Utshovঅধ্যায় 185
185.1
ভৃগুরুবাচ
বানপ্রস্থাঃ খলু ঋষিধর্মমনুসরন্তঃ পুণ্যানি তীর্থানি নদীপ্রস্রবণানি সুবিবিক্তেষ্বরণ্যেষু মৃগমহিষবরাহসৃমরগজাকীর্ণেষু তপস্যন্তোঽনুসংচরন্তি
ত্যক্তগ্রাম্যবস্ত্রাহারোপভোগা বন্যৌষধিমূলফলপর্ণপরিমিতবিচিত্রনিয়তাহারাঃ স্থানাসনিনো ভূমিপাষাণসিকতাশর্করাবালুকাভস্মশায়িনঃ কাশকুশচর্মবল্কলসংবৃতাঙ্গাঃ কেশশ্মশ্রুনখরোমধারিণো নিয়তকালোপস্পর্শনা অস্কন্নহোমবলিকালানুষ্ঠায়িনঃ সমিত্কুশকুসুমোপহারহোমার্জনলব্ধবিশ্রামাঃ শীতোষ্ণপবননিষ্টপ্তবিভিন্নসর্বত্বচো বিবিধনিয়ময়োগচর্যাবিহিতধর্মানুষ্ঠানহৃতমাংসশোণিতাস্ত্বগস্থিভূতা ধৃতিপরাঃ সত্ত্বয়োগাচ্ছরীরাণ্যুদ্বহন্তি
185.2
যস্ত্বেতাং নিয়তশ্চর্যাং ব্রহ্মর্ষিবিহিতাং চরেৎ
স দহেদগ্নিবদ্দোষাঞ্জয়েল্লোকাংশ্চ দুর্জয়ান্
185.3
পরিব্রাজকানাং পুনরাচারস্তদ্যথা
বিমুচ্যাগ্নিধনকলত্রপরিবর্হসঙ্গানাত্মনঃ স্নেহপাশানবধূয় পরিব্রজন্তি সমলোষ্টাশ্মকাঞ্চনাস্ত্রিবর্গপ্রবৃত্তেষ্বারম্ভেষ্বসক্তবুদ্ধয়োঽরিমিত্রোদাসীনেষু তুল্যবৃত্তয়ঃ স্থাবরজরায়ুজাণ্ডজস্বেদজোদ্ভিজ্জানাং ভূতানাং বাঙ্মনঃকর্মভিরনভিদ্রোহিণোঽনিকেতাঃ পর্বতপুলিনবৃক্ষমূলদেবতায়তনান্যনুচরন্তো বাসার্থমুপেয়ুর্নগরং গ্রামং বা নগরে পঞ্চরাত্রিকা গ্রামৈকরাত্রিকাঃ
প্রবিশ্য চ প্রাণধারণমাত্রার্থং দ্বিজাতীনাং ভবনান্যসংকীর্ণকর্মণামুপতিষ্ঠেয়ুঃ পাত্রপতিতায়াচিতভৈক্ষাঃ কামক্রোধদর্পমোহলোভকার্পণ্যদম্ভপরিবাদাভিমানহিংসানিবৃত্তা ইতি
185.4
ভবতি চাত্র শ্লোকঃ
অভয়ং সর্বভূতেভ্যো দত্ত্বা চরতি যো মুনিঃ
ন তস্য সর্বভূতেভ্যো ভয়মুত্পদ্যতে ক্বচিৎ
185.5
কৃত্বাগ্নিহোত্রং স্বশরীরসংস্থং; শারীরমগ্নিং স্বমুখে জুহোতি
যো ভৈক্ষচর্যোপগতৈর্হবির্ভি;শ্চিতাগ্নিনাং স ব্যতিয়াতি লোকান্
185.6
মোক্ষাশ্রমং যঃ কুরুতে যথোক্তং; শুচিঃ সুসংকল্পিতবুদ্ধিয়ুক্তঃ
অনিন্ধনং জ্যোতিরিব প্রশান্তং; স ব্রহ্মলোকং শ্রয়তে দ্বিজাতিঃ
185.7
ভরদ্বাজ উবাচ
অস্মাল্লোকাত্পরো লোকঃ শ্রূয়তে নোপলভ্যতে
তমহং জ্ঞাতুমিচ্ছামি তদ্ভবান্বক্তুমর্হতি
185.8
ভৃগুরুবাচ
উত্তরে হিমবত্পার্শ্বে পুণ্যে সর্বগুণান্বিতে
পুণ্যঃ ক্ষেম্যশ্চ কাম্যশ্চ স বরো লোক উচ্যতে
