Utshovঅধ্যায় 94
94.1
জনমেজয় উবাচ
যজ্ঞে সক্তা নৃপতয়স্তপঃসক্তা মহর্ষয়ঃ
শান্তিব্যবসিতা বিপ্রাঃ শমো দম ইতি প্রভো
94.2
তস্মাদ্যজ্ঞফলৈস্তুল্যং ন কিংচিদিহ বিদ্যতে
ইতি মে বর্ততে বুদ্ধিস্তথা চৈতদসংশয়ম্
94.3
যজ্ঞৈরিষ্ট্বা হি বহবো রাজানো দ্বিজসত্তম
ইহ কীর্তিং পরাং প্রাপ্য প্রেত্য স্বর্গমিতো গতাঃ
94.4
দেবরাজঃ সহস্রাক্ষঃ ক্রতুভির্ভূরিদক্ষিণৈঃ
দেবরাজ্যং মহাতেজাঃ প্রাপ্তবানখিলং বিভুঃ
94.5
যথা যুধিষ্ঠিরো রাজা ভীমার্জুনপুরঃসরঃ
সদৃশো দেবরাজেন সমৃদ্ধ্যা বিক্রমেণ চ
94.6
অথ কস্মাত্স নকুলো গর্হয়ামাস তং ক্রতুম্
অশ্বমেধং মহায়জ্ঞং রাজ্ঞস্তস্য মহাত্মনঃ
94.7
বৈশংপায়ন উবাচ
যজ্ঞস্য বিধিমগ্র্যং বৈ ফলং চৈব নরর্ষভ
গদতঃ শৃণু মে রাজন্যথাবদিহ ভারত
94.8
পুরা শক্রস্য যজতঃ সর্ব ঊচুর্মহর্ষয়ঃ
ঋত্বিক্ষু কর্মব্যগ্রেষু বিততে যজ্ঞকর্মণি
94.9
হূয়মানে তথা বহ্নৌ হোত্রে বহুগুণান্বিতে
দেবেষ্বাহূয়মানেষু স্থিতেষু পরমর্ষিষু
94.10
সুপ্রতীতৈস্তদা বিপ্রৈঃ স্বাগমৈঃ সুস্বনৈর্নৃপ
অশ্রান্তৈশ্চাপি লঘুভিরধ্বর্যুবৃষভৈস্তথা
94.11
আলম্ভসময়ে তস্মিন্গৃহীতেষু পশুষ্বথ
মহর্ষয়ো মহারাজ সংবভূবুঃ কৃপান্বিতাঃ
94.12
ততো দীনান্পশূন্দৃষ্ট্বা ঋষয়স্তে তপোধনাঃ
ঊচুঃ শক্রং সমাগম্য নায়ং যজ্ঞবিধিঃ শুভঃ
94.13
অপবিজ্ঞানমেতত্তে মহান্তং ধর্মমিচ্ছতঃ
ন হি যজ্ঞে পশুগণা বিধিদৃষ্টাঃ পুরংদর
94.14
ধর্মোপঘাতকস্ত্বেষ সমারম্ভস্তব প্রভো
নায়ং ধর্মকৃতো ধর্মো ন হিংসা ধর্ম উচ্যতে
94.15
আগমেনৈব তে যজ্ঞং কুর্বন্তু যদি হেচ্ছসি
বিধিদৃষ্টেন যজ্ঞেন ধর্মস্তে সুমহান্ভবেৎ
94.16
যজ বীজৈঃ সহস্রাক্ষ ত্রিবর্ষপরমোষিতৈঃ
এষ ধর্মো মহাঞ্শক্র চিন্ত্যমানোঽধিগম্যতে
94.17
শতক্রতুস্তু তদ্বাক্যমৃষিভিস্তত্ত্বদর্শিভিঃ
উক্তং ন প্রতিজগ্রাহ মানমোহবশানুগঃ
94.18
তেষাং বিবাদঃ সুমহাঞ্জজ্ঞে শক্রমহর্ষিণাম্
