অধ্যায় 96

96.1

জনমেজয় উবাচ
কোঽসৌ নকুলরূপেণ শিরসা কাঞ্চনেন বৈ
প্রাহ মানুষবদ্বাচমেতত্পৃষ্টো বদস্ব মে

বৈশংপায়ন উবাচ
এতত্পূর্বং ন পৃষ্টোঽহং ন চাস্মাভিঃ প্রভাষিতম্
শ্রূয়তাং নকুলো যোঽসৌ যথা বাগস্য মানুষী

শ্রাদ্ধং সংকল্পয়ামাস জমদগ্নিঃ পুরা কিল
হোমধেনুস্তমাগাচ্চ স্বয়ং চাপি দুদোহ তাম্

তত্ক্ষীরং স্থাপয়ামাস নবে ভাণ্ডে দৃঢে শুচৌ
তচ্চ ক্রোধঃ স্বরূপেণ পিঠরং পর্যবর্তয়ৎ

জিজ্ঞাসুস্তমৃষিশ্রেষ্ঠং কিং কুর্যাদ্বিপ্রিয়ে কৃতে
ইতি সংচিন্ত্য দুর্মেধা ধর্ষয়ামাস তত্পয়ঃ

তমাজ্ঞায় মুনিঃ ক্রোধং নৈবাস্য চুকুপে ততঃ
স তু ক্রোধস্তমাহেদং প্রাঞ্জলির্মূর্তিমান্স্থিতঃ

জিতোঽস্মীতি ভৃগুশ্রেষ্ঠ ভৃগবো হ্যতিরোষণাঃ
লোকে মিথ্যাপ্রবাদোঽয়ং যত্ত্বয়াস্মি পরাজিতঃ

সোঽহং ত্বয়ি স্থিতো হ্যদ্য ক্ষমাবতি মহাত্মনি
বিভেমি তপসঃ সাধো প্রসাদং কুরু মে বিভো

জমদগ্নিরুবাচ
সাক্ষাদ্দৃষ্টোঽসি মে ক্রোধ গচ্ছ ত্বং বিগতজ্বরঃ
ন মমাপকৃতং তেঽদ্য ন মন্যুর্বিদ্যতে মম

যানুদ্দিশ্য তু সংকল্পঃ পয়সোঽস্য কৃতো ময়া
পিতরস্তে মহাভাগাস্তেভ্যো বুধ্যস্ব গম্যতাম্

ইত্যুক্তো জাতসংত্রাসঃ স তত্রান্তরধীয়ত
পিতৄণামভিষঙ্গাত্তু নকুলত্বমুপাগতঃ

স তান্প্রসাদয়ামাস শাপস্যান্তো ভবেদিতি
তৈশ্চাপ্যুক্তো যদা ধর্মং ক্ষেপ্স্যসে মোক্ষ্যসে তদা

তৈশ্চোক্তো যজ্ঞিয়ান্দেশান্ধর্মারণ্যানি চৈব হ
জুগুপ্সন্পরিধাবন্স যজ্ঞং তং সমুপাসদৎ

ধর্মপুত্রমথাক্ষিপ্য সক্তুপ্রস্থেন তেন সঃ
মুক্তঃ শাপাত্ততঃ ক্রোধো ধর্মো হ্যাসীদ্যুধিষ্ঠিরঃ

এবমেতত্তদা বৃত্তং তস্য যজ্ঞে মহাত্মনঃ
পশ্যতাং চাপি নস্তত্র নকুলোঽন্তর্হিতস্তদা