Utshovঅধ্যায় 187
187.1
যুধিষ্ঠির উবাচ
অধ্যাত্মং নাম যদিদং পুরুষস্যেহ চিন্ত্যতে
যদধ্যাত্মং যতশ্চৈতত্তন্মে ব্রূহি পিতামহ
187.2
ভীষ্ম উবাচ
অধ্যাত্মমিতি মাং পার্থ যদেতদনুপৃচ্ছসি
তদ্ব্যাখ্যাস্যামি তে তাত শ্রেয়স্করতরং সুখম্
187.3
যজ্জ্ঞাত্বা পুরুষো লোকে প্রীতিং সৌখ্যং চ বিন্দতি
ফললাভশ্চ সদ্যঃ স্যাত্সর্বভূতহিতং চ তৎ
187.4
পৃথিবী বায়ুরাকাশমাপো জ্যোতিশ্চ পঞ্চমম্
মহাভূতানি ভূতানাং সর্বেষাং প্রভবাপ্যয়ৌ
187.5
ততঃ সৃষ্টানি তত্রৈব তানি যান্তি পুনঃ পুনঃ
মহাভূতানি ভূতেষু সাগরস্যোর্ময়ো যথা
187.6
প্রসার্য চ যথাঙ্গানি কূর্মঃ সংহরতে পুনঃ
তদ্বদ্ভূতানি ভূতাত্মা সৃষ্ট্বা সংহরতে পুনঃ
187.7
মহাভূতানি পঞ্চৈব সর্বভূতেষু ভূতকৃৎ
অকরোত্তেষু বৈষম্যং তত্তু জীবোঽনু পশ্যতি
187.8
শব্দঃ শ্রোত্রং তথা খানি ত্রয়মাকাশয়োনিজম্
বায়োস্ত্বক্স্পর্শচেষ্টাশ্চ বাগিত্যেতচ্চতুষ্টয়ম্
187.9
রূপং চক্ষুস্তথা পক্তিস্ত্রিবিধং তেজ উচ্যতে
রসঃ ক্লেদশ্চ জিহ্বা চ ত্রয়ো জলগুণাঃ স্মৃতাঃ
187.10
ঘ্রেয়ং ঘ্রাণং শরীরং চ তে তু ভূমিগুণাস্ত্রয়ঃ
মহাভূতানি পঞ্চৈব ষষ্ঠং তু মন উচ্যতে
187.11
ইন্দ্রিয়াণি মনশ্চৈব বিজ্ঞানান্যস্য ভারত
সপ্তমী বুদ্ধিরিত্যাহুঃ ক্ষেত্রজ্ঞঃ পুনরষ্টমঃ
187.12
চক্ষুরালোকনায়ৈব সংশয়ং কুরুতে মনঃ
বুদ্ধিরধ্যবসায়ায় ক্ষেত্রজ্ঞঃ সাক্ষিবত্স্থিতঃ
187.13
ঊর্ধ্বং পাদতলাভ্যাং যদর্বাগূর্ধ্বং চ পশ্যতি
এতেন সর্বমেবেদং বিদ্ধ্যভিব্যাপ্তমন্তরম্
187.14
পুরুষে চেন্দ্রিয়াণীহ বেদিতব্যানি কৃত্স্নশঃ
তমো রজশ্চ সত্ত্বং চ বিদ্ধি ভাবাংস্তদাশ্রয়ান্
187.15
এতাং বুদ্ধ্বা নরো বুদ্ধ্যা ভূতানামাগতিং গতিম্
সমবেক্ষ্য শনৈশ্চৈব লভতে শমমুত্তমম্
187.16
গুণান্নেনীয়তে বুদ্ধির্বুদ্ধিরেবেন্দ্রিয়াণ্যপি
মনঃষষ্ঠানি সর্বাণি বুদ্ধ্যভাবে কুতো গুণাঃ
187.17
ইতি তন্ময়মেবৈতত্সর্বং স্থাবরজঙ্গমম্
প্রলীয়তে চোদ্ভবতি তস্মান্নির্দিশ্যতে তথা
187.18
যেন পশ্যতি তচ্চক্ষুঃ শৃণোতি শ্রোত্রমুচ্যতে
জিঘ্রতি ঘ্রাণমিত্যাহূ রসং জানাতি জিহ্বয়া
187.19
ত্বচা স্পৃশতি চ স্পর্শান্বুদ্ধির্বিক্রিয়তেঽসকৃৎ
যেন সংকল্পয়ত্যর্থং কিংচিদ্ভবতি তন্মনঃ
187.20
অধিষ্ঠানানি বুদ্ধের্হি পৃথগর্থানি পঞ্চধা
