UtshovChapter 188
188.1
भीष्म उवाच
हन्त वक्ष्यामि ते पार्थ ध्यानयोगं चतुर्विधम्
यं ज्ञात्वा शाश्वतीं सिद्धिं गच्छन्ति परमर्षयः
Bhishma uvacha
Hanta vakshyami te partha dhyanayogam chaturvidham
Yam gyatva shashvatim siddhim gachchhanti paramarshayah
188.2
यथा स्वनुष्ठितं ध्यानं तथा कुर्वन्ति योगिनः
महर्षयो ज्ञानतृप्ता निर्वाणगतमानसाः
Yatha svanushthitam dhyanam tatha kurvanti yoginah
Maharshayo gyanatripta nirvanagatamanasah
188.3
नावर्तन्ते पुनः पार्थ मुक्ताः संसारदोषतः
जन्मदोषपरिक्षीणाः स्वभावे पर्यवस्थिताः
Navartante punah partha muktah sansaradoshatah
Janmadoshaparikshinah svabhave paryavasthitah
188.4
निर्द्वंद्वा नित्यसत्त्वस्था विमुक्ता नित्यमाश्रिताः
असङ्गीन्यविवादीनि मनःशान्तिकराणि च
Nirdvandva nityasattvastha vimukta nityamashritah
Asanginyavivadini manahshantikarani cha
188.5
तत्र स्वाध्यायसंश्लिष्टमेकाग्रं धारयेन्मनः
पिण्डीकृत्येन्द्रियग्राममासीनः काष्ठवन्मुनिः
Tatra svadhyayasanshlishtamekagram dharayenmanah
Pindikrityendriyagramamasinah kashthavanmunih
188.6
शब्दं न विन्देच्छ्रोत्रेण स्पर्शं त्वचा न वेदयेत्
रूपं न चक्षुषा विद्याज्जिह्वया न रसांस्तथा
Shabdam na vindechchhrotrena sparsham tvacha na vedayet
Rupam na chakshusha vidyajjihvaya na rasanstatha
188.7
घ्रेयाण्यपि च सर्वाणि जह्याद्ध्यानेन योगवित्
पञ्चवर्गप्रमाथीनि नेच्छेच्चैतानि वीर्यवान्
Ghreyanyapi cha sarvani jahyaddhyanena yogavit
Panchavargapramathini nechchhechchaitani viryavan
188.8
ततो मनसि संसज्य पञ्चवर्गं विचक्षणः
समादध्यान्मनो भ्रान्तमिन्द्रियैः सह पञ्चभिः
Tato manasi sansajya panchavargam vichakshanah
Samadadhyanmano bhrantamindriyaih saha panchabhih
188.9
विसंचारि निरालम्बं पञ्चद्वारं चलाचलम्
पूर्वे ध्यानपथे धीरः समादध्यान्मनोऽन्तरम्
Visanchari niralambam panchadvaram chalachalam
Purve dhyanapathe dhirah samadadhyanmanontaram
188.10
इन्द्रियाणि मनश्चैव यदा पिण्डीकरोत्ययम्
एष ध्यानपथः पूर्वो मया समनुवर्णितः
Indriyani manashchaiva yada pindikarotyayam
Esha dhyanapathah purvo maya samanuvarnitah
188.11
तस्य तत्पूर्वसंरुद्धं मनःषष्ठमनन्तरम्
स्फुरिष्यति समुद्भ्रान्तं विद्युदम्बुधरे यथा
Tasya tatpurvasanruddham manahshashthamanantaram
Sphurishyati samudbhrantam vidyudambudhare yatha
188.12
जलबिन्दुर्यथा लोलः पर्णस्थः सर्वतश्चलः
एवमेवास्य तच्चित्तं भवति ध्यानवर्त्मनि
Jalabinduryatha lolah parnasthah sarvatashchalah
Evamevasya tachchittam bhavati dhyanavartmani
188.13
समाहितं क्षणं किंचिद्ध्यानवर्त्मनि तिष्ठति
पुनर्वायुपथं भ्रान्तं मनो भवति वायुवत्
Samahitam kshanam kinchiddhyanavartmani tishthati
Punarvayupatham bhrantam mano bhavati vayuvat
188.14
अनिर्वेदो गतक्लेशो गततन्द्रीरमत्सरः
समादध्यात्पुनश्चेतो ध्यानेन ध्यानयोगवित्
Anirvedo gataklesho gatatandriramatsarah
Samadadhyatpunashcheto dhyanena dhyanayogavit
188.15
विचारश्च वितर्कश्च विवेकश्चोपजायते
मुनेः समादधानस्य प्रथमं ध्यानमादितः
Vicharashcha vitarkashcha vivekashchopajayate
Muneh samadadhanasya prathamam dhyanamaditah
188.16
मनसा क्लिश्यमानस्तु समाधानं च कारयेत्
न निर्वेदं मुनिर्गच्छेत्कुर्यादेवात्मनो हितम्
Manasa klishyamanastu samadhanam cha karayet
Na nirvedam munirgachchhetkuryadevatmano hitam
188.17
पांसुभस्मकरीषाणां यथा वै राशयश्चिताः
सहसा वारिणा सिक्ता न यान्ति परिभावनाम्
Pansubhasmakarishanam yatha vai rashayashchitah
Sahasa varina sikta na yanti paribhavanam
188.18
किंचित्स्निग्धं यथा च स्याच्छुष्कचूर्णमभावितम्
क्रमशस्तु शनैर्गच्छेत्सर्वं तत्परिभावनम्
Kinchitsnigdham yatha cha syachchhushkachurnamabhavitam
Kramashastu shanairgachchhetsarvam tatparibhavanam
188.19
एवमेवेन्द्रियग्रामं शनैः संपरिभावयेत्
संहरेत्क्रमशश्चैव स सम्यक्प्रशमिष्यति
Evamevendriyagramam shanaih samparibhavayet
Sanharetkramashashchaiva sa samyakprashamishyati
188.20
स्वयमेव मनश्चैव पञ्चवर्गश्च भारत
पूर्वं ध्यानपथं प्राप्य नित्ययोगेन शाम्यति
Svayameva manashchaiva panchavargashcha bharata
Purvam dhyanapatham prapya nityayogena shamyati
188.21
न तत्पुरुषकारेण न च दैवेन केनचित्
सुखमेष्यति तत्तस्य यदेवं संयतात्मनः
Na tatpurushakarena na cha daivena kenachit
Sukhameshyati tattasya yadevam sanyatatmanah
188.22
सुखेन तेन संयुक्तो रंस्यते ध्यानकर्मणि
गच्छन्ति योगिनो ह्येवं निर्वाणं तन्निरामयम्
Sukhena tena sanyukto ransyate dhyanakarmani
Gachchhanti yogino hyevam nirvanam tanniramayam