অধ্যায় 92

92.1

জনমেজয় উবাচ
পিতামহস্য মে যজ্ঞে ধর্মপুত্রস্য ধীমতঃ
যদাশ্চর্যমভূত্কিংচিত্তদ্ভবান্বক্তুমর্হতি

বৈশংপায়ন উবাচ
শ্রূয়তাং রাজশার্দূল মহদাশ্চর্যমুত্তমম্
অশ্বমেধে মহায়জ্ঞে নিবৃত্তে যদভূদ্বিভো

তর্পিতেষু দ্বিজাগ্র্যেষু জ্ঞাতিসংবন্ধিবন্ধুষু
দীনান্ধকৃপণে চাপি তদা ভরতসত্তম

ঘুষ্যমাণে মহাদানে দিক্ষু সর্বাসু ভারত
পতত্সু পুষ্পবর্ষেষু ধর্মরাজস্য মূর্ধনি

বিলান্নিষ্ক্রম্য নকুলো রুক্মপার্শ্বস্তদানঘ
বজ্রাশনিসমং নাদমমুঞ্চত বিশাং পতে

সকৃদুত্সৃজ্য তং নাদং ত্রাসয়ানো মৃগদ্বিজান্
মানুষং বচনং প্রাহ ধৃষ্টো বিলশয়ো মহান্

সক্তুপ্রস্থেন বো নায়ং যজ্ঞস্তুল্যো নরাধিপাঃ
উঞ্ছবৃত্তের্বদান্যস্য কুরুক্ষেত্রনিবাসিনঃ

তস্য তদ্বচনং শ্রুত্বা নকুলস্য বিশাং পতে
বিস্ময়ং পরমং জগ্মুঃ সর্বে তে ব্রাহ্মণর্ষভাঃ

ততঃ সমেত্য নকুলং পর্যপৃচ্ছন্ত তে দ্বিজাঃ
কুতস্ত্বং সমনুপ্রাপ্তো যজ্ঞং সাধুসমাগমম্

কিং বলং পরমং তুভ্যং কিং শ্রুতং কিং পরায়ণম্
কথং ভবন্তং বিদ্যাম যো নো যজ্ঞং বিগর্হসে

অবিলুপ্যাগমং কৃত্স্নং বিধিজ্ঞৈর্যাজকৈঃ কৃতম্
যথাগমং যথান্যায়ং কর্তব্যং চ যথাকৃতম্

পূজার্হাঃ পূজিতাশ্চাত্র বিধিবচ্ছাস্ত্রচক্ষুষা
মন্ত্রপূতং হুতশ্চাগ্নির্দত্তং দেয়মমত্সরম্

তুষ্টা দ্বিজর্ষভাশ্চাত্র দানৈর্বহুবিধৈরপি
ক্ষত্রিয়াশ্চ সুয়ুদ্ধেন শ্রাদ্ধৈরপি পিতামহাঃ

পালনেন বিশস্তুষ্টাঃ কামৈস্তুষ্টা বরস্ত্রিয়ঃ
অনুক্রোশৈস্তথা শূদ্রা দানশেষৈঃ পৃথগ্জনাঃ

জ্ঞাতিসংবন্ধিনস্তুষ্টাঃ শৌচেন চ নৃপস্য নঃ
দেবা হবির্ভিঃ পুণ্যৈশ্চ রক্ষণৈঃ শরণাগতাঃ

যদত্র তথ্যং তদ্ব্রূহি সত্যসংধ দ্বিজাতিষু
যথাশ্রুতং যথাদৃষ্টং পৃষ্টো ব্রাহ্মণকাম্যয়া

শ্রদ্ধেয়বাক্যঃ প্রাজ্ঞস্ত্বং দিব্যং রূপং বিভর্ষি চ
সমাগতশ্চ বিপ্রৈস্ত্বং তত্ত্বতো বক্তুমর্হসি

ইতি পৃষ্টো দ্বিজৈস্তৈঃ স প্রহস্য নকুলোঽব্রবীৎ
নৈষানৃতা ময়া বাণী প্রোক্তা দর্পেণ বা দ্বিজাঃ

যন্ময়োক্তমিদং কিংচিদ্যুষ্মাভিশ্চাপ্যুপশ্রুতম্
সক্তুপ্রস্থেন বো নায়ং যজ্ঞস্তুল্যো নরাধিপাঃ
উঞ্ছবৃত্তের্বদান্যস্য কুরুক্ষেত্রনিবাসিনঃ

ইত্যবশ্যং ময়ৈতদ্বো বক্তব্যং দ্বিজপুংগবাঃ
শৃণুতাব্যগ্রমনসঃ শংসতো মে দ্বিজর্ষভাঃ

অনুভূতং চ দৃষ্টং চ যন্ময়াদ্ভুতমুত্তমম্
উঞ্ছবৃত্তের্যথাবৃত্তং কুরুক্ষেত্রনিবাসিনঃ

স্বর্গং যেন দ্বিজঃ প্রাপ্তঃ সভার্যঃ সসুতস্নুষঃ
যথা চার্ধং শরীরস্য মমেদং কাঞ্চনীকৃতম্