জঙ্গমৈঃ স্থাবরৈর্বাপি যষ্টব্যমিতি ভারত
94.19
তে তু খিন্না বিবাদেন ঋষয়স্তত্ত্বদর্শিনঃ
ততঃ সংধায় শক্রেণ পপ্রচ্ছুর্নৃপতিং বসুম্
94.20
মহাভাগ কথং যজ্ঞেষ্বাগমো নৃপতে স্মৃতঃ
যষ্টব্যং পশুভির্মেধ্যৈরথো বীজৈরজৈরপি
94.21
তচ্ছ্রুত্বা তু বচস্তেষামবিচার্য বলাবলম্
যথোপনীতৈর্যষ্টব্যমিতি প্রোবাচ পার্থিবঃ
94.22
এবমুক্ত্বা স নৃপতিঃ প্রবিবেশ রসাতলম্
উক্ত্বেহ বিতথং রাজংশ্চেদীনামীশ্বরঃ প্রভুঃ
94.23
অন্যায়োপগতং দ্রব্যমতীতং যো হ্যপণ্ডিতঃ
ধর্মাভিকাঙ্ক্ষী যজতে ন ধর্মফলমশ্নুতে
94.24
ধর্মবৈতংসিকো যস্তু পাপাত্মা পুরুষস্তথা
দদাতি দানং বিপ্রেভ্যো লোকবিশ্বাসকারকম্
94.25
পাপেন কর্মণা বিপ্রো ধনং লব্ধ্বা নিরঙ্কুশঃ
রাগমোহান্বিতঃ সোঽন্তে কলুষাং গতিমাপ্নুতে
94.26
তেন দত্তানি দানানি পাপেন হতবুদ্ধিনা
তানি সত্ত্বমনাসাদ্য নশ্যন্তি বিপুলান্যপি
94.27
তস্যাধর্মপ্রবৃত্তস্য হিংসকস্য দুরাত্মনঃ
দানে ন কীর্তির্ভবতি প্রেত্য চেহ চ দুর্মতেঃ
94.28
অপি সংচয়বুদ্ধির্হি লোভমোহবশংগতঃ
উদ্বেজয়তি ভূতানি হিংসয়া পাপচেতনঃ
94.29
এবং লব্ধ্বা ধনং লোভাদ্যজতে যো দদাতি চ
স কৃত্বা কর্মণা তেন ন সিধ্যতি দুরাগমাৎ
94.30
উঞ্ছং মূলং ফলং শাকমুদপাত্রং তপোধনাঃ
দানং বিভবতো দত্ত্বা নরাঃ স্বর্যান্তি ধর্মিণঃ
94.31
এষ ধর্মো মহাংস্ত্যাগো দানং ভূতদয়া তথা
ব্রহ্মচর্যং তথা সত্যমনুক্রোশো ধৃতিঃ ক্ষমা
সনাতনস্য ধর্মস্য মূলমেতত্সনাতনম্
94.32
শ্রূয়ন্তে হি পুরা বিপ্রা বিশ্বামিত্রাদয়ো নৃপাঃ
বিশ্বামিত্রোঽসিতশ্চৈব জনকশ্চ মহীপতিঃ
কক্ষসেনার্ষ্টিষেণৌ চ সিন্ধুদ্বীপশ্চ পার্থিবঃ
94.33
এতে চান্যে চ বহবঃ সিদ্ধিং পরমিকাং গতাঃ
নৃপাঃ সত্যৈশ্চ দানৈশ্চ ন্যায়লব্ধৈস্তপোধনাঃ
94.34
ব্রাহ্মণাঃ ক্ষত্রিয়া বৈশ্যাঃ শূদ্রা যে চাশ্রিতাস্তপঃ
দানধর্মাগ্নিনা শুদ্ধাস্তে স্বর্গং যান্তি ভারত