Utshovঅধ্যায় 93
93.1
নকুল উবাচ
হন্ত বো বর্তয়িষ্যামি দানস্য পরমং ফলম্
ন্যায়লব্ধস্য সূক্ষ্মস্য বিপ্রদত্তস্য যদ্দ্বিজাঃ
93.2
ধর্মক্ষেত্রে কুরুক্ষেত্রে ধর্মজ্ঞৈর্বহুভির্বৃতে
উঞ্ছবৃত্তির্দ্বিজঃ কশ্চিত্কাপোতিরভবত্পুরা
93.3
সভার্যঃ সহ পুত্রেণ সস্নুষস্তপসি স্থিতঃ
বধূচতুর্থো বৃদ্ধঃ স ধর্মাত্মা নিয়তেন্দ্রিয়ঃ
93.4
ষষ্ঠে কালে তদা বিপ্রো ভুঙ্ক্তে তৈঃ সহ সুব্রতঃ
ষষ্ঠে কালে কদাচিচ্চ তস্যাহারো ন বিদ্যতে
ভুঙ্ক্তেঽন্যস্মিন্কদাচিত্স ষষ্ঠে কালে দ্বিজোত্তমঃ
93.5
কপোতধর্মিণস্তস্য দুর্ভিক্ষে সতি দারুণে
নাবিদ্যত তদা বিপ্রাঃ সংচয়স্তান্নিবোধত
ক্ষীণৌষধিসমাবায়ো দ্রব্যহীনোঽভবত্তদা
93.6
কালে কালেঽস্য সংপ্রাপ্তে নৈব বিদ্যেত ভোজনম্
ক্ষুধাপরিগতাঃ সর্বে প্রাতিষ্ঠন্ত তদা তু তে
93.7
উঞ্ছংস্তদা শুক্লপক্ষে মধ্যং তপতি ভাস্করে
উষ্ণার্তশ্চ ক্ষুধার্তশ্চ স বিপ্রস্তপসি স্থিতঃ
উঞ্ছমপ্রাপ্তবানেব সার্ধং পরিজনেন হ
93.8
স তথৈব ক্ষুধাবিষ্টঃ স্পৃষ্ট্বা তোয়ং যথাবিধি
ক্ষপয়ামাস তং কালং কৃচ্ছ্রপ্রাণো দ্বিজোত্তমঃ
93.9
অথ ষষ্ঠে গতে কালে যবপ্রস্থমুপার্জয়ৎ
যবপ্রস্থং চ তে সক্তূনকুর্বন্ত তপস্বিনঃ
93.10
কৃতজপ্যাহ্বিকাস্তে তু হুত্বা বহ্নিং যথাবিধি
কুডবং কুডবং সর্বে ব্যভজন্ত তপস্বিনঃ
93.11
অথাগচ্ছদ্দ্বিজঃ কশ্চিদতিথির্ভুঞ্জতাং তদা
তে তং দৃষ্ট্বাতিথিং তত্র প্রহৃষ্টমনসোঽভবন্
93.12
তেঽভিবাদ্য সুখপ্রশ্নং পৃষ্ট্বা তমতিথিং তদা
বিশুদ্ধমনসো দান্তাঃ শ্রদ্ধাদমসমন্বিতাঃ
93.13
অনসূয়বো গতক্রোধাঃ সাধবো গতমত্সরাঃ
ত্যক্তমানা জিতক্রোধা ধর্মজ্ঞা দ্বিজসত্তমাঃ
93.14
সব্রহ্মচর্যং স্বং গোত্রং সমাখ্যায় পরস্পরম্
কুটীং প্রবেশয়ামাসুঃ ক্ষুধার্তমতিথিং তদা
93.15
ইদমর্ঘ্যং চ পাদ্যং চ বৃসী চেয়ং তবানঘ
শুচয়ঃ সক্তবশ্চেমে নিয়মোপার্জিতাঃ প্রভো
প্রতিগৃহ্ণীষ্ব ভদ্রং তে ময়া দত্তা দ্বিজোত্তম
93.16
ইত্যুক্তঃ প্রতিগৃহ্যাথ সক্তূনাং কুডবং দ্বিজঃ
ভক্ষয়ামাস রাজেন্দ্র ন চ তুষ্টিং জগাম সঃ
93.17
স উঞ্ছবৃত্তিঃ তং প্রেক্ষ্য ক্ষুধাপরিগতং দ্বিজম্
আহারং চিন্তয়ামাস কথং তুষ্টো ভবেদিতি
93.18
তস্য ভার্যাব্রবীদ্রাজন্মদ্ভাগো দীয়তামিতি