পঞ্চেন্দ্রিয়াণি যান্যাহুস্তান্যদৃশ্যোঽধিতিষ্ঠতি
187.21
পুরুষাধিষ্ঠিতা বুদ্ধিস্ত্রিষু ভাবেষু বর্ততে
কদাচিল্লভতে প্রীতিং কদাচিদনুশোচতি
187.22
ন সুখেন ন দুঃখেন কদাচিদপি বর্ততে
এবং নরাণাং মনসি ত্রিষু ভাবেষ্ববস্থিতা
187.23
সেয়ং ভাবাত্মিকা ভাবাংস্ত্রীনেতান্নাতিবর্ততে
সরিতাং সাগরো ভর্তা মহাবেলামিবোর্মিমান্
187.24
অতিভাবগতা বুদ্ধির্ভাবে মনসি বর্ততে
প্রবর্তমানং হি রজস্তদ্ভাবমনুবর্ততে
187.25
ইন্দ্রিয়াণি হি সর্বাণি প্রদর্শয়তি সা সদা
প্রীতিঃ সত্ত্বং রজঃ শোকস্তমো মোহশ্চ তে ত্রয়ঃ
187.26
যে যে চ ভাবা লোকেঽস্মিন্সর্বেষ্বেতেষু তে ত্রিষু
ইতি বুদ্ধিগতিঃ সর্বা ব্যাখ্যাতা তব ভারত
187.27
ইন্দ্রিয়াণি চ সর্বাণি বিজেতব্যানি ধীমতা
সত্ত্বং রজস্তমশ্চৈব প্রাণিনাং সংশ্রিতাঃ সদা
187.28
ত্রিবিধা বেদনা চৈব সর্বসত্ত্বেষু দৃশ্যতে
সাত্ত্বিকী রাজসী চৈব তামসী চেতি ভারত
187.29
সুখস্পর্শঃ সত্ত্বগুণো দুঃখস্পর্শো রজোগুণঃ
তমোগুণেন সংয়ুক্তৌ ভবতোঽব্যাবহারিকৌ
187.30
তত্র যত্প্রীতিসংয়ুক্তং কায়ে মনসি বা ভবেৎ
বর্ততে সাত্ত্বিকো ভাব ইত্যবেক্ষেত তত্তদা
187.31
অথ যদ্দুঃখসংয়ুক্তমতুষ্টিকরমাত্মনঃ
প্রবৃত্তং রজ ইত্যেব তন্নসংরভ্য চিন্তয়েৎ
187.32
অথ যন্মোহসংয়ুক্তমব্যক্তমিব যদ্ভবেৎ
অপ্রতর্ক্যমবিজ্ঞেয়ং তমস্তদুপধারয়েৎ
187.33
প্রহর্ষঃ প্রীতিরানন্দঃ সুখং সংশান্তচিত্ততা
কথংচিদভিবর্তন্ত ইত্যেতে সাত্ত্বিকা গুণাঃ
187.34
অতুষ্টিঃ পরিতাপশ্চ শোকো লোভস্তথাক্ষমা
লিঙ্গানি রজসস্তানি দৃশ্যন্তে হেত্বহেতুভিঃ
187.35
অভিমানস্তথা মোহঃ প্রমাদঃ স্বপ্নতন্দ্রিতা
কথংচিদভিবর্তন্তে বিবিধাস্তামসা গুণাঃ
187.36
দূরগং বহুধাগামি প্রার্থনাসংশয়াত্মকম্
মনঃ সুনিয়তং যস্য স সুখী প্রেত্য চেহ চ
187.37
সত্ত্বক্ষেত্রজ্ঞয়োরেতদন্তরং পশ্য সূক্ষ্ময়োঃ
সৃজতে তু গুণানেক একো ন সৃজতে গুণান্
187.38
মশকোদুম্বরৌ চাপি সংপ্রয়ুক্তৌ যথা সদা
অন্যোন্যমন্যৌ চ যথা সংপ্রয়োগস্তথা তয়োঃ
187.39
পৃথগ্ভূতৌ প্রকৃত্যা তৌ সংপ্রয়ুক্তৌ চ সর্বদা
যথা মত্স্যো জলং চৈব সংপ্রয়ুক্তৌ তথৈব তৌ
187.40
ন গুণা বিদুরাত্মানং স গুণান্বেত্তি সর্বশঃ
পরিদ্রষ্টা গুণানাং চ সংস্রষ্টা মন্যতে সদা
187.41
ইন্দ্রিয়ৈস্তু প্রদীপার্থং কুরুতে বুদ্ধিসপ্তমৈঃ
