Utshovঅধ্যায় 186
186.1
যুধিষ্ঠির উবাচ
আচারস্য বিধিং তাত প্রোচ্যমানং ত্বয়ানঘ
শ্রোতুমিচ্ছামি ধর্মজ্ঞ সর্বজ্ঞো হ্যসি মে মতঃ
186.2
ভীষ্ম উবাচ
দুরাচারা দুর্বিচেষ্টা দুষ্প্রজ্ঞাঃ প্রিয়সাহসাঃ
অসন্তো হ্যভিবিখ্যাতাঃ সন্তশ্চাচারলক্ষণাঃ
186.3
পুরীষং যদি বা মূত্রং যে ন কুর্বন্তি মানবাঃ
রাজমার্গে গবাং মধ্যে ধান্যমধ্যে চ তে শুভাঃ
186.4
শৌচমাবশ্যকং কৃত্বা দেবতানাং চ তর্পণম্
ধর্মমাহুর্মনুষ্যাণামুপস্পৃশ্য নদীং তরেৎ
186.5
সূর্যং সদোপতিষ্ঠেত ন স্বপ্যাদ্ভাস্করোদয়ে
সায়ং প্রাতর্জপন্সংধ্যাং তিষ্ঠেত্পূর্বাং তথাপরাম্
186.6
পঞ্চার্দ্রো ভোজনং কুর্যাত্প্রাঙ্মুখো মৌনমাস্থিতঃ
ন নিন্দেদন্নভক্ষ্যাংশ্চ স্বাদ্বস্বাদু চ ভক্ষয়েৎ
186.7
নার্দ্রপাণিঃ সমুত্তিষ্ঠেন্নার্দ্রপাদঃ স্বপেন্নিশি
দেবর্ষিনারদপ্রোক্তমেতদাচারলক্ষণম্
186.8
শুচিকামমনড্বাহং দেবগোষ্ঠং চতুষ্পথম্
ব্রাহ্মণং ধার্মিকং চৈব নিত্যং কুর্যাত্প্রদক্ষিণম্
186.9
অতিথীনাং চ সর্বেষাং প্রেষ্যাণাং স্বজনস্য চ
সামান্যং ভোজনং ভৃত্যৈঃ পুরুষস্য প্রশস্যতে
186.10
সায়ং প্রাতর্মনুষ্যাণামশনং দেবনির্মিতম্
নান্তরা ভোজনং দৃষ্টমুপবাসী তথা ভবেৎ
186.11
হোমকালে তথা জুহ্বন্নৃতুকালে তথা ব্রজন্
অনন্যস্ত্রীজনঃ প্রাজ্ঞো ব্রহ্মচারী তথা ভবেৎ
186.12
অমৃতং ব্রাহ্মণোচ্ছিষ্টং জনন্যা হৃদয়ং কৃতম্
উপাসীত জনঃ সত্যং সত্যং সন্ত উপাসতে
186.13
যজুষা সংস্কৃতং মাংসং নিবৃত্তো মাংসভক্ষণাৎ
ন ভক্ষয়েদ্বৃথামাংসং পৃষ্ঠমাংসং চ বর্জয়েৎ
186.14
স্বদেশে পরদেশে বা অতিথিং নোপবাসয়েৎ
কাম্যং কর্মফলং লব্ধ্বা গুরূণামুপপাদয়েৎ
186.15
গুরুভ্য আসনং দেয়ং কর্তব্যং চাভিবাদনম্
গুরূনভ্যর্চ্য যুজ্যন্তে আয়ুষা যশসা শ্রিয়া
186.16
নেক্ষেতাদিত্যমুদ্যন্তং ন চ নগ্নাং পরস্ত্রিয়ম্
মৈথুনং সময়ে ধর্ম্যং গুহ্যং চৈব সমাচরেৎ
186.17
তীর্থানাং হৃদয়ং তীর্থং শুচীনাং হৃদয়ং শুচিঃ
সর্বমার্যকৃতং শৌচং বালসংস্পর্শনানি চ
186.18
দর্শনে দর্শনে নিত্যং সুখপ্রশ্নমুদাহরেৎ
সায়ং প্রাতশ্চ বিপ্রাণাং প্রদিষ্টমভিবাদনম্
186.19
দেবগোষ্ঠে গবাং মধ্যে ব্রাহ্মণানাং ক্রিয়াপথে
স্বাধ্যায়ে ভোজনে চৈব দক্ষিণং পাণিমুদ্ধরেৎ
186.20
পণ্যানাং শোভনং পণ্যং কৃষীণাং বাদ্যতে কৃষিঃ
বহুকারং চ সস্যানাং বাহ্যে বাহ্যং তথা গবাম্
186.21
সংপন্নং ভোজনে নিত্যং পানীয়ে তর্পণং তথা
সুশৃতং পায়সে ব্রূয়াদ্যবাগ্বাং কৃসরে তথা
186.22
শ্মশ্রুকর্মণি সংপ্রাপ্তে ক্ষুতে স্নানেঽথ ভোজনে
ব্যাধিতানাং চ সর্বেষামায়ুষ্যমভিনন্দনম্
186.23
প্রত্যাদিত্যং ন মেহেত ন পশ্যেদাত্মনঃ শকৃৎ
সুতস্ত্রিয়া চ শয়নং সহভোজ্যং চ বর্জয়েৎ
186.24
ত্বংকারং নামধেয়ং চ জ্যেষ্ঠানাং পরিবর্জয়েৎ
অবরাণাং সমানানামুভয়েষাং ন দুষ্যতি
186.25
হৃদয়ং পাপবৃত্তানাং পাপমাখ্যাতি বৈকৃতম্
জ্ঞানপূর্বং বিনশ্যন্তি গূহমানা মহাজনে
186.26
জ্ঞানপূর্বং কৃতং পাপং ছাদয়ন্ত্যবহুশ্রুতাঃ
নৈনং মনুষ্যাঃ পশ্যন্তি পশ্যন্তি ত্রিদিবৌকসঃ
186.27
পাপেন হি কৃতং পাপং পাপমেবানুবর্ততে
ধার্মিকেণ কৃতো ধর্মঃ কর্তারমনুবর্ততে
186.28
পাপং কৃতং ন স্মরতীহ মূঢো; বিবর্তমানস্য তদেতি কর্তুঃ
রাহুর্যথা চন্দ্রমুপৈতি চাপি; তথাবুধং পাপমুপৈতি কর্ম
186.29
আশয়া সংচিতং দ্রব্যং যত্কালে নেহ ভুজ্যতে
তদ্বুধা ন প্রশংসন্তি মরণং ন প্রতীক্ষতে
186.30
মানসং সর্বভূতানাং ধর্মমাহুর্মনীষিণঃ
তস্মাত্সর্বেষু ভূতেষু মনসা শিবমাচরেৎ
186.31
এক এব চরেদ্ধর্মং নাস্তি ধর্মে সহায়তা
কেবলং বিধিমাসাদ্য সহায়ঃ কিং করিষ্যতি
186.32
দেবা যোনির্মনুষ্যাণাং দেবানামমৃতং দিবি
প্রেত্যভাবে সুখং ধর্মাচ্ছশ্বত্তৈরুপভুজ্যতে