গচ্ছত্বেষ যথাকামং সংতুষ্টো দ্বিজসত্তমঃ
93.19
ইতি ব্রুবন্তীং তাং সাধ্বীং ধর্মাত্মা স দ্বিজর্ষভঃ
ক্ষুধাপরিগতাং জ্ঞাত্বা সক্তূংস্তান্নাভ্যনন্দত
93.20
জানন্বৃদ্ধাং ক্ষুধার্তাং চ শ্রান্তাং গ্লানাং তপস্বিনীম্
ত্বগস্থিভূতাং বেপন্তীং ততো ভার্যামুবাচ তাম্
93.21
অপি কীটপতংগানাং মৃগাণাং চৈব শোভনে
স্ত্রিয়ো রক্ষ্যাশ্চ পোষ্যাশ্চ নৈবং ত্বং বক্তুমর্হসি
93.22
অনুকম্পিতো নরো নার্যা পুষ্টো রক্ষিত এব চ
প্রপতেদ্যশসো দীপ্তান্ন চ লোকানবাপ্নুয়াৎ
93.23
ইত্যুক্তা সা ততঃ প্রাহ ধর্মার্থৌ নৌ সমৌ দ্বিজ
সক্তুপ্রস্থচতুর্ভাগং গৃহাণেমং প্রসীদ মে
93.24
সত্যং রতিশ্চ ধর্মশ্চ স্বর্গশ্চ গুণনির্জিতঃ
স্ত্রীণাং পতিসমাধীনং কাঙ্ক্ষিতং চ দ্বিজোত্তম
93.25
ঋতুর্মাতুঃ পিতুর্বীজং দৈবতং পরমং পতিঃ
ভর্তুঃ প্রসাদাত্স্ত্রীণাং বৈ রতিঃ পুত্রফলং তথা
93.26
পালনাদ্ধি পতিস্ত্বং মে ভর্তাসি ভরণান্মম
পুত্রপ্রদানাদ্বরদস্তস্মাত্সক্তূন্গৃহাণ মে
93.27
জরাপরিগতো বৃদ্ধঃ ক্ষুধার্তো দুর্বলো ভৃশম্
উপবাসপরিশ্রান্তো যদা ত্বমপি কর্শিতঃ
93.28
ইত্যুক্তঃ স তয়া সক্তূন্প্রগৃহ্যেদং বচোঽব্রবীৎ
দ্বিজ সক্তূনিমান্ভূয়ঃ প্রতিগৃহ্ণীষ্ব সত্তম
93.29
স তান্প্রগৃহ্য ভুক্ত্বা চ ন তুষ্টিমগমদ্দ্বিজঃ
তমুঞ্ছবৃত্তিরালক্ষ্য ততশ্চিন্তাপরোঽভবৎ
93.30
পুত্র উবাচ
সক্তূনিমান্প্রগৃহ্য ত্বং দেহি বিপ্রায় সত্তম
ইত্যেবং সুকৃতং মন্যে তস্মাদেতত্করোম্যহম্
93.31
ভবান্হি পরিপাল্যো মে সর্বয়ত্নৈর্দ্বিজোত্তম
সাধূনাং কাঙ্ক্ষিতং হ্যেতত্পিতুর্বৃদ্ধস্য পোষণম্
93.32
পুত্রার্থো বিহিতো হ্যেষ স্থাবির্যে পরিপালনম্
শ্রুতিরেষা হি বিপ্রর্ষে ত্রিষু লোকেষু বিশ্রুতা
93.33
প্রাণধারণমাত্রেণ শক্যং কর্তুং তপস্ত্বয়া
প্রাণো হি পরমো ধর্মঃ স্থিতো দেহেষু দেহিনাম্
93.34
পিতোবাচ
অপি বর্ষসহস্রী ত্বং বাল এব মতো মম
উত্পাদ্য পুত্রং হি পিতা কৃতকৃত্যো ভবত্যুত
93.35
বালানাং ক্ষুদ্বলবতী জানাম্যেতদহং বিভো
বৃদ্ধোঽহং ধারয়িষ্যামি ত্বং বলী ভব পুত্রক
93.36
জীর্ণেন বয়সা পুত্র ন মা ক্ষুদ্বাধতেঽপি চ
দীর্ঘকালং তপস্তপ্তং ন মে মরণতো ভয়ম্
93.37
পুত্র উবাচ
