Utshovঅধ্যায় 95
95.1
জনমেজয় উবাচ
ধর্মাগতেন ত্যাগেন ভগবন্সর্বমস্তি চেৎ
এতন্মে সর্বমাচক্ষ্ব কুশলো হ্যসি ভাষিতুম্
95.2
ততোঞ্ছবৃত্তের্যদ্বৃত্তং সক্তুদানে ফলং মহৎ
কথিতং মে মহদ্ব্রহ্মংস্তথ্যমেতদসংশয়ম্
95.3
কথং হি সর্বয়জ্ঞেষু নিশ্চয়ঃ পরমো ভবেৎ
এতদর্হসি মে বক্তুং নিখিলেন দ্বিজর্ষভ
95.4
বৈশংপায়ন উবাচ
অত্রাপ্যুদাহরন্তীমমিতিহাসং পুরাতনম্
অগস্ত্যস্য মহায়জ্ঞে পুরাবৃত্তমরিংদম
95.5
পুরাগস্ত্যো মহাতেজা দীক্ষাং দ্বাদশবার্ষিকীম্
প্রবিবেশ মহারাজ সর্বভূতহিতে রতঃ
95.6
তত্রাগ্নিকল্পা হোতার আসন্সত্রে মহাত্মনঃ
মূলাহারা নিরাহারাঃ সাশ্মকুট্টা মরীচিপাঃ
95.7
পরিঘৃষ্টিকা বৈঘসিকাঃ সংপ্রক্ষালাস্তথৈব চ
যতয়ো ভিক্ষবশ্চাত্র বভূবুঃ পর্যবস্থিতাঃ
95.8
সর্বে প্রত্যক্ষধর্মাণো জিতক্রোধা জিতেন্দ্রিয়াঃ
দমে স্থিতাশ্চ তে সর্বে দম্ভমোহবিবর্জিতাঃ
95.9
বৃত্তে শুদ্ধে স্থিতা নিত্যমিন্দ্রিয়ৈশ্চাপ্যবাহিতাঃ
উপাসতে স্ম তং যজ্ঞং ভুঞ্জানাস্তে মহর্ষয়ঃ
95.10
যথাশক্ত্যা ভগবতা তদন্নং সমুপার্জিতম্
তস্মিন্সত্রে তু যত্কিংচিদয়োগ্যং তত্র নাভবৎ
তথা হ্যনেকৈর্মুনিভির্মহান্তঃ ক্রতবঃ কৃতাঃ
95.11
এবংবিধেস্ত্বগস্ত্যস্য বর্তমানে মহাধ্বরে
ন ববর্ষ সহস্রাক্ষস্তদা ভরতসত্তম
95.12
ততঃ কর্মান্তরে রাজন্নগস্ত্যস্য মহাত্মনঃ
কথেয়মভিনির্বৃত্তা মুনীনাং ভাবিতাত্মনাম্
95.13
অগস্ত্যো যজমানোঽসৌ দদাত্যন্নং বিমত্সরঃ
ন চ বর্ষতি পর্জন্যঃ কথমন্নং ভবিষ্যতি
95.14
সত্রং চেদং মহদ্বিপ্রা মুনের্দ্বাদশবার্ষিকম্
ন বর্ষিষ্যতি দেবশ্চ বর্ষাণ্যেতানি দ্বাদশ
95.15
এতদ্ভবন্তঃ সংচিন্ত্য মহর্ষেরস্য ধীমতঃ
অগস্ত্যস্যাতিতপসঃ কর্তুমর্হন্ত্যনুগ্রহম্
95.16
ইত্যেবমুক্তে বচনে ততোঽগস্ত্যঃ প্রতাপবান্
প্রোবাচেদং বচো বাগ্মী প্রসাদ্য শিরসা মুনীন্
95.17
যদি দ্বাদশবর্ষাণি ন বর্ষিষ্যতি বাসবঃ
চিন্তায়জ্ঞং করিষ্যামি বিধিরেষ সনাতনঃ
95.18
যদি দ্বাদশবর্ষাণি ন বর্ষিষ্যতি বাসবঃ
ব্যায়ামেনাহরিষ্যামি যজ্ঞানন্যানতিব্রতান্
95.19
বীজয়জ্ঞো ময়ায়ং বৈ বহুবর্ষসমাচিতঃ
