Utshovঅধ্যায় 91
91.1
বৈশংপায়ন উবাচ
শময়িত্বা পশূনন্যান্বিধিবদ্দ্বিজসত্তমাঃ
তুরগং তং যথাশাস্ত্রমালভন্ত দ্বিজাতয়ঃ
91.2
ততঃ সংজ্ঞাপ্য তুরগং বিধিবদ্যাজকর্ষভাঃ
উপসংবেশয়ন্রাজংস্ততস্তাং দ্রুপদাত্মজাম্
কলাভিস্তিসৃভী রাজন্যথাবিধি মনস্বিনীম্
91.3
উদ্ধৃত্য তু বপাং তস্য যথাশাস্ত্রং দ্বিজর্ষভাঃ
শ্রপয়ামাসুরব্যগ্রাঃ শাস্ত্রবদ্ভরতর্ষভ
91.4
তং বপাধূমগন্ধং তু ধর্মরাজঃ সহানুজঃ
উপাজিঘ্রদ্যথান্যায়ং সর্বপাপ্মাপহং তদা
91.5
শিষ্টান্যঙ্গানি যান্যাসংস্তস্যাশ্বস্য নরাধিপ
তান্যগ্নৌ জুহুবুর্ধীরাঃ সমস্তাঃ ষোডশর্ত্বিজঃ
91.6
সংস্থাপ্যৈবং তস্য রাজ্ঞস্তং ক্রতুং শক্রতেজসঃ
ব্যাসঃ সশিষ্যো ভগবান্বর্ধয়ামাস তং নৃপম্
91.7
ততো যুধিষ্ঠিরঃ প্রাদাত্সদস্যেভ্যো যথাবিধি
কোটীসহস্রং নিষ্কাণাং ব্যাসায় তু বসুংধরাম্
91.8
প্রতিগৃহ্য ধরাং রাজন্ব্যাসঃ সত্যবতীসুতঃ
অব্রবীদ্ভরতশ্রেষ্ঠং ধর্মাত্মানং যুধিষ্ঠিরম্
91.9
পৃথিবী ভবতস্ত্বেষা সংন্যস্তা রাজসত্তম
নিষ্ক্রয়ো দীয়তাং মহ্যং ব্রাহ্মণা হি ধনার্থিনঃ
91.10
যুধিষ্ঠিরস্তু তান্বিপ্রান্প্রত্যুবাচ মহামনাঃ
ভ্রাতৃভিঃ সহিতো ধীমান্মধ্যে রাজ্ঞাং মহাত্মনাম্
91.11
অশ্বমেধে মহায়জ্ঞে পৃথিবী দক্ষিণা স্মৃতা
অর্জুনেন জিতা সেয়মৃত্বিগ্ভ্যঃ প্রাপিতা ময়া
91.12
বনং প্রবেক্ষ্যে বিপ্রেন্দ্রা বিভজধ্বং মহীমিমাম্
চতুর্ধা পৃথিবীং কৃত্বা চাতুর্হোত্রপ্রমাণতঃ
91.13
নাহমাদাতুমিচ্ছামি ব্রহ্মস্বং মুনিসত্তমাঃ
ইদং হি মে মতং নিত্যং ভ্রাতৄণাং চ মমানঘাঃ
91.14
ইত্যুক্তবতি তস্মিংস্তে ভ্রাতরো দ্রৌপদী চ সা
এবমেতদিতি প্রাহুস্তদভূদ্রোমহর্ষণম্
91.15
ততোঽন্তরিক্ষে বাগাসীত্সাধু সাধ্বিতি ভারত
তথৈব দ্বিজসংঘানাং শংসতাং বিবভৌ স্বনঃ
91.16
দ্বৈপায়নস্তথোক্তস্তু পুনরেব যুধিষ্ঠিরম্
উবাচ মধ্যে বিপ্রাণামিদং সংপূজয়ন্মুনিঃ
91.17
দত্তৈষা ভবতা মহ্যং তাং তে প্রতিদদাম্যহম্
হিরণ্যং দীয়তামেভ্যো দ্বিজাতিভ্যো ধরাস্তু তে
91.18
ততোঽব্রবীদ্বাসুদেবো ধর্মরাজং যুধিষ্ঠিরম্
যথাহ ভগবান্ব্যাসস্তথা তত্কর্তুমর্হসি
91.19
ইত্যুক্তঃ স কুরুশ্রেষ্ঠঃ প্রীতাত্মা ভ্রাতৃভিঃ সহ
কোটিকোটিকৃতাং প্রাদাদ্দক্ষিণাং ত্রিগুণাং ক্রতোঃ
91.20
ন করিষ্যতি তল্লোকে কশ্চিদন্যো নরাধিপঃ
যত্কৃতং কুরুসিংহেন মরুত্তস্যানুকুর্বতা
91.21
প্রতিগৃহ্য তু তদ্দ্রব্যং কৃষ্ণদ্বৈপায়নঃ প্রভুঃ