অপত্যমস্মি তে পুত্রস্ত্রাণাত্পুত্রো হি বিশ্রুতঃ
আত্মা পুত্রঃ স্মৃতস্তস্মাত্ত্রাহ্যাত্মানমিহাত্মনা
93.38
পিতোবাচ
রূপেণ সদৃশস্ত্বং মে শীলেন চ দমেন চ
পরীক্ষিতশ্চ বহুধা সক্তূনাদদ্মি তে ততঃ
93.39
ইত্যুক্ত্বাদায় তান্সক্তূন্প্রীতাত্মা দ্বিজসত্তমঃ
প্রহসন্নিব বিপ্রায় স তস্মৈ প্রদদৌ তদা
93.40
ভুক্ত্বা তানপি সক্তূন্স নৈব তুষ্টো বভূব হ
উঞ্ছবৃত্তিস্তু সব্রীডো বভূব দ্বিজসত্তমঃ
93.41
তং বৈ বধূঃ স্থিতা সাধ্বী ব্রাহ্মণপ্রিয়কাম্যয়া
সক্তূনাদায় সংহৃষ্টা গুরুং তং বাক্যমব্রবীৎ
93.42
সংতানাত্তব সংতানং মম বিপ্র ভবিষ্যতি
সক্তূনিমানতিথয়ে গৃহীত্বা ত্বং প্রয়চ্ছ মে
93.43
তব প্রসবনির্বৃত্যা মম লোকাঃ কিলাক্ষয়াঃ
পৌত্রেণ তানবাপ্নোতি যত্র গত্বা ন শোচতি
93.44
ধর্মাদ্যা হি যথা ত্রেতা বহ্নিত্রেতা তথৈব চ
তথৈব পুত্রপৌত্রাণাং স্বর্গে ত্রেতা কিলাক্ষয়া
93.45
পিতৄংস্ত্রাণাত্তারয়তি পুত্র ইত্যনুশুশ্রুম
পুত্রপৌত্রৈশ্চ নিয়তং সাধুলোকানুপাশ্নুতে
93.46
শ্বশুর উবাচ
বাতাতপবিশীর্ণাঙ্গীং ত্বাং বিবর্ণাং নিরীক্ষ্য বৈ
কর্শিতাং সুব্রতাচারে ক্ষুধাবিহ্বলচেতসম্
93.47
কথং সক্তূন্গ্রহীষ্যামি ভূত্বা ধর্মোপঘাতকঃ
কল্যাণবৃত্তে কল্যাণি নৈবং ত্বং বক্তুমর্হসি
93.48
ষষ্ঠে কালে ব্রতবতীং শীলশৌচসমন্বিতাম্
কৃচ্ছ্রবৃত্তিং নিরাহারাং দ্রক্ষ্যামি ত্বাং কথং ন্বহম্
93.49
বালা ক্ষুধার্তা নারী চ রক্ষ্যা ত্বং সততং ময়া
উপবাসপরিশ্রান্তা ত্বং হি বান্ধবনন্দিনী
93.50
স্নুষোবাচ
গুরোর্মম গুরুস্ত্বং বৈ যতো দৈবতদৈবতম্
দেবাতিদেবস্তস্মাত্ত্বং সক্তূনাদত্স্ব মে বিভো
93.51
দেহঃ প্রাণশ্চ ধর্মশ্চ শুশ্রূষার্থমিদং গুরোঃ
তব বিপ্র প্রসাদেন লোকান্প্রাপ্স্যাম্যভীপ্সিতান্
93.52
অবেক্ষ্যা ইতি কৃত্বা ত্বং দৃঢভক্ত্যেতি বা দ্বিজ
চিন্ত্যা মমেয়মিতি বা সক্তূনাদাতুমর্হসি
93.53
শ্বশুর উবাচ
অনেন নিত্যং সাধ্বী ত্বং শীলবৃত্তেন শোভসে
যা ত্বং ধর্মব্রতোপেতা গুরুবৃত্তিমবেক্ষসে
93.54
তস্মাত্সক্তূন্গ্রহীষ্যামি বধূর্নার্হসি বঞ্চনাম্
গণয়িত্বা মহাভাগে ত্বং হি ধর্মভৃতাং বরা
93.55
ইত্যুক্ত্বা তানুপাদায় সক্তূন্প্রাদাদ্দ্বিজাতয়ে