185.9
তত্র হ্যপাপকর্মাণঃ শুচয়োঽত্যন্তনির্মলাঃ
লোভমোহপরিত্যক্তা মানবা নিরুপদ্রবাঃ
185.10
স স্বর্গসদৃশো দেশস্তত্র হ্যুক্তাঃ শুভা গুণাঃ
কালে মৃত্যুঃ প্রভবতি স্পৃশন্তি ব্যাধয়ো ন চ
185.11
ন লোভঃ পরদারেষু স্বদারনিরতো জনঃ
ন চান্যোন্যবধস্তত্র দ্রব্যেষু ন চ বিস্ময়ঃ
পরোক্ষধর্মো নৈবাস্তি সংদেহো নাপি জায়তে
185.12
কৃতস্য তু ফলং তত্র প্রত্যক্ষমুপলভ্যতে
শয্যায়ানাসনোপেতাঃ প্রাসাদভবনাশ্রয়াঃ
সর্বকামৈর্বৃতাঃ কেচিদ্ধেমাভরণভূষিতাঃ
185.13
প্রাণধারণমাত্রং তু কেষাংচিদুপপদ্যতে
শ্রমেণ মহতা কেচিত্কুর্বন্তি প্রাণধারণম্
185.14
ইহ ধর্মপরাঃ কেচিত্কেচিন্নৈকৃতিকা নরাঃ
সুখিতা দুঃখিতাঃ কেচিন্নির্ধনা ধনিনোঽপরে
185.15
ইহ শ্রমো ভয়ং মোহঃ ক্ষুধা তীব্রা চ জায়তে
লোভশ্চার্থকৃতো নৄণাং যেন মুহ্যন্তি পণ্ডিতাঃ
185.16
ইহ চিন্তা বহুবিধা ধর্মাধর্মস্য কর্মণঃ
যস্তদ্বেদোভয়ং প্রাজ্ঞঃ পাপ্মনা ন স লিপ্যতে
185.17
সোপধং নিকৃতিঃ স্তেয়ং পরিবাদোঽভ্যসূয়তা
পরোপঘাতো হিংসা চ পৈশুন্যমনৃতং তথা
185.18
এতানাসেবতে যস্তু তপস্তস্য প্রহীয়তে
যস্ত্বেতান্নাচরেদ্বিদ্বাংস্তপস্তস্যাভিবর্ধতে
185.19
কর্মভূমিরিয়ং লোক ইহ কৃত্বা শুভাশুভম্
শুভৈঃ শুভমবাপ্নোতি কৃত্বাশুভমতোঽন্যথা
185.20
ইহ প্রজাপতিঃ পূর্বং দেবাঃ সর্ষিগণাস্তথা
ইষ্ট্বেষ্টতপসঃ পূতা ব্রহ্মলোকমুপাশ্রিতাঃ
185.21
উত্তরঃ পৃথিবীভাগঃ সর্বপুণ্যতমঃ শুভঃ
ইহত্যাস্তত্র জায়ন্তে যে বৈ পুণ্যকৃতো জনাঃ
185.22
অসত্কর্মাণি কুর্বন্তস্তির্যগ্যোনিষু চাপরে
ক্ষীণায়ুষস্তথৈবান্যে নশ্যন্তি পৃথিবীতলে
185.23
অন্যোন্যভক্ষণে সক্তা লোভমোহসমন্বিতাঃ
ইহৈব পরিবর্তন্তে ন তে যান্ত্যুত্তরাং দিশম্
185.24
যে গুরূনুপসেবন্তে নিয়তা ব্রহ্মচারিণঃ
পন্থানং সর্বলোকানাং তে জানন্তি মনীষিণঃ
185.25
ইত্যুক্তোঽয়ং ময়া ধর্মঃ সংক্ষেপাদ্ব্রহ্মনির্মিতঃ
ধর্মাধর্মৌ হি লোকস্য যো বৈ বেত্তি স বুদ্ধিমান্
185.26
ভীষ্ম উবাচ
ইত্যুক্তো ভৃগুণা রাজন্ভরদ্বাজঃ প্রতাপবান্
ভৃগুং পরমধর্মাত্মা বিস্মিতঃ প্রত্যপূজয়ৎ
185.27
এষ তে প্রভবো রাজঞ্জগতঃ সংপ্রকীর্তিতঃ
নিখিলেন মহাপ্রাজ্ঞ কিং ভূয়ঃ শ্রোতুমিচ্ছসি