UtshovChapter 67
67.1
वैशंपायन उवाच
एवमुक्तस्तु राजेन्द्र केशिहा दुःखमूर्छितः
तथेति व्याजहारोच्चैर्ह्लादयन्निव तं जनम्
Vaishampayana uvacha
Evamuktastu rajendra keshiha duhkhamurchhitah
Tatheti vyajaharochchairhladayanniva tam janam
67.2
वाक्येन तेन हि तदा तं जनं पुरुषर्षभः
ह्लादयामास स विभुर्घर्मार्तं सलिलैरिव
Vakyena tena hi tada tam janam purusharshabhah
Hladayamasa sa vibhurgharmartam salilairiva
67.3
ततः स प्राविशत्तूर्णं जन्मवेश्म पितुस्तव
अर्चितं पुरुषव्याघ्र सितैर्माल्यैर्यथाविधि
Tatah sa pravishatturnam janmaveshma pitustava
Architam purushavyaghra sitairmalyairyathavidhi
67.4
अपां कुम्भैः सुपूर्णैश्च विन्यस्तैः सर्वतोदिशम्
घृतेन तिन्दुकालातैः सर्षपैश्च महाभुज
Apam kumbhaih supurnaishcha vinyastaih sarvatodisham
Ghritena tindukalataih sarshapaishcha mahabhuja
67.5
शस्त्रैश्च विमलैर्न्यस्तैः पावकैश्च समन्ततः
वृद्धाभिश्चाभिरामाभिः परिचारार्थमच्युतः
Shastraishcha vimalairnyastaih pavakaishcha samantatah
Vriddhabhishchabhiramabhih parichararthamachyutah
67.6
दक्षैश्च परितो वीर भिषग्भिः कुशलैस्तथा
ददर्श च स तेजस्वी रक्षोघ्नान्यपि सर्वशः
द्रव्याणि स्थापितानि स्म विधिवत्कुशलैर्जनैः
Dakshaishcha parito vira bhishagbhih kushalaistatha
Dadarsha cha sa tejasvi rakshoghnanyapi sarvashah
Dravyani sthapitani sma vidhivatkushalairjanaih
67.7
तथायुक्तं च तद्दृष्ट्वा जन्मवेश्म पितुस्तव
हृष्टोऽभवद्धृषीकेशः साधु साध्विति चाब्रवीत्
Tathayuktam cha taddrishtva janmaveshma pitustava
Hrishtobhavaddhrishikeshah sadhu sadhviti chabravit
67.8
तथा ब्रुवति वार्ष्णेये प्रहृष्टवदने तदा
द्रौपदी त्वरिता गत्वा वैराटीं वाक्यमब्रवीत्
Tatha bruvati varshneye prahrishtavadane tada
Draupadi tvarita gatva vairatim vakyamabravit
67.9
अयमायाति ते भद्रे श्वशुरो मधुसूदनः
पुराणर्षिरचिन्त्यात्मा समीपमपराजितः
Ayamayati te bhadre shvashuro madhusudanah
Puranarshirachintyatma samipamaparajitah
67.10
सापि बाष्पकलां वाचं निगृह्याश्रूणि चैव ह
सुसंवीताभवद्देवी देववत्कृष्णमीक्षती
Sapi bashpakalam vacham nigrihyashruni chaiva ha
Susanvitabhavaddevi devavatkrishnamikshati
67.11
सा तथा दूयमानेन हृदयेन तपस्विनी
दृष्ट्वा गोविन्दमायान्तं कृपणं पर्यदेवयत्
Sa tatha duyamanena hridayena tapasvini
Drishtva govindamayantam kripanam paryadevayat
67.12
पुण्डरीकाक्ष पश्यस्व बालाविह विनाकृतौ
अभिमन्युं च मां चैव हतौ तुल्यं जनार्दन
Pundarikaksha pashyasva balaviha vinakritau
Abhimanyum cha mam chaiva hatau tulyam janardana
67.13
वार्ष्णेय मधुहन्वीर शिरसा त्वां प्रसादये
द्रोणपुत्रास्त्रनिर्दग्धं जीवयैनं ममात्मजम्
Varshneya madhuhanvira shirasa tvam prasadaye
Dronaputrastranirdagdham jivayainam mamatmajam
67.14
यदि स्म धर्मराज्ञा वा भीमसेनेन वा पुनः
त्वया वा पुण्डरीकाक्ष वाक्यमुक्तमिदं भवेत्
Yadi sma dharmaragya va bhimasenena va punah
Tvaya va pundarikaksha vakyamuktamidam bhavet
67.15
अजानतीमिषीकेयं जनित्रीं हन्त्विति प्रभो
अहमेव विनष्टा स्यां नेदमेवंगतं भवेत्
Ajanatimishikeyam janitrim hantviti prabho
Ahameva vinashta syam nedamevangatam bhavet
67.16
गर्भस्थस्यास्य बालस्य ब्रह्मास्त्रेण निपातनम्
कृत्वा नृशंसं दुर्बुद्धिर्द्रौणिः किं फलमश्नुते
Garbhasthasyasya balasya brahmastrena nipatanam
Kritva nrishansam durbuddhirdraunih kim phalamashnute
67.17
सा त्वा प्रसाद्य शिरसा याचे शत्रुनिबर्हण
प्राणांस्त्यक्ष्यामि गोविन्द नायं संजीवते यदि
Sa tva prasadya shirasa yache shatrunibarhana
Prananstyakshyami govinda nayam sanjivate yadi
67.18
अस्मिन्हि बहवः साधो ये ममासन्मनोरथाः
ते द्रोणपुत्रेण हताः किं नु जीवामि केशव
Asminhi bahavah sadho ye mamasanmanorathah
Te dronaputrena hatah kim nu jivami keshava
67.19
आसीन्मम मतिः कृष्ण पूर्णोत्सङ्गा जनार्दन
अभिवादयिष्ये दिष्ट्येति तदिदं वितथीकृतम्
Asinmama matih krishna purnotsanga janardana
Abhivadayishye dishtyeti tadidam vitathikritam
67.20
चपलाक्षस्य दायादे मृतेऽस्मिन्पुरुषर्षभ
विफला मे कृताः कृष्ण हृदि सर्वे मनोरथाः
Chapalakshasya dayade mritesminpurusharshabha
Viphala me kritah krishna hridi sarve manorathah
67.21
चपलाक्षः किलातीव प्रियस्ते मधुसूदन
सुतं पश्यस्व तस्येमं ब्रह्मास्त्रेण निपातितम्
Chapalakshah kilativa priyaste madhusudana
Sutam pashyasva tasyemam brahmastrena nipatitam
67.22
कृतघ्नोऽयं नृशंसोऽयं यथास्य जनकस्तथा
यः पाण्डवीं श्रियं त्यक्त्वा गतोऽद्य यमसादनम्
Kritaghnoyam nrishansoyam yathasya janakastatha
Yah pandavim shriyam tyaktva gatodya yamasadanam
67.23
मया चैतत्प्रतिज्ञातं रणमूर्धनि केशव
अभिमन्यौ हते वीर त्वामेष्याम्यचिरादिति
Maya chaitatpratigyatam ranamurdhani keshava
Abhimanyau hate vira tvameshyamyachiraditi
67.24
तच्च नाकरवं कृष्ण नृशंसा जीवितप्रिया
इदानीमागतां तत्र किं नु वक्ष्यति फाल्गुनिः
Tachcha nakaravam krishna nrishansa jivitapriya
Idanimagatam tatra kim nu vakshyati phalgunih