ততস্তুষ্টোঽভবদ্বিপ্রস্তস্য সাধোর্মহাত্মনঃ
93.56
প্রীতাত্মা স তু তং বাক্যমিদমাহ দ্বিজর্ষভম্
বাগ্মী তদা দ্বিজশ্রেষ্ঠো ধর্মঃ পুরুষবিগ্রহঃ
93.57
শুদ্ধেন তব দানেন ন্যায়োপাত্তেন যত্নতঃ
যথাশক্তি বিমুক্তেন প্রীতোঽস্মি দ্বিজসত্তম
93.58
অহো দানং ঘুষ্যতে তে স্বর্গে স্বর্গনিবাসিভিঃ
গগনাত্পুষ্পবর্ষং চ পশ্যস্ব পতিতং ভুবি
93.59
সুরর্ষিদেবগন্ধর্বা যে চ দেবপুরঃসরাঃ
স্তুবন্তো দেবদূতাশ্চ স্থিতা দানেন বিস্মিতাঃ
93.60
ব্রহ্মর্ষয়ো বিমানস্থা ব্রহ্মলোকগতাশ্চ যে
কাঙ্ক্ষন্তে দর্শনং তুভ্যং দিবং গচ্ছ দ্বিজর্ষভ
93.61
পিতৃলোকগতাঃ সর্বে তারিতাঃ পিতরস্ত্বয়া
অনাগতাশ্চ বহবঃ সুবহূনি যুগানি চ
93.62
ব্রহ্মচর্যেণ যজ্ঞেন দানেন তপসা তথা
অগহ্বরেণ ধর্মেণ তস্মাদ্গচ্ছ দিবং দ্বিজ
93.63
শ্রদ্ধয়া পরয়া যস্ত্বং তপশ্চরসি সুব্রত
তস্মাদ্দেবাস্তবানেন প্রীতা দ্বিজবরোত্তম
93.64
সর্বস্বমেতদ্যস্মাত্তে ত্যক্তং শুদ্ধেন চেতসা
কৃচ্ছ্রকালে ততঃ স্বর্গো জিতোঽয়ং তব কর্মণা
93.65
ক্ষুধা নির্ণুদতি প্রজ্ঞাং ধর্ম্যাং বুদ্ধিং ব্যপোহতি
ক্ষুধাপরিগতজ্ঞানো ধৃতিং ত্যজতি চৈব হ
93.66
বুভুক্ষাং জয়তে যস্তু স স্বর্গং জয়তে ধ্রুবম্
যদা দানরুচির্ভবতি তদা ধর্মো ন সীদতি
93.67
অনবেক্ষ্য সুতস্নেহং কলত্রস্নেহমেব চ
ধর্মমেব গুরুং জ্ঞাত্বা তৃষ্ণা ন গণিতা ত্বয়া
93.68
দ্রব্যাগমো নৃণাং সূক্ষ্মঃ পাত্রে দানং ততঃ পরম্
কালঃ পরতরো দানাচ্ছ্রদ্ধা চাপি ততঃ পরা
93.69
স্বর্গদ্বারং সুসূক্ষ্মং হি নরৈর্মোহান্ন দৃশ্যতে
স্বর্গার্গলং লোভবীজং রাগগুপ্তং দুরাসদম্
93.70
তত্তু পশ্যন্তি পুরুষা জিতক্রোধা জিতেন্দ্রিয়াঃ
ব্রাহ্মণাস্তপসা যুক্তা যথাশক্তিপ্রদায়িনঃ
93.71
সহস্রশক্তিশ্চ শতং শতশক্তির্দশাপি চ
দদ্যাদপশ্চ যঃ শক্ত্যা সর্বে তুল্যফলাঃ স্মৃতাঃ
93.72
রন্তিদেবো হি নৃপতিরপঃ প্রাদাদকিংচনঃ
শুদ্ধেন মনসা বিপ্র নাকপৃষ্ঠং ততো গতঃ
93.73
ন ধর্মঃ প্রীয়তে তাত দানৈর্দত্তৈর্মহাফলৈঃ
ন্যায়লব্ধৈর্যথা সূক্ষ্মৈঃ শ্রদ্ধাপূতৈঃ স তুষ্যতি
93.74
গোপ্রদানসহস্রাণি দ্বিজেভ্যোঽদান্নৃগো নৃপঃ
একাং দত্ত্বা স পারক্যাং নরকং সমবাপ্তবান্
93.75
