Utshovঅধ্যায় 184
184.1
ভরদ্বাজ উবাচ
দানস্য কিং ফলং প্রাহুর্ধর্মস্য চরিতস্য চ
তপসশ্চ সুতপ্তস্য স্বাধ্যায়স্য হুতস্য চ
184.2
ভৃগুরুবাচ
হুতেন শাম্যতে পাপং স্বাধ্যায়ে শান্তিরুত্তমা
দানেন ভোগ ইত্যাহুস্তপসা সর্বমাপ্নুয়াৎ
184.3
দানং তু দ্বিবিধং প্রাহুঃ পরত্রার্থমিহৈব চ
সদ্ভ্যো যদ্দীয়তে কিংচিত্তত্পরত্রোপতিষ্ঠতি
184.4
অসত্সু দীয়তে যত্তু তদ্দানমিহ ভুজ্যতে
যাদৃশং দীয়তে দানং তাদৃশং ফলমাপ্যতে
184.5
ভরদ্বাজ উবাচ
কিং কস্য ধর্মচরণং কিং বা ধর্মস্য লক্ষণম্
ধর্মঃ কতিবিধো বাপি তদ্ভবান্বক্তুমর্হতি
184.6
ভৃগুরুবাচ
স্বধর্মচরণে যুক্তা যে ভবন্তি মনীষিণঃ
তেষাং ধর্মফলাবাপ্তির্যোঽন্যথা স বিমুহ্যতি
184.7
ভরদ্বাজ উবাচ
যদেতচ্চাতুরাশ্রম্যং ব্রহ্মর্ষিবিহিতং পুরা
তেষাং স্বে স্বে য আচারাস্তান্মে বক্তুমিহার্হসি
184.8
ভৃগুরুবাচ
পূর্বমেব ভগবতা লোকহিতমনুতিষ্ঠতা ধর্মসংরক্ষণার্থমাশ্রমাশ্চত্বারোঽভিনির্দিষ্টাঃ
তত্র গুরুকুলবাসমেব তাবত্প্রথমমাশ্রমমুদাহরন্তি
সম্যগত্র শৌচসংস্কারবিনয়নিয়মপ্রণীতো বিনীতাত্মা উভে সংধ্যে ভাস্করাগ্নিদৈবতান্যুপস্থায় বিহায় তন্দ্রালস্যে গুরোরভিবাদনবেদাভ্যাসশ্রবণপবিত্রীকৃতান্তরাত্মা ত্রিষবণমুপস্পৃশ্য ব্রহ্মচর্যাগ্নিপরিচরণগুরুশুশ্রূষানিত্যো ভৈক্ষাদিসর্বনিবেদিতান্তরাত্মা গুরুবচননির্দেশানুষ্ঠানাপ্রতিকূলো গুরুপ্রসাদলব্ধস্বাধ্যায়তত্পরঃ স্যাৎ
184.9
ভবতি চাত্র শ্লোকঃ
গুরুং যস্তু সমারাধ্য দ্বিজো বেদমবাপ্নুয়াৎ
তস্য স্বর্গফলাবাপ্তিঃ সিধ্যতে চাস্য মানসম্
184.10
গার্হস্থ্যং খলু দ্বিতীয়মাশ্রমং বদন্তি
তস্য সমুদাচারলক্ষণং সর্বমনুব্যাখ্যাস্যামঃ
সমাবৃত্তানাং সদারাণাং সহধর্মচর্যাফলার্থিনাং গৃহাশ্রমো বিধীয়তে
ধর্মার্থকামাবাপ্তির্হ্যত্র ত্রিবর্গসাধনমবেক্ষ্যাগর্হিতেন কর্মণা ধনান্যাদায় স্বাধ্যায়প্রকর্ষোপলব্ধেন ব্রহ্মর্ষিনির্মিতেন বা অদ্রিসারগতেন বা হব্যনিয়মাভ্যাসদৈবতপ্রসাদোপলব্ধেন বা ধনেন গৃহস্থো গার্হস্থ্যং প্রবর্তয়েৎ
তদ্ধি সর্বাশ্রমাণাং মূলমুদাহরন্তি
গুরুকুলবাসিনঃ পরিব্রাজকা যে চান্যে সংকল্পিতব্রতনিয়মধর্মানুষ্ঠায়িনস্তেষামপ্যত এব ভিক্ষাবলিসংবিভাগাঃ প্রবর্তন্তে
184.11
বানপ্রস্থানাং দ্রব্যোপস্কার ইতি প্রায়শঃ খল্বেতে সাধবঃ সাধুপথ্যদর্শনাঃ স্বাধ্যায়প্রসঙ্গিনস্তীর্থাভিগমনদেশদর্শনার্থং পৃথিবীং পর্যটন্তি
তেষাং প্রত্যুত্থানাভিবাদনানসূয়াবাক্প্রদানসৌমুখ্যশক্ত্যাসনশয়নাভ্যবহারসত্ক্রিয়াশ্চেতি
184.12
ভবতি চাত্র শ্লোকঃ
অতিথির্যস্য ভগ্নাশো গৃহাত্প্রতিনিবর্ততে
স দত্ত্বা দুষ্কৃতং তস্মৈ পুণ্যমাদায় গচ্ছতি
184.13
অপি চাত্র যজ্ঞক্রিয়াভির্দেবতাঃ প্রীয়ন্তে নিবাপেন পিতরো বেদাভ্যাসশ্রবণধারণেন ঋষয়ঃ
অপত্যোত্পাদনেন প্রজাপতিরিতি
184.14
শ্লোকৌ চাত্র ভবতঃ
বত্সলাঃ সর্বভূতানাং বাচ্যাঃ শ্রোত্রসুখা গিরঃ
পরিবাদোপঘাতৌ চ পারুষ্যং চাত্র গর্হিতম্
184.15
অবজ্ঞানমহংকারো দম্ভশ্চৈব বিগর্হিতঃ
অহিংসা সত্যমক্রোধঃ সর্বাশ্রমগতং তপঃ
184.16
অপি চাত্র মাল্যাভরণবস্ত্রাভ্যঙ্গগন্ধোপভোগনৃত্তগীতবাদিত্রশ্রুতিসুখনয়নাভিরামসংদর্শনানাং প্রাপ্তির্ভক্ষ্যভোজ্যপেয়লেহ্যচোষ্যাণামভ্যবহার্যাণাং বিবিধানামুপভোগঃ স্বদারবিহারসংতোষঃ কামসুখাবাপ্তিরিতি
184.17
ত্রিবর্গগুণনির্বৃত্তির্যস্য নিত্যং গৃহাশ্রমে
স সুখান্যনুভূয়েহ শিষ্টানাং গতিমাপ্নুয়াৎ
184.18
উঞ্ছবৃত্তির্গৃহস্থো যঃ স্বধর্মচরণে রতঃ
ত্যক্তকামসুখারম্ভস্তস্য স্বর্গো ন দুর্লভঃ