নির্বিচেষ্টৈরজানদ্ভিঃ পরমাত্মা প্রদীপবৎ
187.42
সৃজতে হি গুণান্সত্ত্বং ক্ষেত্রজ্ঞঃ পরিপশ্যতি
সংপ্রয়োগস্তয়োরেষ সত্ত্বক্ষেত্রজ্ঞয়োর্ধ্রুবঃ
187.43
আশ্রয়ো নাস্তি সত্ত্বস্য ক্ষেত্রজ্ঞস্য চ কশ্চন
সত্ত্বং মনঃ সংসৃজতি ন গুণান্বৈ কদাচন
187.44
রশ্মীংস্তেষাং স মনসা যদা সম্যঙ্নিয়চ্ছতি
তদা প্রকাশতেঽস্যাত্মা ঘটে দীপো জ্বলন্নিব
187.45
ত্যক্ত্বা যঃ প্রাকৃতং কর্ম নিত্যমাত্মরতির্মুনিঃ
সর্বভূতাত্মভূতঃ স্যাত্স গচ্ছেত্পরমাং গতিম্
187.46
যথা বারিচরঃ পক্ষী লিপ্যমানো ন লিপ্যতে
এবমেব কৃতপ্রজ্ঞো ভূতেষু পরিবর্ততে
187.47
এবংস্বভাবমেবৈতত্স্ববুদ্ধ্যা বিহরেন্নরঃ
অশোচন্নপ্রহৃষ্যংশ্চ চরেদ্বিগতমত্সরঃ
187.48
স্বভাবসিদ্ধ্যা সংসিদ্ধান্স নিত্যং সৃজতে গুণান্
ঊর্ণনাভির্যথা স্রষ্টা বিজ্ঞেয়াস্তন্তুবদ্গুণাঃ
187.49
প্রধ্বস্তা ন নিবর্তন্তে নিবৃত্তির্নোপলভ্যতে
প্রত্যক্ষেণ পরোক্ষং তদনুমানেন সিধ্যতি
187.50
এবমেকে ব্যবস্যন্তি নিবৃত্তিরিতি চাপরে
উভয়ং সংপ্রধার্যৈতদধ্যবস্যেদ্যথামতি
187.51
ইতীমং হৃদয়গ্রন্থিং বুদ্ধিভেদময়ং দৃঢম্
বিমুচ্য সুখমাসীত ন শোচেচ্ছিন্নসংশয়ঃ
187.52
মলিনাঃ প্রাপ্নুয়ুঃ শুদ্ধিং যথা পূর্ণাং নদীং নরাঃ
অবগাহ্য সুবিদ্বংসো বিদ্ধি জ্ঞানমিদং তথা
187.53
মহানদীং হি পারজ্ঞস্তপ্যতে ন তরন্যথা
এবং যে বিদুরধ্যাত্মং কৈবল্যং জ্ঞানমুত্তমম্
187.54
এতাং বুদ্ধ্বা নরঃ সর্বাং ভূতানামাগতিং গতিম্
অবেক্ষ্য চ শনৈর্বুদ্ধ্যা লভতে শং পরং ততঃ
187.55
ত্রিবর্গো যস্য বিদিতঃ প্রাগ্জ্যোতিঃ স বিমুচ্যতে
অন্বিষ্য মনসা যুক্তস্তত্ত্বদর্শী নিরুত্সুকঃ
187.56
ন চাত্মা শক্যতে দ্রষ্টুমিন্দ্রিয়েষু বিভাগশঃ
তত্র তত্র বিসৃষ্টেষু দুর্জয়েষ্বকৃতাত্মভিঃ
187.57
এতদ্বুদ্ধ্বা ভবেদ্বুদ্ধঃ কিমন্যদ্বুদ্ধলক্ষণম্
বিজ্ঞায় তদ্ধি মন্যন্তে কৃতকৃত্যা মনীষিণঃ
187.58
ন ভবতি বিদুষাং ততো ভয়ং; যদবিদুষাং সুমহদ্ভয়ং ভবেৎ
ন হি গতিরধিকাস্তি কস্যচি;ত্সতি হি গুণে প্রবদন্ত্যতুল্যতাম্
187.59
যত্করোত্যনভিসংধিপূর্বকং; তচ্চ নির্ণুদতি যত্পুরা কৃতম্
নাপ্রিয়ং তদুভয়ং কুতঃ প্রিয়ং; তস্য তজ্জনয়তীহ কুর্বতঃ
187.60
লোক আতুরজনান্বিরাবিণ;স্তত্তদেব বহু পশ্য শোচতঃ
তত্র পশ্য কুশলানশোচতো; যে বিদুস্তদুভয়ং পদং সদা