আত্মমাংসপ্রদানেন শিবিরৌশীনরো নৃপঃ
প্রাপ্য পুণ্যকৃতাঁল্লোকান্মোদতে দিবি সুব্রতঃ
93.76
বিভবে ন নৃণাং পুণ্যং স্বশক্ত্যা স্বর্জিতং সতাম্
ন যজ্ঞৈর্বিবিধৈর্বিপ্র যথান্যায়েন সংচিতৈঃ
93.77
ক্রোধো দানফলং হন্তি লোভাত্স্বর্গং ন গচ্ছতি
ন্যায়বৃত্তির্হি তপসা দানবিত্স্বর্গমশ্নুতে
93.78
ন রাজসূয়ৈর্বহুভিরিষ্ট্বা বিপুলদক্ষিণৈঃ
ন চাশ্বমেধৈর্বহুভিঃ ফলং সমমিদং তব
93.79
সক্তুপ্রস্থেন হি জিতো ব্রহ্মলোকস্ত্বয়ানঘ
বিরজো ব্রহ্মভবনং গচ্ছ বিপ্র যথেচ্ছকম্
93.80
সর্বেষাং বো দ্বিজশ্রেষ্ঠ দিব্যং যানমুপস্থিতম্
আরোহত যথাকামং ধর্মোঽস্মি দ্বিজ পশ্য মাম্
93.81
পাবিতো হি ত্বয়া দেহো লোকে কীর্তিঃ স্থিরা চ তে
সভার্যঃ সহপুত্রশ্চ সস্নুষশ্চ দিবং ব্রজ
93.82
ইত্যুক্তবাক্যো ধর্মেণ যানমারুহ্য স দ্বিজঃ
সভার্যঃ সসুতশ্চাপি সস্নুষশ্চ দিবং যয়ৌ
93.83
তস্মিন্বিপ্রে গতে স্বর্গং সসুতে সস্নুষে তদা
ভার্যাচতুর্থে ধর্মজ্ঞে ততোঽহং নিঃসৃতো বিলাৎ
93.84
ততস্তু সক্তুগন্ধেন ক্লেদেন সলিলস্য চ
দিব্যপুষ্পাবমর্দাচ্চ সাধোর্দানলবৈশ্চ তৈঃ
বিপ্রস্য তপসা তস্য শিরো মে কাঞ্চনীকৃতম্
93.85
তস্য সত্যাভিসংধস্য সূক্ষ্মদানেন চৈব হ
শরীরার্ধং চ মে বিপ্রাঃ শাতকুম্ভময়ং কৃতম্
পশ্যতেদং সুবিপুলং তপসা তস্য ধীমতঃ
93.86
কথমেবংবিধং মে স্যাদন্যত্পার্শ্বমিতি দ্বিজাঃ
তপোবনানি যজ্ঞাংশ্চ হৃষ্টোঽভ্যেমি পুনঃ পুনঃ
93.87
যজ্ঞং ত্বহমিমং শ্রুত্বা কুরুরাজস্য ধীমতঃ
আশয়া পরয়া প্রাপ্তো ন চাহং কাঞ্চনীকৃতঃ
93.88
ততো ময়োক্তং তদ্বাক্যং প্রহস্য দ্বিজসত্তমাঃ
সক্তুপ্রস্থেন যজ্ঞোঽয়ং সংমিতো নেতি সর্বথা
93.89
সক্তুপ্রস্থলবৈস্তৈর্হি তদাহং কাঞ্চনীকৃতঃ
ন হি যজ্ঞো মহানেষ সদৃশস্তৈর্মতো মম
93.90
বৈশংপায়ন উবাচ
ইত্যুক্ত্বা নকুলঃ সর্বান্যজ্ঞে দ্বিজবরাংস্তদা
জগামাদর্শনং রাজন্বিপ্রাস্তে চ যয়ুর্গৃহান্
93.91
এতত্তে সর্বমাখ্যাতং ময়া পরপুরংজয়
যদাশ্চর্যমভূত্তস্মিন্বাজিমেধে মহাক্রতৌ
93.92
ন বিস্ময়স্তে নৃপতে যজ্ঞে কার্যঃ কথংচন
ঋষিকোটিসহস্রাণি তপোভির্যে দিবং গতাঃ
93.93
অদ্রোহঃ সর্বভূতেষু সংতোষঃ শীলমার্জবম্
তপো দমশ্চ সত্যং চ দানং চেতি সমং মতম্