ঋত্বিগ্ভ্যঃ প্রদদৌ বিদ্বাংশ্চতুর্ধা ব্যভজংশ্চ তে
91.22
পৃথিব্যা নিষ্ক্রয়ং দত্ত্বা তদ্ধিরণ্যং যুধিষ্ঠিরঃ
ধূতপাপ্মা জিতস্বর্গো মুমুদে ভ্রাতৃভিঃ সহ
91.23
ঋত্বিজস্তমপর্যন্তং সুবর্ণনিচয়ং তদা
ব্যভজন্ত দ্বিজাতিভ্যো যথোত্সাহং যথাবলম্
91.24
যজ্ঞবাটে তু যত্কিংচিদ্ধিরণ্যমপি ভূষণম্
তোরণানি চ যূপাংশ্চ ঘটাঃ পাত্রীস্তথেষ্টকাঃ
যুধিষ্ঠিরাভ্যনুজ্ঞাতাঃ সর্বং তদ্ব্যভজন্দ্বিজাঃ
91.25
অনন্তরং ব্রাহ্মণেভ্যঃ ক্ষত্রিয়া জহ্রিরে বসু
তথা বিট্শূদ্রসংঘাশ্চ তথান্যে ম্লেচ্ছজাতয়ঃ
কালেন মহতা জহ্রুস্তত্সুবর্ণং ততস্ততঃ
91.26
ততস্তে ব্রাহ্মণাঃ সর্বে মুদিতা জগ্মুরালয়ান্
তর্পিতা বসুনা তেন ধর্মরাজ্ঞা মহাত্মনা
91.27
স্বমংশং ভগবান্ব্যাসঃ কুন্ত্যৈ পাদাভিবাদনাৎ
প্রদদৌ তস্য মহতো হিরণ্যস্য মহাদ্যুতিঃ
91.28
শ্বশুরাত্প্রীতিদায়ং তং প্রাপ্য সা প্রীতমানসা
চকার পুণ্যং লোকে তু সুমহান্তং পৃথা তদা
91.29
গত্বা ত্ববভৃথং রাজা বিপাপ্মা ভ্রাতৃভিঃ সহ
সভাজ্যমানঃ শুশুভে মহেন্দ্রো দৈবতৈরিব
91.30
পাণ্ডবাশ্চ মহীপালৈঃ সমেতৈঃ সংবৃতাস্তদা
অশোভন্ত মহারাজ গ্রহাস্তারাগণৈরিব
91.31
রাজভ্যোঽপি ততঃ প্রাদাদ্রত্নানি বিবিধানি চ
গজানশ্বানলংকারান্স্ত্রিয়ো বস্ত্রাণি কাঞ্চনম্
91.32
তদ্ধনৌঘমপর্যন্তং পার্থঃ পার্থিবমণ্ডলে
বিসৃজঞ্শুশুভে রাজা যথা বৈশ্রবণস্তথা
91.33
আনায্য চ তথা বীরং রাজানং বভ্রুবাহনম্
প্রদায় বিপুলং বিত্তং গৃহান্প্রাস্থাপয়ত্তদা
91.34
দুঃশলায়াশ্চ তং পৌত্রং বালকং পার্থিবর্ষভ
স্বরাজ্যে পিতৃভির্গুপ্তে প্রীত্যা সমভিষেচয়ৎ
91.35
রাজ্ঞশ্চৈবাপি তান্সর্বান্সুবিভক্তান্সুপূজিতান্
প্রস্থাপয়ামাস বশী কুরুরাজো যুধিষ্ঠিরঃ
91.36
এবং বভূব যজ্ঞঃ স ধর্মরাজস্য ধীমতঃ
বহ্বন্নধনরত্নৌঘঃ সুরামৈরেয়সাগরঃ
91.37
সর্পিঃপঙ্কা হ্রদা যত্র বহবশ্চান্নপর্বতাঃ
রসালাকর্দমাঃ কুল্যা বভূবুর্ভরতর্ষভ
91.38
ভক্ষ্যষাণ্ডবরাগাণাং ক্রিয়তাং ভুজ্যতামিতি
পশূনাং বধ্যতাং চাপি নান্তস্তত্র স্ম দৃশ্যতে
91.39
মত্তোন্মত্তপ্রমুদিতং প্রগীতয়ুবতীজনম্
মৃদঙ্গশঙ্খশব্দৈশ্চ মনোরমমভূত্তদা
91.40
দীয়তাং ভুজ্যতাং চেতি দিবারাত্রমবারিতম্
তং মহোত্সবসংকাশমতিহৃষ্টজনাকুলম্
কথয়ন্তি স্ম পুরুষা নানাদেশনিবাসিনঃ
91.41
বর্ষিত্বা ধনধারাভিঃ কামৈ রত্নৈর্ধনৈস্তথা
বিপাপ্মা ভরতশ্রেষ্ঠঃ কৃতার্থঃ প্রাবিশত্পুরম্