UtshovChapter 79
79.1
वैशंपायन उवाच
ततो बहुविधं भीरुर्विलप्य कमलेक्षणा
मुमोह दुःखाद्दुर्धर्षा निपपात च भूतले
Vaishampayana uvacha
Tato bahuvidham bhirurvilapya kamalekshana
Mumoha duhkhaddurdharsha nipapata cha bhutale
79.2
प्रतिलभ्य च सा संज्ञां देवी दिव्यवपुर्धरा
उलूपीं पन्नगसुतां दृष्ट्वेदं वाक्यमब्रवीत्
Pratilabhya cha sa sangyam devi divyavapurdhara
Ulupim pannagasutam drishtvedam vakyamabravit
79.3
उलूपि पश्य भर्तारं शयानं निहतं रणे
त्वत्कृते मम पुत्रेण बालेन समितिंजयम्
Ulupi pashya bhartaram shayanam nihatam rane
Tvatkrite mama putrena balena samitinjayam
79.4
ननु त्वमार्ये धर्मज्ञा ननु चासि पतिव्रता
यत्त्वत्कृतेऽयं पतितः पतिस्ते निहतो रणे
Nanu tvamarye dharmagya nanu chasi pativrata
Yattvatkriteyam patitah patiste nihato rane
79.5
किं तु सर्वापराधोऽयं यदि तेऽद्य धनंजयः
क्षमस्व याच्यमाना मे संजीवय धनंजयम्
Kim tu sarvaparadhoyam yadi tedya dhananjayah
Kshamasva yachyamana me sanjivaya dhananjayam
79.6
ननु त्वमार्ये धर्मज्ञा त्रैलोक्यविदिता शुभे
यद्घातयित्वा भर्तारं पुत्रेणेह न शोचसि
Nanu tvamarye dharmagya trailokyavidita shubhe
Yadghatayitva bhartaram putreneha na shochasi
79.7
नाहं शोचामि तनयं निहतं पन्नगात्मजे
पतिमेव तु शोचामि यस्यातिथ्यमिदं कृतम्
Naham shochami tanayam nihatam pannagatmaje
Patimeva tu shochami yasyatithyamidam kritam
79.8
इत्युक्त्वा सा तदा देवीमुलूपीं पन्नगात्मजाम्
भर्तारमभिगम्येदमित्युवाच यशस्विनी
Ityuktva sa tada devimulupim pannagatmajam
Bhartaramabhigamyedamityuvacha yashasvini
79.9
उत्तिष्ठ कुरुमुख्यस्य प्रियकाम मम प्रिय
अयमश्वो महाबाहो मया ते परिमोक्षितः
Uttishtha kurumukhyasya priyakama mama priya
Ayamashvo mahabaho maya te parimokshitah
79.10
ननु नाम त्वया वीर धर्मराजस्य यज्ञियः
अयमश्वोऽनुसर्तव्यः स शेषे किं महीतले
Nanu nama tvaya vira dharmarajasya yagyiyah
Ayamashvonusartavyah sa sheshe kim mahitale
79.11
त्वयि प्राणाः समायत्ताः कुरूणां कुरुनन्दन
स कस्मात्प्राणदोऽन्येषां प्राणान्संत्यक्तवानसि
Tvayi pranah samayattah kurunam kurunandana
Sa kasmatpranadonyesham pranansantyaktavanasi
79.12
उलूपि साधु संपश्य भर्तारं निहतं रणे
पुत्रं चैनं समुत्साह्य घातयित्वा न शोचसि
Ulupi sadhu sampashya bhartaram nihatam rane
Putram chainam samutsahya ghatayitva na shochasi
79.13
कामं स्वपितु बालोऽयं भूमौ प्रेतगतिं गतः
लोहिताक्षो गुडाकेशो विजयः साधु जीवतु
Kamam svapitu baloyam bhumau pretagatim gatah
Lohitaksho gudakesho vijayah sadhu jivatu
79.14
नापराधोऽस्ति सुभगे नराणां बहुभार्यता
नारीणां तु भवत्येतन्मा ते भूद्बुद्धिरीदृशी
Naparadhosti subhage naranam bahubharyata
Narinam tu bhavatyetanma te bhudbuddhiridrishi
79.15
सख्यं ह्येतत्कृतं धात्रा शाश्वतं चाव्ययं च ह
सख्यं समभिजानीहि सत्यं संगतमस्तु ते
Sakhyam hyetatkritam dhatra shashvatam chavyayam cha ha
Sakhyam samabhijanihi satyam sangatamastu te
79.16
पुत्रेण घातयित्वेमं पतिं यदि न मेऽद्य वै
जीवन्तं दर्शयस्यद्य परित्यक्ष्यामि जीवितम्
Putrena ghatayitvemam patim yadi na medya vai
Jivantam darshayasyadya parityakshyami jivitam
79.17
साहं दुःखान्विता भीरु पतिपुत्रविनाकृता
इहैव प्रायमाशिष्ये प्रेक्षन्त्यास्ते न संशयः
Saham duhkhanvita bhiru patiputravinakrita
Ihaiva prayamashishye prekshantyaste na sanshayah
79.18
इत्युक्त्वा पन्नगसुतां सपत्नीं चैत्रवाहिनी
ततः प्रायमुपासीना तूष्णीमासीज्जनाधिप
Ityuktva pannagasutam sapatnim chaitravahini
Tatah prayamupasina tushnimasijjanadhipa