ্যুম্ন ইব গোবিন্দং বিনয়েনোপতস্থিবান্
90.9
তস্মৈ কৃষ্ণো দদৌ রাজ্ঞে মহার্হমভিপূজিতম্
রথং হেমপরিষ্কারং দিব্যাশ্বয়ুজমুত্তমম্
90.10
ধর্মরাজশ্চ ভীমশ্চ যমজৌ ফল্গুনস্তথা
পৃথক্পৃথগতীবৈনং মানার্হং সমপূজয়ন্
90.11
ততস্তৃতীয়ে দিবসে সত্যবত্যাঃ সুতো মুনিঃ
যুধিষ্ঠিরং সমভ্যেত্য বাগ্মী বচনমব্রবীৎ
90.12
অদ্য প্রভৃতি কৌন্তেয় যজস্ব সময়ো হি তে
মুহূর্তো যজ্ঞিয়ঃ প্রাপ্তশ্চোদয়ন্তি চ যাজকাঃ
90.13
অহীনো নাম রাজেন্দ্র ক্রতুস্তেঽয়ং বিকল্পবান্
বহুত্বাত্কাঞ্চনস্যাস্য খ্যাতো বহুসুবর্ণকঃ
90.14
এবমেব মহারাজ দক্ষিণাং ত্রিগুণাং কুরু
ত্রিত্বং ব্রজতু তে রাজন্ব্রাহ্মণা হ্যত্র কারণম্
90.15
ত্রীনশ্বমেধানত্র ত্বং সংপ্রাপ্য বহুদক্ষিণান্
জ্ঞাতিবধ্যাকৃতং পাপং প্রহাস্যসি নরাধিপ
90.16
পবিত্রং পরমং হ্যেতত্পাবনানাং চ পাবনম্
যদশ্বমেধাবভৃথং প্রাপ্স্যসে কুরুনন্দন
90.17
ইত্যুক্তঃ স তু তেজস্বী ব্যাসেনামিততেজসা
দীক্ষাং বিবেশ ধর্মাত্মা বাজিমেধাপ্তয়ে তদা
নরাধিপঃ প্রায়জত বাজিমেধং মহাক্রতুম্
90.18
তত্র বেদবিদো রাজংশ্চক্রুঃ কর্মাণি যাজকাঃ
পরিক্রমন্তঃ শাস্ত্রজ্ঞা বিধিবত্সাধুশিক্ষিতাঃ
90.19
ন তেষাং স্খলিতং তত্র নাসীদপহুতং তথা
ক্রময়ুক্তং চ যুক্তং চ চক্রুস্তত্র দ্বিজর্ষভাঃ
90.20
কৃত্বা প্রবর্গ্যং ধর্মজ্ঞা যথাবদ্দ্বিজসত্তমাঃ
চক্রুস্তে বিধিবদ্রাজংস্তথৈবাভিষবং দ্বিজাঃ
90.21
অভিষূয় ততো রাজন্সোমং সোমপসত্তমাঃ
সবনান্যানুপূর্ব্যেণ চক্রুঃ শাস্ত্রানুসারিণঃ
90.22
ন তত্র কৃপণঃ কশ্চিন্ন দরিদ্রো বভূব হ
ক্ষুধিতো দুঃখিতো বাপি প্রাকৃতো বাপি মানবঃ
90.23
ভোজনং ভোজনার্থিভ্যো দাপয়ামাস নিত্যদা
ভীমসেনো মহাতেজাঃ সততং রাজশাসনাৎ
90.24
সংস্তরে কুশলাশ্চাপি সর্বকর্মাণি যাজকাঃ
দিবসে দিবসে চক্রুর্যথাশাস্ত্রার্থচক্ষুষঃ
90.25
নাষডঙ্গবিদত্রাসীত্সদস্যস্তস্য ধীমতঃ
নাব্রতো নানুপাধ্যায়ো ন চ বাদাক্ষমো দ্বিজঃ
90.26
ততো যূপোচ্ছ্রয়ে প্রাপ্তে ষড্বৈল্বান্ভরতর্ষভ
খাদিরান্বিল্বসমিতাংস্তাবতঃ সর্ববর্ণিনঃ
90.27
দেবদারুময়ৌ দ্বৌ তু যূপৌ কুরুপতেঃ ক্রতৌ
শ্লেষ্মাতকময়ং চৈকং যাজকাঃ সমকারয়ন্
90.28
শোভার্থং চাপরান্যূপান্কাঞ্চনান্পুরুষর্ষভ
স ভীমঃ কারয়ামাস ধর্মরাজস্য শাসনাৎ
90.29
তে ব্যরাজন্ত রাজর্ষে বাসোভিরুপশোভিতাঃ
নরেন্দ্রাভিগতা দেবান্যথা সপ্তর্ষয়ো দিবি
90.30
ইষ্টকাঃ কাঞ্চনীশ্চাত্র চয়নার্থং কৃতাভবন্
শুশুভে চয়নং তত্র দক্ষস্যেব প্রজাপতেঃ
90.31
চতুশ্চিত্যঃ স তস্যাসীদষ্টাদশকরাত্মকঃ
স রুক্মপক্ষো নিচিতস্ত্রিগুণো গরুডাকৃতিঃ
90.32
ততো নিয়ুক্তাঃ পশবো যথাশাস্ত্রং মনীষিভিঃ
তং তং দেবং সমুদ্দিশ্য পক্ষিণঃ পশবশ্চ যে
90.33
ঋষভাঃ শাস্ত্রপঠিতাস্তথা জলচরাশ্চ যে
সর্বাংস্তানভ্যয়ুঞ্জংস্তে তত্রাগ্নিচয়কর্মণি
90.34
যূপেষু নিয়তং চাসীত্পশূনাং ত্রিশতং তথা
অশ্বরত্নোত্তরং রাজ্ঞঃ কৌন্তেয়স্য মহাত্মনঃ
90.35
স যজ্ঞঃ শুশুভে তস্য সাক্ষাদ্দেবর্ষিসংকুলঃ
গন্ধর্বগণসংকীর্ণঃ শোভিতোঽপ্সরসাং গণৈঃ
90.36
স কিংপুরুষগীতৈশ্চ কিংনরৈরুপশোভিতঃ
সিদ্ধবিপ্রনিবাসৈশ্চ সমন্তাদভিসংবৃতঃ
90.37
তস্মিন্সদসি নিত্যাস্তু ব্যাসশিষ্যা দ্বিজোত্তমাঃ
সর্বশাস্ত্রপ্রণেতারঃ কুশলা যজ্ঞকর্মসু
90.38
নারদশ্চ বভূবাত্র তুম্বুরুশ্চ মহাদ্যুতিঃ
বিশ্বাবসুশ্চিত্রসেনস্তথান্যে গীতকোবিদাঃ
90.39
গন্ধর্বা গীতকুশলা নৃত্তেষু চ বিশারদাঃ
রময়ন্তি স্ম তান্বিপ্রান্যজ্ঞকর্মান্তরেষ্বথ