বীজৈঃ কৃতৈঃ করিষ্যে চ নাত্র বিঘ্নো ভবিষ্যতি
95.20
নেদং শক্যং বৃথা কর্তুং মম সত্রং কথংচন
বর্ষিষ্যতীহ বা দেবো ন বা দেবো ভবিষ্যতি
95.21
অথ বাভ্যর্থনামিন্দ্রঃ কুর্যান্ন ত্বিহ কামতঃ
স্বয়মিন্দ্রো ভবিষ্যামি জীবয়িষ্যামি চ প্রজাঃ
95.22
যো যদাহারজাতশ্চ স তথৈব ভবিষ্যতি
বিশেষং চৈব কর্তাস্মি পুনঃ পুনরতীব হি
95.23
অদ্যেহ স্বর্ণমভ্যেতু যচ্চান্যদ্বসু দুর্লভম্
ত্রিষু লোকেষু যচ্চাস্তি তদিহাগচ্ছতাং স্বয়ম্
95.24
দিব্যাশ্চাপ্সরসাং সংঘাঃ সগন্ধর্বাঃ সকিংনরাঃ
বিশ্বাবসুশ্চ যে চান্যে তেঽপ্যুপাসন্তু বঃ সদা
95.25
উত্তরেভ্যঃ কুরুভ্যশ্চ যত্কিংচিদ্বসু বিদ্যতে
সর্বং তদিহ যজ্ঞে মে স্বয়মেবোপতিষ্ঠতু
স্বর্গং স্বর্গসদশ্চৈব ধর্মশ্চ স্বয়মেব তু
95.26
ইত্যুক্তে সর্বমেবৈতদভবত্তস্য ধীমতঃ
ততস্তে মুনয়ো দৃষ্ট্বা মুনেস্তস্য তপোবলম্
বিস্মিতা বচনং প্রাহুরিদং সর্বে মহার্থবৎ
95.27
প্রীতাঃ স্ম তব বাক্যেন ন ত্বিচ্ছামস্তপোব্যয়ম্
স্বৈরেব যজ্ঞৈস্তুষ্টাঃ স্মো ন্যায়েনেচ্ছামহে বয়ম্
95.28
যজ্ঞান্দীক্ষাস্তথা হোমান্যচ্চান্যন্মৃগয়ামহে
তন্নোঽস্তু স্বকৃতৈর্যজ্ঞৈর্নান্যতো মৃগয়ামহে
95.29
ন্যায়েনোপার্জিতাহারাঃ স্বকর্মনিরতা বয়ম্
বেদাংশ্চ ব্রহ্মচর্যেণ ন্যায়তঃ প্রার্থয়ামহে
95.30
ন্যায়েনোত্তরকালং চ গৃহেভ্যো নিঃসৃতা বয়ম্
ধর্মদৃষ্টৈর্বিধিদ্বারৈস্তপস্তপ্স্যামহে বয়ম্
95.31
ভবতঃ সম্যগেষা হি বুদ্ধির্হিংসাবিবর্জিতা
এতামহিংসাং যজ্ঞেষু ব্রূয়াস্ত্বং সততং প্রভো
95.32
প্রীতাস্ততো ভবিষ্যামো বয়ং দ্বিজবরোত্তম
বিসর্জিতাঃ সমাপ্তৌ চ সত্রাদস্মাদ্ব্রজামহে
95.33
বৈশংপায়ন উবাচ
তথা কথয়তামেব দেবরাজঃ পুরংদরঃ
ববর্ষ সুমহাতেজা দৃষ্ট্বা তস্য তপোবলম্
95.34
অসমাপ্তৌ চ যজ্ঞস্য তস্যামিতপরাক্রমঃ
নিকামবর্ষী দেবেন্দ্রো বভূব জনমেজয়
95.35
প্রসাদয়ামাস চ তমগস্ত্যং ত্রিদশেশ্বরঃ
স্বয়মভ্যেত্য রাজর্ষে পুরস্কৃত্য বৃহস্পতিম্
95.36
ততো যজ্ঞসমাপ্তৌ তান্বিসসর্জ মহামুনীন্
অগস্ত্যঃ পরমপ্রীতঃ পূজয়িত্বা যথাবিধি