অধ্যায় 188

188.1

ভীষ্ম উবাচ
হন্ত বক্ষ্যামি তে পার্থ ধ্যানয়োগং চতুর্বিধম্
যং জ্ঞাত্বা শাশ্বতীং সিদ্ধিং গচ্ছন্তি পরমর্ষয়ঃ

যথা স্বনুষ্ঠিতং ধ্যানং তথা কুর্বন্তি যোগিনঃ
মহর্ষয়ো জ্ঞানতৃপ্তা নির্বাণগতমানসাঃ

নাবর্তন্তে পুনঃ পার্থ মুক্তাঃ সংসারদোষতঃ
জন্মদোষপরিক্ষীণাঃ স্বভাবে পর্যবস্থিতাঃ

নির্দ্বংদ্বা নিত্যসত্ত্বস্থা বিমুক্তা নিত্যমাশ্রিতাঃ
অসঙ্গীন্যবিবাদীনি মনঃশান্তিকরাণি চ

তত্র স্বাধ্যায়সংশ্লিষ্টমেকাগ্রং ধারয়েন্মনঃ
পিণ্ডীকৃত্যেন্দ্রিয়গ্রামমাসীনঃ কাষ্ঠবন্মুনিঃ

শব্দং ন বিন্দেচ্ছ্রোত্রেণ স্পর্শং ত্বচা ন বেদয়েৎ
রূপং ন চক্ষুষা বিদ্যাজ্জিহ্বয়া ন রসাংস্তথা

ঘ্রেয়াণ্যপি চ সর্বাণি জহ্যাদ্ধ্যানেন যোগবিৎ
পঞ্চবর্গপ্রমাথীনি নেচ্ছেচ্চৈতানি বীর্যবান্

ততো মনসি সংসজ্য পঞ্চবর্গং বিচক্ষণঃ
সমাদধ্যান্মনো ভ্রান্তমিন্দ্রিয়ৈঃ সহ পঞ্চভিঃ

বিসংচারি নিরালম্বং পঞ্চদ্বারং চলাচলম্
পূর্বে ধ্যানপথে ধীরঃ সমাদধ্যান্মনোঽন্তরম্

ইন্দ্রিয়াণি মনশ্চৈব যদা পিণ্ডীকরোত্যয়ম্
এষ ধ্যানপথঃ পূর্বো ময়া সমনুবর্ণিতঃ

তস্য তত্পূর্বসংরুদ্ধং মনঃষষ্ঠমনন্তরম্
স্ফুরিষ্যতি সমুদ্ভ্রান্তং বিদ্যুদম্বুধরে যথা

জলবিন্দুর্যথা লোলঃ পর্ণস্থঃ সর্বতশ্চলঃ
এবমেবাস্য তচ্চিত্তং ভবতি ধ্যানবর্ত্মনি

সমাহিতং ক্ষণং কিংচিদ্ধ্যানবর্ত্মনি তিষ্ঠতি
পুনর্বায়ুপথং ভ্রান্তং মনো ভবতি বায়ুবৎ

অনির্বেদো গতক্লেশো গততন্দ্রীরমত্সরঃ
সমাদধ্যাত্পুনশ্চেতো ধ্যানেন ধ্যানয়োগবিৎ

বিচারশ্চ বিতর্কশ্চ বিবেকশ্চোপজায়তে
মুনেঃ সমাদধানস্য প্রথমং ধ্যানমাদিতঃ

মনসা ক্লিশ্যমানস্তু সমাধানং চ কারয়েৎ
ন নির্বেদং মুনির্গচ্ছেত্কুর্যাদেবাত্মনো হিতম্

পাংসুভস্মকরীষাণাং যথা বৈ রাশয়শ্চিতাঃ
সহসা বারিণা সিক্তা ন যান্তি পরিভাবনাম্

কিংচিত্স্নিগ্ধং যথা চ স্যাচ্ছুষ্কচূর্ণমভাবিতম্
ক্রমশস্তু শনৈর্গচ্ছেত্সর্বং তত্পরিভাবনম্

এবমেবেন্দ্রিয়গ্রামং শনৈঃ সংপরিভাবয়েৎ
সংহরেত্ক্রমশশ্চৈব স সম্যক্প্রশমিষ্যতি

স্বয়মেব মনশ্চৈব পঞ্চবর্গশ্চ ভারত
পূর্বং ধ্যানপথং প্রাপ্য নিত্যয়োগেন শাম্যতি

ন তত্পুরুষকারেণ ন চ দৈবেন কেনচিৎ
সুখমেষ্যতি তত্তস্য যদেবং সংয়তাত্মনঃ

সুখেন তেন সংয়ুক্তো রংস্যতে ধ্যানকর্মণি
গচ্ছন্তি যোগিনো হ্যেবং নির্বাণং তন্নিরাময়ম্