UtshovChapter 69
69.1
वैशंपायन उवाच
ब्रह्मास्त्रं तु यदा राजन्कृष्णेन प्रतिसंहृतम्
तदा तद्वेश्म ते पित्रा तेजसाभिविदीपितम्
Vaishampayana uvacha
Brahmastram tu yada rajankrishnena pratisanhritam
Tada tadveshma te pitra tejasabhividipitam
69.2
ततो रक्षांसि सर्वाणि नेशुस्त्यक्त्वा गृहं तु तत्
अन्तरिक्षे च वागासीत्साधु केशव साध्विति
Tato rakshansi sarvani neshustyaktva griham tu tat
Antarikshe cha vagasitsadhu keshava sadhviti
69.3
तदस्त्रं ज्वलितं चापि पितामहमगात्तदा
ततः प्राणान्पुनर्लेभे पिता तव जनेश्वर
व्यचेष्टत च बालोऽसौ यथोत्साहं यथाबलम्
Tadastram jvalitam chapi pitamahamagattada
Tatah prananpunarlebhe pita tava janeshvara
Vyacheshtata cha balosau yathotsaham yathabalam
69.4
बभूवुर्मुदिता राजंस्ततस्ता भरतस्त्रियः
ब्राह्मणान्वाचयामासुर्गोविन्दस्य च शासनात्
Babhuvurmudita rajanstatasta bharatastriyah
Brahmananvachayamasurgovindasya cha shasanat
69.5
ततस्ता मुदिताः सर्वाः प्रशशंसुर्जनार्दनम्
स्त्रियो भरतसिंहानां नावं लब्ध्वेव पारगाः
Tatasta muditah sarvah prashashansurjanardanam
Striyo bharatasinhanam navam labdhveva paragah
69.6
कुन्ती द्रुपदपुत्री च सुभद्रा चोत्तरा तथा
स्त्रियश्चान्या नृसिंहानां बभूवुर्हृष्टमानसाः
Kunti drupadaputri cha subhadra chottara tatha
Striyashchanya nrisinhanam babhuvurhrishtamanasah
69.7
तत्र मल्ला नटा झल्ला ग्रन्थिकाः सौखशायिकाः
सूतमागधसंघाश्चाप्यस्तुवन्वै जनार्दनम्
कुरुवंशस्तवाख्याभिराशीर्भिर्भरतर्षभ
Tatra malla nata jhalla granthikah saukhashayikah
Sutamagadhasanghashchapyastuvanvai janardanam
Kuruvanshastavakhyabhirashirbhirbharatarshabha
69.8
उत्थाय तु यथाकालमुत्तरा यदुनन्दनम्
अभ्यवादयत प्रीता सह पुत्रेण भारत
ततस्तस्यै ददौ प्रीतो बहुरत्नं विशेषतः
Utthaya tu yathakalamuttara yadunandanam
Abhyavadayata prita saha putrena bharata
Tatastasyai dadau prito bahuratnam visheshatah
69.9
तथान्ये वृष्णिशार्दूला नाम चास्याकरोत्प्रभुः
पितुस्तव महाराज सत्यसंधो जनार्दनः
Tathanye vrishnishardula nama chasyakarotprabhuh
Pitustava maharaja satyasandho janardanah
69.10
परिक्षीणे कुले यस्माज्जातोऽयमभिमन्युजः
परिक्षिदिति नामास्य भवत्वित्यब्रवीत्तदा
Parikshine kule yasmajjatoyamabhimanyujah
Parikshiditi namasya bhavatvityabravittada
69.11
सोऽवर्धत यथाकालं पिता तव नराधिप
मनःप्रह्लादनश्चासीत्सर्वलोकस्य भारत
Sovardhata yathakalam pita tava naradhipa
Manahprahladanashchasitsarvalokasya bharata
69.12
मासजातस्तु ते वीर पिता भवति भारत
अथाजग्मुः सुबहुलं रत्नमादाय पाण्डवाः
Masajatastu te vira pita bhavati bharata
Athajagmuh subahulam ratnamadaya pandavah
69.13
तान्समीपगताञ्श्रुत्वा निर्ययुर्वृष्णिपुंगवाः
अलंचक्रुश्च माल्यौघैः पुरुषा नागसाह्वयम्
Tansamipagatanshrutva niryayurvrishnipungavah
Alanchakrushcha malyaughaih purusha nagasahvayam
69.14
पताकाभिर्विचित्राभिर्ध्वजैश्च विविधैरपि
वेश्मानि समलंचक्रुः पौराश्चापि जनाधिप
Patakabhirvichitrabhirdhvajaishcha vividhairapi
Veshmani samalanchakruh paurashchapi janadhipa
69.15
देवतायतनानां च पूजा बहुविधास्तथा
संदिदेशाथ विदुरः पाण्डुपुत्रप्रियेप्सया
Devatayatananam cha puja bahuvidhastatha
Sandideshatha vidurah panduputrapriyepsaya
69.16
राजमार्गाश्च तत्रासन्सुमनोभिरलंकृताः
शुशुभे तत्पुरं चापि समुद्रौघनिभस्वनम्
Rajamargashcha tatrasansumanobhiralankritah
Shushubhe tatpuram chapi samudraughanibhasvanam
69.17
नर्तकैश्चापि नृत्यद्भिर्गायनानां च निस्वनैः
आसीद्वैश्रवणस्येव निवासस्तत्पुरं तदा
Nartakaishchapi nrityadbhirgayananam cha nisvanaih
Asidvaishravanasyeva nivasastatpuram tada
69.18
बन्दिभिश्च नरै राजन्स्त्रीसहायैः सहस्रशः
तत्र तत्र विविक्तेषु समन्तादुपशोभितम्
Bandibhishcha narai rajanstrisahayaih sahasrashah
Tatra tatra vivikteshu samantadupashobhitam
69.19
पताका धूयमानाश्च श्वसता मातरिश्वना
अदर्शयन्निव तदा कुरून्वै दक्षिणोत्तरान्
Pataka dhuyamanashcha shvasata matarishvana
Adarshayanniva tada kurunvai dakshinottaran
69.20
अघोषयत्तदा चापि पुरुषो राजधूर्गतः
सर्वरात्रिविहारोऽद्य रत्नाभरणलक्षणः
Aghoshayattada chapi purusho rajadhurgatah
Sarvaratriviharodya ratnabharanalakshanah