UtshovChapter 58
58.1
जनमेजय उवाच
उत्तङ्काय वरं दत्त्वा गोविन्दो द्विजसत्तम
अत ऊर्ध्वं महाबाहुः किं चकार महायशाः
Janamejaya uvacha
Uttankaya varam dattva govindo dvijasattama
Ata urdhvam mahabahuh kim chakara mahayashah
58.2
वैशंपायन उवाच
दत्त्वा वरमुत्तङ्काय प्रायात्सात्यकिना सह
द्वारकामेव गोविन्दः शीघ्रवेगैर्महाहयैः
Vaishampayana uvacha
Dattva varamuttankaya prayatsatyakina saha
Dvarakameva govindah shighravegairmahahayaih
58.3
सरांसि च नदीश्चैव वनानि विविधानि च
अतिक्रम्य ससादाथ रम्यां द्वारवतीं पुरीम्
Saransi cha nadishchaiva vanani vividhani cha
Atikramya sasadatha ramyam dvaravatim purim
58.4
वर्तमाने महाराज महे रैवतकस्य च
उपायात्पुण्डरीकाक्षो युयुधानानुगस्तदा
Vartamane maharaja mahe raivatakasya cha
Upayatpundarikaksho yuyudhananugastada
58.5
अलंकृतस्तु स गिरिर्नानारूपविचित्रितैः
बभौ रुक्ममयैः काशैः सर्वतः पुरुषर्षभ
Alankritastu sa girirnanarupavichitritaih
Babhau rukmamayaih kashaih sarvatah purusharshabha
58.6
काञ्चनस्रग्भिरग्र्याभिः सुमनोभिस्तथैव च
वासोभिश्च महाशैलः कल्पवृक्षैश्च सर्वशः
Kanchanasragbhiragryabhih sumanobhistathaiva cha
Vasobhishcha mahashailah kalpavrikshaishcha sarvashah
58.7
दीपवृक्षैश्च सौवर्णैरभीक्ष्णमुपशोभितः
गुहानिर्झरदेशेषु दिवाभूतो बभूव ह
Dipavrikshaishcha sauvarnairabhikshnamupashobhitah
Guhanirjharadesheshu divabhuto babhuva ha
58.8
पताकाभिर्विचित्राभिः सघण्टाभिः समन्ततः
पुंभिः स्त्रीभिश्च संघुष्टः प्रगीत इव चाभवत्
अतीव प्रेक्षणीयोऽभून्मेरुर्मुनिगणैरिव
Patakabhirvichitrabhih saghantabhih samantatah
Pumbhih stribhishcha sanghushtah pragita iva chabhavat
Ativa prekshaniyobhunmerurmuniganairiva
58.9
मत्तानां हृष्टरूपाणां स्त्रीणां पुंसां च भारत
गायतां पर्वतेन्द्रस्य दिवस्पृगिव निस्वनः
Mattanam hrishtarupanam strinam punsam cha bharata
Gayatam parvatendrasya divasprigiva nisvanah
58.10
प्रमत्तमत्तसंमत्तक्ष्वेडितोत्कृष्टसंकुला
तथा किलकिलाशब्दैर्भूरभूत्सुमनोहरा
Pramattamattasammattakshveditotkrishtasankula
Tatha kilakilashabdairbhurabhutsumanohara
58.11
विपणापणवान्रम्यो भक्ष्यभोज्यविहारवान्
वस्त्रमाल्योत्करयुतो वीणावेणुमृदङ्गवान्
Vipanapanavanramyo bhakshyabhojyaviharavan
Vastramalyotkarayuto vinavenumridangavan
58.12
सुरामैरेयमिश्रेण भक्ष्यभोज्येन चैव ह
दीनान्धकृपणादिभ्यो दीयमानेन चानिशम्
बभौ परमकल्याणो महस्तस्य महागिरेः
Suramaireyamishrena bhakshyabhojyena chaiva ha
Dinandhakripanadibhyo diyamanena chanisham
Babhau paramakalyano mahastasya mahagireh
58.13
पुण्यावसथवान्वीर पुण्यकृद्भिर्निषेवितः
विहारो वृष्णिवीराणां महे रैवतकस्य ह
स नगो वेश्मसंकीर्णो देवलोक इवाबभौ
Punyavasathavanvira punyakridbhirnishevitah
Viharo vrishniviranam mahe raivatakasya ha
Sa nago veshmasankirno devaloka ivababhau
58.14
तदा च कृष्णसांनिध्यमासाद्य भरतर्षभ
शक्रसद्मप्रतीकाशो बभूव स हि शैलराट्
Tada cha krishnasannidhyamasadya bharatarshabha
Shakrasadmapratikasho babhuva sa hi shailarat
58.15
ततः संपूज्यमानः स विवेश भवनं शुभम्
गोविन्दः सात्यकिश्चैव जगाम भवनं स्वकम्
Tatah sampujyamanah sa vivesha bhavanam shubham
Govindah satyakishchaiva jagama bhavanam svakam
58.16
विवेश च स हृष्टात्मा चिरकालप्रवासकः
कृत्वा नसुकरं कर्म दानवेष्विव वासवः
Vivesha cha sa hrishtatma chirakalapravasakah
Kritva nasukaram karma danaveshviva vasavah
58.17
उपयातं तु वार्ष्णेयं भोजवृष्ण्यन्धकास्तदा
अभ्यगच्छन्महात्मानं देवा इव शतक्रतुम्
Upayatam tu varshneyam bhojavrishnyandhakastada
Abhyagachchhanmahatmanam deva iva shatakratum
58.18
स तानभ्यर्च्य मेधावी पृष्ट्वा च कुशलं तदा
अभ्यवादयत प्रीतः पितरं मातरं तथा
Sa tanabhyarchya medhavi prishtva cha kushalam tada
Abhyavadayata pritah pitaram mataram tatha
58.19
ताभ्यां च संपरिष्वक्तः सान्त्वितश्च महाभुजः
उपोपविष्टस्तैः सर्वैर्वृष्णिभिः परिवारितः
Tabhyam cha samparishvaktah santvitashcha mahabhujah
Upopavishtastaih sarvairvrishnibhih parivaritah
58.20
स विश्रान्तो महातेजाः कृतपादावसेचनः
कथयामास तं कृष्णः पृष्टः पित्रा महाहवम्
Sa vishranto mahatejah kritapadavasechanah
Kathayamasa tam krishnah prishtah pitra mahahavam